Andrej Rasinski. Kadry

Ukrainskaja žachaŭka, afrapryhonnaja mistyka i inšyja rarytety

Sučasnaja ŭkrainskaja žachaŭka, žanravy blaxploitation, apošniaja stužka Łamberta Bavy i modny paŭtor «Domu vaskovych fihuraŭ»

Štolnia

Kostki

Syn pryvida

Dom vaskovych fihur

Vypadkova ŭ ruki trapili cikavyja žanravyja stužki, što raspaŭsiudžvajucca na płytkach i videa. Nie mahu nie ŭzhadać hetyja filmy – a zaadno dam tłumačeńnie małaviadomaha termina.

posterŠtolnia (Štolnia)

Ukraina, 2006, kalarovy, 90 chv.

Režyser: Lubamir Kabylčuk

Roli vykonvajuć: Siarhiej Staśko, Śviatłana Artamonava, Pavał Li, Volha Staražuk, Alaksiej Zabiahajeŭ

Žanr: Maładziovaja žachaŭka

Mastactva / Strach: 4 / 2

Kaliści ŭ Kijevie pakłanialisia Pierunu, ale z pryniaćciom chryścijanstva stod byŭ źniščany, a vałchvy schavalisia ŭ piačorach. U našyja dni studenty-archieolahi adpraviłsia na praktyku i ŭ lesie natknulisia na zakinutuju štolniu. Cikaŭnyja hieroi vyrašyli daśledavać piačoru… Lepiej by jany hetaha nie rabili.

Na płytcy karcina była ŭ zborcy “rasiejskich žachaŭ”, ale heta sučasnaje ŭkrainskaje kino, naŭmysna stvoranaje pa receptach amerykanskich žachavak – i, što padkreślivali stvaralniki, na ŭkrainskaj movie (na dysku karcina dublavanaja pa-rasiejsku, ale ŭkrainskimi zastalisia śpievy).

Samaje pałachlivaje ŭ filmie – heta sama štolnia, brudnyja mury, nizkija stoli, milhatlivaje śviatło. Abaviazkovyja śmierci hierojaŭ ścipła-nievyraznyja, kanflikty – standartna-umoŭnyja. Finalny stod Pieruna i žrec-fizkulturnik vyhladajuć kpinam z ukrainskaha kino, jakoje ŭ svaim archivie maje kudy strašniejšyja kadry (dastatkova ŭzhadać rańnija stužki Daŭženki).

«Štolnia» nia vielmi roźnicca ad šmatlikich amerykanskich stužak klasy “B” i “Z” – ale heta nielha pryznać niedachopam.

Sprobu stvaryć sučasnaje ŭkrainskaje žanravaje kino možna tolki vitać. Prynamsi, ukrainskaja «Štolnia» žyviejšaja za rasiejskuju «Viedźmu» i «Miečanosca».

posterKostki (Kosti / Bones)

ZŠA, 2001, kalarovy, 92 chv.

Režyser: Ernest R.Dzikiersan

Roli vykonvajuć: Snup Doh, Prem Hrajr, Majkł T.Ŭajs, Kliftan Paŭeł, Ryki Harys, Bjanka Łoŭsan, Chalił Kiejn

Žanr: Hatyčna-maładziovaja afrapryhonnaja mistyka

Mastactva / Strach: 5,5 / 6

U 1979 hodzie Džymi Bons byŭ pavažanym i aŭtarytetnym čałaviekam na svajoj vułačcy. Jamu zdradzili j jaho zabili – a cieła zakapali va ŭłasnym domie. Praz 22 hady čaćviora padletkaŭ zrabili tam načny klub. Duch Džymi vyzvaliŭsia i pačaŭ pomścić…

«Kostki» – typovy blaxploitation (afrapryhon). Heta značyć, film – stvorany ciemnaskurym režyseram ź ciemnaskurymi aktorami (biełyja na dziasiatych ralach) – i z pobytam, znajomym afraamerykancam. Henyja «padpolnyja» sacyjalna-krytyčnyja stužki źjavilisia ŭ 70-yja hady, adyli razhortvalisia ŭ asnoŭnych žanrach.

Ślizievy horad pamierłych, zaviaršalny rep, hatyčnyja truščoby, žanravyja cytaty z žachaŭskaj kinaklasyki: fantanavańnie ličynkami, ciomny sabaka, zdań u vesternova-vampiryčnaj nakidcy…

Mury stanoviacca palenym miasam hrešnikaŭ, sabačaja tryzna mantažujecca z uvaskrašeńniem škileta, śpirytyčny seans zalivaje kryvioju łožak, a adsiečanyja hałovy (kamedyjnyja persanažy) – zaciata spračajucca z zabojcam-pryvidam…

Režyser filmu Ernest Dzikiersan (siabra Spajka Li i jahony aperatar) – padśviečvaje infernalnaje čyrvona-zialonymi kolerami, što dla biełaruskaha hledača tłumačeńniaŭ nie patrabuje.

posterSyn pryvida (Syn prizraka / Ghost Son)

Italija – Vialikabrytanija – Paŭdniova-Afrykanskaja respublika – Hišpanija, 2006, kalarovy, 97 chv.

Režyser: Łamberta Bava

Roli vykonvajuć: Džon Hanna, Łaŭra Herynh, Pit Postłuejt, Karalina Kataldzi Tasoni

Žanr: Mistyka

Mastactva / Strach: 7 / 7

Stejsi j Mark žyvuć na fermie ŭ Paŭdniovaje Afrycy i vielmi kachajuć adzin adnaho. Ale Mark hinie. Stejsi nia moža źmirycca sa strataj – i Mark prychodzić da jaje ŭnačy. Praz 9 miesiacaŭ u Stejsi naradžajecca syn. Syn pryvida…

Łamberta Bava – adna z klučavych fihuraŭ «łacinskaha choraru», hodny pradaŭžalnik «strašnaje» spravy svajho baćki – režysera Maryjo Bavy. Dla «łacinskaha choraru» charakterna vykštałconaja vizualnaja atmasfera, trymciennaje seksualnaje šalenstva j zalimitny kantakt ź niebiaśpiečnym zvyšnaturalnym.

U «Synie pryvida» splatajucca tryźnieńnie j realnaść, aktrysa Łaŭra Herynh kałocicca ad žachu pad tryvožnuju muzyku Paoła Vivaldzi, ścieni žadańniaŭ nabyvajuć złaviesnuju płoć, a maleńkaje dzicia (jak u «Mohiłkach chatnich žyviołaŭ» i «Omenie») pniecca stać zabojcam.

Apošniaja stužka Łamberta Bavy była nia vielmi prychilna ŭspryniataja hledačami j krytykaj (ad režysera čakali šoku «Makabra» i «Demanaŭ»), ale pry lubym raskładzie heny eŭrapiejski film pałachliviejšy za šarahovuju halivudzkuju pradukcyju.

posterDom vaskovych fihur (Dom voskovych fihur / House of Wax)

ZŠA – Aŭstralija, 2005, kalarovy, 113 chv.

Režyser: Chaum Kajiet-Sera

Roli vykonvajuć: Eliša Katbert, Čad Majkł-Miurej, Brajan Van Cholt, Perys Hiłtan, Jared Padalecki, Džon Abrahamz

Žanr: Raśsiakalnik (slasher)

Mastactva / Strach: 6 / 7

Kampanija maładych ludziej jedzie pahladzieć na futboł. U lesie adna z mašynaŭ łamajecca. Chłopiec ź dziaŭčynkaj adpraŭlajucca ŭ najbližejšaje miastečka pa dapamohu; nieŭzabavie da ich dałučacca j astatnija niebaraki. U horadzie najvažniejšaja ŭstanova – Dom vaskovych fihuraŭ, ekspanaty jakoha vyhladajuć nadziva realistyčnymi. U hetym niama aničoha dziŭnaha – i ŭ hierojaŭ jość usie šancy dałučycca da kašmarnaje ekspazycyi.

Karcina, pradusavanaja Robertam Zemekisam i Džoełam Silveram, – dvajny remejk. Stužka Andre De Tota 1953 hodu «Muzej vaskovych fihuraŭ» ź Vinsentam Prajsam paŭtarała karcinu 1933 hodu. A, uvohule, na «vaskovuju» temu, pačynajučy z 20-ych hadoŭ, źniata nia mieniej za piać stužak. Ale, kali raniejšyja karciny rabili akcent na ažyŭlenych ekspanatach, ci, prynamsi, na pakutach «vaskovaha» mastaka-demijurha, to sučasny film uličvaje dośvied šmatlikich škumatańnikaŭ i raśsiakalnikaŭ – ad «Techaskaj raźni benzapiłoj» da «Pavarotu nie tudy».

A stvaralnik muzeju «razdvoiŭsia». Mańjaki – braty-bliźniaty (abiedźvie roli – Brajan Van Cholt), złučanyja nianaviściu j patalahičnymi złačynstvami. Miasnyja kašmary padkreślivajucca: cieła zalivajecca voskam, ździrajecca skura, łom prabivaje hałavu. Pusty horad zapoŭnieny vaskovymi statujami, a źlakany kryk pačuć niemahčyma (akryvaŭleny rot zalepleny klejem).

Amerykancaŭ vabili na karcinu «zabitaju» Perys Hiłtan, śvieckaj ilvicaj i spadčyńnicaj sietki hatelaŭ (blandynka-skandalistka zasłužana atrymała «Załatuju malinu» za najhoršuju rolu).

Ale dla svajoj padžanravaj katehoryi film davoli prystojny.

Usie filmy

Kamientary

 
Naciskańnie knopki «Dadać kamientar» aznačaje zhodu z rekamiendacyjami pa abmierkavańni.

Ciapier čytajuć

Tehieran haryć. Izrailskija źniščalniki praciahvajuć udary, pakul SPA Irana biaśsilnaja

Tehieran haryć. Izrailskija źniščalniki praciahvajuć udary, pakul SPA Irana biaśsilnaja

Usie naviny →
Usie naviny

Što moža čakać tych, kaho buduć sudzić pa spravie «Biełaruskaha Hajuna»?

Łukašenka parekamiendavaŭ biełarusam nie nalahać na bulbu13

Izrailcianam prychodziać špijonskija paviedamleńni ad karespandentki ANT10

Usploski zakazaŭ picy kala Pientahona mahli śviedčyć pra budučuju ataku na Iran9

Dyrektarka dziciačaha centra, dzie razmaŭlajuć vyklučna na ruskaj, abvinavačvaje čynoŭnikaŭ i dziaržaŭnych žurnalistaŭ u chłuśni27

Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda1

U vyniku ŭdaraŭ Izraila pa Iranie likvidavanyja dzieviać viadučych fizikaŭ-jadzierščykaŭ4

Rabavańni, zhvałtavańni i navat kradziež adzieńnia z truny: Minsk kryminalny pry Stalinie2

Zialenski: Łukašenka baicca i pieraniasie vučeńni dalej ad miažy z Ukrainaj16

bolš čytanych navin
bolš łajkanych navin

Tehieran haryć. Izrailskija źniščalniki praciahvajuć udary, pakul SPA Irana biaśsilnaja

Tehieran haryć. Izrailskija źniščalniki praciahvajuć udary, pakul SPA Irana biaśsilnaja

Hałoŭnaje
Usie naviny →

Zaŭvaha:

 

 

 

 

Zakryć Paviedamić