«Siońnia ŭ Miensku prachodzić «usiebiełaruski narodny schod» — heta prafanacyja, marnaja trata našych z vami hrošaj. Nie zvažajcie na toje. Naš schod budzie 19-ha — sapraŭdy narodny i ŭsiebiełaruski», — zajaviŭ kandydat ad demakratyčnych siłaŭ. 28 lutaha jon zapisaŭ prahramny telezvarot da biełaruskich hramadzianaŭ. Vystup budzie pakazany na BT 2 sakavika a 18.30. Dla tych, chto nie pabačyć jaho, prapanujem asnoŭnyja pałažeńni zvarotu.
«Siońnia ŭ Miensku prachodzić «usiebiełaruski narodny schod» — heta prafanacyja, marnaja trata našych z vami hrošaj. Nie zvažajcie na toje. Naš schod budzie 19-ha — sapraŭdy narodny i ŭsiebiełaruski», — zajaviŭ kandydat ad demakratyčnych siłaŭ. 28 lutaha jon zapisaŭ prahramny telezvarot da biełaruskich hramadzianaŭ. Vystup budzie pakazany na BT 2 sakavika a 18.30. Dla tych, chto nie pabačyć jaho, prapanujem asnoŭnyja pałažeńni zvarotu.
Čamu ŭłada pavinna źmianicca?
«Čamu 19 sakavika ŭłada musić źmianicca? Bo 12 hod — dastatkovy termin. Kožny heta razumieje. Usio, što jon moh, čaho chacieŭ, za 12 hod zrabiŭ. Bolej, lepiej jon užo ničoha nie prydumaje i nia zrobić. Heta zakon žyćcia, palityki».
Na jahonuju dumku, takoje doŭhaje kiravańnie adnaho čałavieka niepaźbiežna viadzie da złoŭžyvańniaŭ i maralnaje dehradacyi, a ŭ treci termin da hetaha dadasca jašče dzialba ŭłasnaści chaŭruśnikami. «Jak budziecie ŭ Miensku 19 sakavika — zajedźcie ŭ Drazdy, pahladziecie, jakoje tam adbudavana carskaje siało», — zaklikaŭ A.Milinkievič. I heta tolki bačny bok, miž tym mnohaje zastajecca schavanym ad ludziej, bo «orhany nahladu za zakonnaściu padnačaleny vykanaŭčaj uładzie i tamu maŭčać», a «niezaležnaja presa zabaroniena». Jon prynios z saboj u studyju stos zabaronienych vydańniaŭ.
«My jašče za hałavu schopimsia, kali daviedajemsia paśla vybaraŭ isny stan rečaŭ», — zajaviŭ A.Milinkievič.
«Sprava Žuraŭkovaj, sprava Rybakova, sprava Ivanova. Heta ž prezydentavy ludzi, im pryznačanyja. U luboj jakoj inšaj krainie prezydent musiŭ by nieści adkaznaść za takija pryznačeńni. Čamu Žuraŭkova, što skrała miljony dalaraŭ, pamiłavana? Čamu pamiłavany Ivanoŭ? Paśla 19 sakavika my vierniemsia da hetych spravaŭ i pieradamo ich na paŭtorny razhlad u sud, kali treba».
My adkryjem rynak zbytu
Dalej kandydat u prezydenty raskazaŭ pra svaju kamandu i prahramu.
«Da ŭłady idzie mocnaja kamanda ź jasnaj i vyhadnaj dla krainy prahramaj. U kamandzie 12 tysiač čałaviek, 6 akademikaŭ i siabroŭ-karespandentaŭ Akademii navuk, 22 daktary navuk, 114 kandydataŭ navuk».
Jon nazvaŭ kamandu A.Łukašenki «škłoŭskim kłanam», a abjadnaŭčymi pryncypami svajoj kaalicyi nazvaŭ «viernaść pryncypam svabody, zakonnaści i demakratyi».
Vystup pa ekanamičnym bloku A.Milinkievič pačaŭ z enerhietyčnaha pytańnia. «My razumiejem, što heta budzie asnoŭnaja zadača novaha ŭradu: zabieśpiačeńnie bieśpierapynnaści pastavak i prymalnaści cenaŭ na haz i naftu. My ŭžo pracujem nad hetaj zadačaj, jak z Uschodam, tak i z Zachadam». Jon namiaknuŭ, što hetym byli abumoŭlenyja jahonyja vizyty ŭ Maskvu j Berlin pierad pačatkam vybarčaj kampanii».
Jon nazvaŭ Eŭropu «ahromnistym nadziejnym rynkam zbytu na viaki dla našych zavodaŭ, kałhasaŭ, firmaŭ i kampanijaŭ. Heta budzie budučynia nia tolki naša, ale i našych unukaŭ». Na jahonuju dumku, A.Łukašenka niazdolny adkryć hety rynak dla biełaruskaj ekanomiki. «Takich, jak Łukašenka, tam nia prymuć. Eŭropa ž bo prajšła dyktaturu Hitlera. Dyktatary byli ŭ Hišpanii, Hrecyi — usie ad ich pazbavilisia».
A.Milinkievič paŭtaryŭ svajo abiacańnie davieści za piać hadoŭ siaredni zarobak u krainie da 550 eŭra. Jon taksama paabiacaŭ zakanadaŭča zabaranić zaćviardžeńnie pensijaŭ nižej pražytkovaha minimumu.
Asabistaja mara — «folksvahien»
A.Milinkievič padzialiŭsia «svajoj asabistaj maraj» — pabudavać u Biełarusi zavod lehkavych aŭtamabilaŭ. «Folksvahien» zaprosim. Novy, a nie patrymany aŭtamabil — takim ja baču sacyjalny standart dla kožnaha. Darečy, abiacaju: pakul biełaruskaha zavodu pa vytvorčaści lehkavikoŭ nia budzie, my skasujem mytnyja pošliny na ŭvoz aŭtamabilaŭ.
Haradzieniec siała nie papsuje
Pra sielskuju haspadarku A.Milinkievič havaryŭ amal stolki ž, kolki ab pramysłovaści. Jon paabiacaŭ adnavić parytet cenaŭ na sielskahaspadarčuju i pramysłovuju pradukcyju i biudžetnych układańniaŭ u horad i siało. «Vy mnie paviercie: uradženiec Haradzienskaj vobłaści sielskahaspadarčuju palityku nie papsuje», — pažartavaŭ jon.
Jon abvierh dumku, što ekanamičnamu rostu kraina zaŭdziačvaje A.Łukašenku: «Chaj vam nia maniać. Bahata što robicca ŭ krainie niezaležna ad dziaržaŭnaj ułady. Rost ekanomiki ludzi robiać, voś i ekanomika raście. Tut Łukašenka ci Milinkievič ni pry čym, nia treba spekulavać. Viedajcie, u damach jak było ciapło, tak i budzie. Što treba mianiać, dyk heta palityčnuju systemu, staŭleńnie da čałavieka treba mianiać. Źmieniacca dačynieńni dziaržavy i hramadztva, u nas budzie nia ŭłada siły, a ŭłada zakonu. Prezydent Milinkievič budzie zaŭsiody trymacca zakonu. Ale prezydent Milinkievič nia budzie pieraŭtvarać siabie ŭ imperatara, a hramadzianaŭ — u chałopaŭ. Heta nie ŭ majoj tradycyi».
Ja biełarus i hetym hanarusia
A.Milinkievič padkreśliŭ: «Ja procilehłaść Łukašenku. Jon saviecki čałaviek, jon sam heta pryznavaŭ. Ja biełarus i hanarusia hetym. Ja peŭny, što nastupnym prezydentam Biełarusi budzie nie saviecki čałaviek, ale biełarus. Sama historyja dyktuje heta.
Nijakaja ŭ nas ciapier nie respublika, nijakaja nie demakratyja. Biełaruś pieraŭtvorana ŭ absalutnuju manarchiju. U manarchiju! 7 listapada letašniaha hodu chłopiec u Homieli vyjšaŭ na mitynh ź plakatam «Dałoŭ samadziaržaŭje». Što ž vy dumajecie — jaho aryštavali!
Voś siońnia ŭ Miensku prachodzić usiebiełaruski narodny schod — heta prafanacyja, marnaja trata našych z vami hrošaj. Nie zvažajcie na toje. Naš schod budzie 19-ha — sapraŭdy narodny i sapraŭdy ŭsiebiełaruski».
Vy viedajecie moj rod
A.Milinkievič asobna źviarnuŭsia da niekatorych hrupaŭ nasielnictva.
Źviartajučysia da nastaŭnikaŭ, jon pryhadaŭ svajho baćku — dyrektara škoły, kavalera ordenu Lenina. «Ja viedaju, jakaja ciažkaja vaša praca. Takaja ž vysakarodnaja, jak praca doktara ci chlebaroba, — skazaŭ jon. — Źviartajusia najpierš da vas, šanoŭnyja pedahohi, bo vy, jak nichto, viedajecie, jakuju minu pad budučyniu krainy zakładvaje ciapierašniaja padmannaja ŭłada… Viedajecie, jak chłuśnia sparadžaje chłuśniu. Jak mana płodzić ašukanstva, zładziejstva».
Pensijaneraŭ jon paprasiŭ 19 sakavika «hałasavać sercam».
Kandydat ad demakratyčnych siłaŭ zaklikaŭ moładź u hety miesiac «kinuć usio i addać siabie całkam Baćkaŭščynie». «Nie paškadujecie! Paviercie, takich dzion, takoha drajvu ŭ vas, moža, za cełaje žyćcio bolš nia budzie». Jon ahitavaŭ: «Kažycie svaim siabram: jość inšaja muzyka, jość muzyka Svabody. Niama na śviecie ničoha lepšaha za jaje. I my jaje pačujem 19 sakavika!»
Źviartajučysia da viernikaŭ, jon pracytavaŭ słovy ź liturhii: «Daj nam Boh stojkaści ŭ viery, mužnaści ŭ vyprabavańniach i viernaści svajmu narodu» — i ź Śviatoha Piśma: «Pa spravach ichnych paznajecie ich». «Vy viedajecie maje spravy, viedajecie spravy majho baćki, majho dzieda, jaki za arhanizacyju biełaruskich škołaŭ siadzieŭ u polskaj turmie, maich pradziedaŭ, što popleč z Kalinoŭskim zmahalisia za niezaležnaść Biełarusi. Maje prodki pad kuli, u turmu išli za Biełaruś, za našu movu, za našu praŭdu. Chto budzie za praŭdu, kali nia vierniki?» Jon zaklikaŭ usich malicca, kab 19 sakavika Boh pasłaŭ Biełarusi praśviatleńnie.
«Čas Svabody blizki. Vašy achviary nia marnyja. Budźcie sercam z nami 19 sakavika», — źviarnuŭsia jon da palitviaźniaŭ, pieraličyŭšy ich pajmienna. Jon taksama zaklikaŭ «maci i žanok viaźniaŭ sumleńnia — źnikłych, biespadstaŭna aryštavanych, źbitych, abyłhanych» — pryjści 19 sakavika na płošču i ŭstać popleč ź im. «Imionami samych darahich vam ludziej buduć nazvany vulicy našych haradoŭ», — paabiacaŭ jon.
Paznajemsia pa sinim
Svaju peŭnaść u pieramozie A.Milinkievič hruntuje na źviestkach niezaležnych sacyjolahaŭ. Kab prychilniki pieramienaŭ bačyli adzin adnaho, jon prapanavaŭ u jakaści znaku našaha adzinstva — «sini koler».
Jon papiaredziŭ, što pierad 19-m ułada rychtuje pravakacyi z padkidańniem zbroi, valuty, padmannych dakumentaŭ, i ŭskłaŭ adkaznaść na A.Łukašenku i zaklikaŭ da stojkaści: «Kali my nie adstaim svajho vybaru 19-ha, inšaha šancu na svabodu doŭha moža nia być» i krainu moža čakać «los Paŭnočnaj Karei».
Ludzi paklalisia
A.Milinkievič papiaredziŭ, što rychtujecca falsyfikacyja vynikaŭ hałasavańnia. «19-ha ad 10-j ranicy telebačańnie budzie abviaščać pa ŭsich kanałach, što Łukašenka nabiraje 80% hałasoŭ. Nachabna, nia ličačy, nie dačakaŭšysia kanca hałasavańnia».
«Ale my budziem viedać realny vynik vybaraŭ, — paabiacaŭ jon. — My abvieścim jaho na płoščy. Lubymi sposabami dabirajciesia da Miensku, 19-ha, da 20-j hadziny. Buduć prysutnyja ŭsie suśvietnyja i rasiejskija telekanały. Buduć sotni niezaležnych naziralnikaŭ. I budziem my, nas buduć dziasiatki tysiač. Tolki na płoščy vy daviedajeciesia sapraŭdnyja vyniki hałasavańnia. I niachaj ułada na 74 tysiačy čalcoŭ vybarčych kamisijaŭ uklučyła, niby śmiejučysia nad usimi nami, tolki adnaho našaha pradstaŭnika. Ale ŭ nas jość svaje ludzi ŭ kamisijach, jakija paklalisia daviedacca i skazać praŭdu, čaho b im heta ni kaštavała».
Z apelacyjaj da siłavikoŭ
A.Milinkievič zajaviŭ rezka: «Ja vam skažu: dla hetaha režymu nia važna, jak vy hałasujecie. Tolki ludzi na vulicach zmohuć ich praćvierazić».
Jon amal dasłoŭna paŭtaryŭ słovy A.Łukašenki, ale z supraćlehłym pasłańniem: «Tolki narod vyrašyć budučyniu svajoj krainy. Tolki biełaruski narod! Kali my prajhrajem, ja tamsama, na płoščy ščyra pryznaju svaju parazu. Ale kali ja nabiaru bolej ad pałovy hałasoŭ, pierachod ułady budzie ažyćcioŭleny zhodna z Kanstytucyjaj, pad pilnym kantrolem siłavych strukturaŭ».
Vychad na płošču jon taksama abhruntavaŭ tradycyjaj razam sustrakać vyniki vybaraŭ, što isnuje ŭ roznych krainach i ŭ Biełarusi.
Da siabroŭ svajoj kamandy jon źviarnuŭ nastupnyja słovy: «Maja kamanda viadzie vyklučna sumlennuju kampaniju. Heta naš pryncyp. Što robić ułada? Za čas kampanii siłavyja struktury zatrymali 220 našych aktyvistaŭ. Tym nia mienš, chłopcy i dziaŭčaty — cierpim! Cierpim da 19 sakavika. Ja prašu svaich aktyvistaŭ: navat kali vas buduć bić nižej pojasu, nie paddavajciesia na pravakacyi. My idziom na pieramohu. Kali tolki što-kolviek zrobicie niesumlenna, heta budzie dla ich začepkaj. My vyjhrajem sumlenna».
A.Milinkievič paŭtaryŭ svaju prapanovu A.Łukašenku pravieści teledebaty ŭ žyvym etery.
«Naša pieramoha niepaźbiežnaja, jak śvitanak», — tak skončyŭ jon svoj telezvarot.
Raźviedka ZŠA: Biełaruś stała pieradavym vajskovym płacdarmam Rasii24
Kamientary