Alaksiej Šydłoŭski. Śviedčańni paciarpiełych

Śviedčańni paciarpiełych

...Demanstranty papaŭźli nazad ad kardonaŭ AMONu, milicyjanty dahaniali ludziej i vychoplivali z natoŭpu, valili na ziamlu. U adkaz palacieŭ hrad kamianioŭ. Što było dalej...

...Specnazaŭcy łavili ludziej, zakidvali ŭ zaštoranyja aŭtobusy...

Mikałaj Hančar: «Ja byŭ unizie, kali pa nas pačali skakać amonaŭcy. Takim čynam ja nie atrymoŭvaŭ udaraŭ abcasami pa śpinie, jak tyja, chto lažaŭ źvierchu, ale zatoje zadychaŭsia ad ściskańnia hrudnoj kletki».

Natalla Makovik z «Maładoha Frontu»: «Pry ŭvachodzie ŭ niejki aŭtobus usie prachodzili «apracoŭku». Staŭlali «na raściažku» dy bili pa nyrkach, piačoncy, pa rebrach, pa hałavie. I tak kožnaha, adnaho za adnym... Što rabili ŭ aŭtobusie, ja nia bačyła, ale stul danosilisia žudasnyja kryki. U adździele aficer, da jakoha mianie pryviali na dopyt, skazaŭ, što choča mianie, choča sa mnoju pieraspać. A ŭ abmien daruje mnie svabodu. Ja skazała, što lepš siadu ŭ turmu».

Supracoŭnicy hazety «Navinki» Naście Niekazanavaj spačatku prapanavali ahalicca i «pakazać fihurku», a kali jana admoviłasia, raźbili łob. Na pahrozy paskardzicca ministru ŭnutranych spravaŭ Sivakovu hučaŭ tolki adzin adkaz: «Nam Sivakov nikto, u nas odin choziain — Łukašienko».

Uładzimier Čarnoŭ vyjšaŭ paśla troch sutak aryštu: “U prachodzie aŭtobusa ŭsich zvalili adnaho na adnaho i navierch zakinuli dźviuch žančynaŭ. U toj samy čas praciahvali bić pa hałovach. Plavali. Sprabavali mačycca. Kali ŭnizie pačali zadychacca, jany pačali kryčać, što vyviezuć usich u les i zakapajuć. Pakul aŭtobus išoŭ, jany prymušali žančyn, jakija płakali, hučna śpiavać: “V travie sidieł kuźniečik”. Skakali na tych, što lažali ŭ prachodzie. Paśla ŭdaru pa hałavie ja na čas straciŭ prytomnaść. Tady mianie vyciahnuli i dvoje łamali ruki, a treci pichaŭ i prakručvaŭ u hłotcy humovuju dubinku».

«Aŭtobusy śmierci» kalasili pa horadzie paŭtary hadziny. Naŭmysna, kab bolej było pakutaŭ.

Kali ŭžo pryjechali, adzin z amonaŭcaŭ staŭ pry vychadzie ź jašče adnaho takoha aŭtobusa dy ŭsich, chto vychodziŭ, biŭ u śpinu dźviuma nahami, pavisajučy na parenčach, ad čaho ludzi vypadali z aŭtobusa tvaram na ziamlu.

Uładzimier Čarnoŭ napisaŭ adkryty list ministru ŭnutranych spravaŭ Juryju Sivakovu. Pad listom pastavili podpisy 60 źbitych.

Staršynia pravaabarončaha centru «Pravavaja dapamoha nasielnictvu» Aleh Voŭčak zajaviŭ, što idzie zbor zajavaŭ ad paciarpiełych, jakija nakiroŭvajucca ŭ prakuraturu. Dziejańni amonaŭcaŭ padpadajuć pad artykuł 167 KK RB «Pieravyšeńnie paŭnamoctvaŭ» (da 10 hadoŭ źniavoleńnia). 11 čałaviek užo napisali takija zajavy. «Jany musiać adkazać pavodle zakonu», — kažuć hetyja ludzi.

20 źbitych źviarnulisia da haradzkoha prakurora Mikałaja Kupryjanava z prośbaj uzbudzić kryminalnyja spravy ŭ dačynieńni da supracoŭnikaŭ AMONu, jakija paśla akcyi ŭžyvali da zatrymanych metady katavańnia.

Alaksiej Šydłoŭski