Biełaruś prapanavała Litvie abmierkavać pytańni z budaŭnictvam AES na terytoryi dźviuch krain

Ministerstva pryrodnych resursaŭ i achovy navakolnaha asiarodździa Biełarusi zaprasiła litoŭskich kaleh abmierkavać pytańni, źviazanyja z budaŭnictvam atamnych stancyj na terytoryi dźviuch krain,

U liście za podpisam pieršaha namieśnika ministra Vitala Kulika, nakiravanym 6 lutaha ŭ Ministerstva navakolnaha asiarodździa Litvy, prapanujecca, u pryvatnaści, pravieści kansultacyi pa prajekcie dvuchbakovaha pahadnieńnia ab vykanańni Kanviencyi ab acency ŭździejańnia na navakolnaje asiarodździe ŭ transhraničnym kantekście (Kanviencyja Espa) u adpaviednaści z artykułam 8 zhadanaj kanviencyi.

Biełarusi bok prapanoŭvaje pravieści paślaprajektny analiz biełaruskaj AES u adpaviednaści z artykułam 7 Kanviencyi Espa,

Śpiecyjalisty Minpryrody prapanujuć taksama abmierkavać vyniki praviedzienych Litvoj u 2010 hodzie inžynierna-hieałahičnych i hieatechničnych daśledavańniaŭ Visahinskaj placoŭki i typ reaktarnaj ustanoŭki, vybranaj dla budaŭnictva Visahinskaj AES, tamu što, jak adznačajecca ŭ liście ministerstva, u spravazdačy ab acency ŭździejańnia na navakolnaje asiarodździe jon nie byŭ vyznačany.

Minpryrody prapanuje litoŭskim kaleham pravieści kansultacyi ŭ lutym abo pačatku sakavika ŭ Minsku.

Nahadajem, biełaruski bok raniej zajaŭlaŭ pra nievykanańnie Litvoj pałažeńniaŭ Kanviencyi Espa pry raźmiaščeńni Visahinskaj AES.

Pradstaŭniki biełaruskaj i rasijskaj hramadskaści 30 śniežnia raspaŭsiudzili adkryty zvarot da ŭradaŭ Litvy, Japonii i ZŠA z patrabavańniem spynić realizacyju prajekta Visahinskaj AES i pravieści paŭnavartasny ŭlik mierkavańnia hramadzian Litvy i Biełarusi. Padstavaj dla zvarotu stała padpisanaje 23 śniežnia pahadnieńnie pamiž uradam Litvy i japonskim kancernam Hitachi-GE Nuclear Energy Ltd., źviazanaje z budaŭnictvam i finansavańniem Visahinskaj AES. Heta pahadnieńnie praduhledžvaje ŭźviadzieńnie AES japonskim kancernam u Litvie, na placoŭcy Ihnalinskaj AES, što na miažy ź Biełaruśsiu. Japonski i litoŭski ŭrady majuć namier akazvać hetamu prajektu finansavaje sadziejničańnie. Technałohija, vybranaja litoŭcami dla Visahinskaj AES, — adnakonturny kipiačy reaktar, pratatyp jakoha vykarystoŭvaŭsia na AES «Fukusima».

U svaju čarhu Litva nie zhodna z uźviadzieńniem biełaruskaj AES na placoŭcy ŭ Astravieckim rajonie Hrodzienskaj vobłaści, blizu biełaruskaj miažy i ŭ niebiaśpiečnaj blizkaści ad stalicy krainy — Vilni.

• 0
• 0
• 0
• 0
• 0
• 0
• 0
• 0