Žychary vioski napisali Łukašenku list z prośbaj viarnuć tannyja chleb i małako
Adbyłosia heta ŭ Karmianskim rajonie — samym biednym u krainie.
Žychary vioski Starahrad Karmianskaha rajona Homielskaj vobłaści nakiravali Alaksandru Łukašenku kalektyŭny zvarot z prośbaj «razabracca z cenami» i viarnuć na palicy «sacyjalnyja» chleb i małako.
Jak paviedamiŭ inicyjatar zboru podpisaŭ Alaksiej Paŭłoŭski, viaskoŭcy aburanyja, što małako tłustaściu 2,6% realizujecca pa 4,8 tysiačy rubloŭ, chacia tydzień tamu ŭ prodažy možna było znajści takoje ž małako pa 2,3 tysiačy.
«U žycharoŭ vioski niama vybaru. Jość tolki małako pa 4,8 tysiačy i chleb adnaho najmieńnia, amal pa 5 tysiač rubloŭ za bochan. Darečy, asartymient śpirtnoha ŭ viaskovym mahazinie — šyroki. Jość tanny ałkahol usich vidaŭ, jość i daražejšy. A što da praduktaŭ — vybaru niama. Parušajucca pravy spažyŭcoŭ. Ludzi prosiać pradaŭcoŭ zadavolić ich zajaŭki i pryvieźci cukar niefasavany, ale ich patrabavańni ihnarujucca, i cukar u prodažy tolki fasavany, jaki, viadoma, daražejšy», — raskazaŭ Paŭłoŭski.
List Łukašenku padpisali dziesiać čałaviek. Jak rastłumačyŭ Paŭłoŭski, mnohija viaskoŭcy ich padtrymlivajuć, ale bajacca stavić svaje podpisy pad kalektyŭnym zvarotam
Pavodle danych Biełstata, samyja nizkija zarpłaty ŭ Biełarusi — mienavita ŭ Karmianskim rajonie. Ustudzieni-sakaviku siaredniaja zarpłata tut składała 1,985 młn. rubloŭ.
Pavodle słoŭ Paŭłoŭskaha, u miascovaj sielskaj haspadarcy miechanizatary za pasiaŭnuju kampaniju atrymali zarpłatu ŭ miežach 1 młn. rubloŭ.
U sielsaviecie paviedamili, što sa skarhami na košt małaka žychary Starahrada nie źviartalisia. Pavodle danych sielsavieta, u hetaj vioscy pražyvajuć 272 čałavieki, miascovyja žychary trymajuć 45 karoŭ. Trymać karovu vyhadna, śćviardžajuć u sielsaviecie: niekatoryja starahradcy trymajuć pa try karovy i za 10 dzion atrymlivajuć za zdadzienaje małako 1,5 młn. rubloŭ. Małako ŭ nasielnictva Rahačoŭski małočny zavod prymaje pa 2 tys. 550 rubloŭ za litr. Raniej, kažuć u sielsaviecie, karoŭ u Starahradzie było značna bolš, ale ciapier moładź trymać žyviołu nie žadaje, pažyłyja — nie mohuć, astatnija — złoŭžyvajuć śpirtnym.
-
U Baranavičach vylepili sa śniehu vialikaha kania ŭ palito FOTAFAKT
-
Pamiatajecie biełarusku, jakaja žyła i viała biznes u Litvie, ale nienavidzieła krainu? Daviedalisia, što z fanatkaj Łukašenki ciapier
-
«Pakul nie źniali tyktok — nichto nie varušyŭsia». Jak biełarusy vyrašajuć kamunalnyja prablemy praz ahałosku
Raźviedka ZŠA: Biełaruś stała pieradavym vajskovym płacdarmam Rasii24
Kamientary