Rasija pačała vyvad svaich vajskoŭcaŭ z aeradroma El-Kamyšły na paŭnočnym uschodzie Siryi, skaračajučy prysutnaść u hetym rehijonie. Pra heta 26 studzienia paviedamiła ahienctva Reuters sa spasyłkaj na piać siryjskich krynic.
Rasijskija padraździaleńni znachodzilisia ŭ aeraporcie El-Kamyšły z 2019 hoda, adnak ich kolkaść była značna mienšaj, čym na klučavych abjektach — avijabazie Chmiejmim i punkcie materyjalna-techničnaha zabieśpiačeńnia VMF RF u Tartusie na mižziemnamorskim uźbiarežžy, jakija Maskva, vierahodna, zachavaje.
Vyvad adbyvajecca na fonie taho, što siły, padparadkavanyja prezidentu Siryi Achmiedu aš-Šaraa, u studzieni ŭziali pad kantrol vialikija terytoryi na poŭnačy i ŭschodzie krainy, jakija raniej kantralavali kurdskija Siryjskija demakratyčnyja siły. Damask imkniecca adnavić uładu nad usioj terytoryjaj dziaržavy.
Pavodle śviedčańniaŭ dźviuch krynic Reuters, pastupovy vyvad rasijskich vajskoŭcaŭ z aeradroma pačaŭsia jašče na minułym tydni. Častku sił płanujuć pierakinuć na bazu Chmiejmim, astatnija pavinny viarnucca ŭ Rasiju. Inšaja krynica ŭ siryjskich strukturach biaśpieki paviedamiła, što za apošnija dni z El-Kamyšły na Chmiejmim byli pieraviezienyja vajskovaja technika i ciažkaje ŭzbrajeńnie. Aficyjnych kamientaroŭ z boku Minabarony Rasii pakul niama.
Raniej hazieta «Kommiersant» sa spasyłkaj na siryjskuju krynicu pisała, što ŭłady Siryi mohuć paprasić Rasiju pakinuć bazu ŭ El-Kamyšły paśla vyciaśnieńnia kurdskich farmiravańniaŭ, bo nieabchodnaść u rasijskaj prysutnaści tam źniknie. Pry hetym karespandent Reuters adznačyŭ, što nad aeradromam usio jašče łunajuć rasijskija ściahi, a na ŭźlotna-pasadačnaj pałasie znachodziacca dva samaloty z rasijskimi apaznavalnymi znakami.
Rasija, jakaja była blizkaj sajuźnicaj zrynutaha prezidenta Siryi Bašara Asada, paśla prychodu da ŭłady isłamisckaj kaalicyi na čale z Achmiedam aš-Šaraa naładziła z novym kiraŭnictvam pracoŭnyja adnosiny. U minułym hodzie aš-Šaraa zajaviŭ prezidentu Rasii Uładzimiru Pucinu, što Damask budzie vykonvać usie raniejšyja damoŭlenaści z Maskvoj, što faktyčna aznačaje zachavańnie klučavych rasijskich vajskovych abjektaŭ u Siryi.
Ciapier čytajuć
U SIZA KDB apynuŭsia Mikałaj Cyrto, fihurant staroj spravy Biełarusbanka. Druhi raz — za palityku1
U SIZA KDB apynuŭsia Mikałaj Cyrto, fihurant staroj spravy Biełarusbanka. Druhi raz — za palityku
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi1111
Kamientary