Siońnia miesiac, jak u SIZA KDB znachodzicca fatohraf Anton Surapin

Siońnia, 13 žniŭnia, spaŭniajecca miesiac, jak byŭ zatrymany student Instytuta žurnalistyki BDU, 20-hadovy Anton Surapin, jaki pieršym na svaim sajcie bnp.by vykłaŭ fatazdymki plušavych miadźviedzikaŭ, skinutych z samalota nad Iviancom 4 lipienia. Antona Surapina zatrymali 13 lipienia ŭ Minsku, na kvatery, jakuju jon zdymaŭ.

7 žniŭnia KDB aficyjna zajaviŭ, što zaviedziena i rasśledujecca kryminalnaja sprava pa prykmietach złačynstva, praduhledžanaha č.3 art.371 KK Respubliki Biełaruś pa fakcie niezakonnaha pierasiačeńnia 4 lipienia dziaržaŭnaj miažy Biełarusi paddanymi Karaleŭstva Šviecyi na lohkamatornym samalocie.

Pa padazreńni ŭ dapamahańni ŭ ździajśnieńni pakazanaha złačynstva, zajaŭlaje KDB, zatrymanyja hramadzianie Biełarusi 20-hadovy žurnalist Anton Surapin, jaki pieršym na svaim sajcie apublikavaŭ fatazdymki skinutych z samalota plušavych miadźviedziaŭ i 26-hadovy ryełtar Siarhiej Bašarymaŭ [zatrymany 6 lipienia], jaki, jak miarkujecca, zdavaŭ kvateru šviedam u Minsku.

Surapinu i Bašarymavu pradjaŭlenaje abvinavačvańnie pa č.6 art.16 (dapamahańnie ŭ ździajśnieńni złačynstva) i č.3 art. 371 (niezakonnaje pierasiačeńnie Dziaržaŭnaj miažy Biełarusi) KK, što karajecca źniavoleńniem da 7 hadoŭ.

10 žniŭnia KDB nakiravaŭ arhanizataram plušavaha desantu — hramadzianam Karaleŭstva Šviecyi Peru Kromviełu, Tomasu Mazeci i Chańnie Linie Frej — aficyjnyja pozvy ŭ suviazi sa śledstvam u spravie parušeńnia biełaruskaj pavietranaj miažy 4 lipienia. U pozvach havorycca, što hetyja asoby pavinny źjavicca dla praviadzieńnia śledčych dziejańniaŭ u 10-dzionny termin. Pry sabie nieabchodna mieć pašpart abo inšaje paśviedčańnie asoby.

Zaznačym, što žurnalisty ładziać akcyi padtrymki Antona Surapina. Ź plušavym miadźviedziem na rukach sfatahrafalisia bolš za try dziasiatki kalehaŭ Surapina, a jahonyja adnakurśniki źbirali hrošy na apłatu pasłuh advakata.

U sieradu, 8 žniŭnia, za fatahrafańnie ź plušavym miadźviedziem u centry Minska supracoŭnikami milicyi byli zatrymanyja žurnalistki Julija Daraškievič i Iryna Koźlik («Komsomolskaja pravda» v Biełarusi»), ich abvinavacili ŭ niezakonnym pikietavańni (pavodle śviedkaŭ-milicyjantaŭ na sudzie, «u ich byŭ miadźviedź i jany ź im razmaŭlali»), noč dziaŭčaty praviali ŭ Centry izalacyi pravaparušalnikaŭ, a nastupny dzień aštrafavanyja sudom Savieckaha rajona na 3 młn rubloŭt kožnaja (maksimalnaja sankcyja pavodle hetaha artykuła KoAP — 15 sutak).

***

Adnamatorny samalot sa šviedskim ekipažam z supracoŭnikaŭ kampanii Studio Total ź plušavymi miškami na borcie pierasiek pavietranuju miažu Biełarusi ranicaj 4 lipienia. Jon pravioŭ u pavietranaj prastory krainy prykładna paŭtary hadziny, skinuŭšy nad Iviancom i ŭskrainaj Minska bolš čym 800 cacak z zapiskami ŭ padtrymku demakratyi ŭ Biełarusi.

• 0
• 0
• 0
• 0
• 0
• 0
• 0
• 0