Naviny za tydzień

 Naviny za tydzień

Viačorkaŭcy pieramahli

23 lutaha Najvyšejšy haspadarčy sud nie zadavoliŭ skarhi “paźniakoŭskaha” KCHP BNF, jaki patrabavaŭ pazbavić “viačorkaŭski” BNF “Adradžeńnie” jahonaje nazvy i skasavać rehistracyju. KCHP budzie abskardžvać hetaje rašeńnie ŭ Najvyšejšym sudzie.

Aryšt Vaŭka

U Varšavie na zapyt biełaruskich uładaŭ u ekstradycyjnuju turmu byŭ źmieščany izrailski pradprymalnik Leanid Voŭk, jakoha biełaruskija ŭłady vinavaciać u niavypłacie padatkaŭ padčas dziejnaści ŭ jakaści dyrektara “Klas-Klubu” ŭ Miensku. Abjadnanaja Hramadzianskaja Partyja zajaviła, što pradprymalnik dapamahaŭ apazycyjnym palitykam, budučy ŭ Biełarusi, i mienavita za heta pieraśledujecca ciapier uładami. AHP zaklikała polskija kampetentnyja orhany nie vydavać sp.Vaŭka ŭ Biełaruś.

Anarchistaŭ u adventysty

Federacyja Anarchistaŭ Biełarusi adznačyła dzień savieckaha vojska masavym spaleńniem pryzyŭnych paśviedčańniaŭ la vajenkamatu na płoščy Svabody i pryniała prysiahu nikoli nie słužyć u vojsku. Nibyta pasłuchaŭšysia ich, u toj samy dzień Hienštab paviedamiŭ pra toje, što prajekt zakonu “Ab alternatyŭnaj słužbie” budzie hatovy ŭžo ŭ sakaviku-krasaviku. Tyčycca jon budzie tolki raniej sudzimych dy viernikaŭ, jakija nia mohuć brać u ruki zbroju z-za relihijnych pierakanańniaŭ (heta treba budzie davieści adpaviednymi paśviedčańniami ad relihijnych hramadaŭ). Asoby z vyšejšaj adukacyjaj buduć “alternatyŭna” słužyć 18 miesiacaŭ, astatnija – 27.

Aleś Kudrycki

spartovy tydzień

Prakoły i skalpy

Eduardu Małafiejevu, jaki ciapier naziraje za pryhodami nacyjanalnaj futbolnaj zbornaj u baŭharskaj Albenie, samy čas bracca za hałavu dy chavacca ŭ bulbu. Try parazy ŭ sparynhach z uzbekami, rumynskim klubam “Faruł” dy baŭharskim “Spartakom” u čarhovy raz adlustravali ŭzrovień biełaruskaha klubnaha futbołu. Miž tym, zirnicie na kalandar dy ŭzhadajcie, što da hulni z Ukrainaj zastałosia krychu bolš za try tydni. Tolki i spadzievu, što na lehijaneraŭ. Vuń, jak Hurenka ŭ hišpanskuju “Sarahosu” pryjšoŭ, dyk ciapier jana naprava dy naleva kuchtali razdaje. Dyj našyja kijeŭskija raźviedčyki Chackievič ź Bialkievičam taksama, vidać, u tyle voraha biaz spravy nie siadziać. Tak što jašče pabačym, chto kaho. A na siońnia – pavodle apošniaha rejtynhu FIFA, my na 96-m miescy, a Ukraina – na 36-m...

A voś u tenisistaŭ ad adnaho podychu dalokaj jašče viasny paprostu kroŭ zakipaje: toje, što Maksim Mirny Mahnusa Normana admiacieliŭ u Marseli, heta jašče chaj sabie, ale voś rasiejca Marata Safina (druhaja rakietka 2000) zavošta zhańbiŭ? Zusim nie pa-bracku atrymałasia. Chacia hetym Maksim na turniry ŭ Raterdamie zadavoliŭsia, u druhim raŭndzie prajhraŭšy švedu Vinsyhueru. Adpomściŭ za družbaka miančuk Vova Vaŭčkoŭ, pakazaŭšy skandynavu ŭ čverćfinale, chto jość kim. Praŭda, u paŭfinale Vovu “zrabiŭ” francuz Eskiude. Nu, dy ničoha – 39 tysiačaŭ “zialonych” za vychad u paŭfinał taksama na darozie nie valajucca.

Bijatlanisty vypravilisia ažno ŭ alimpijski Sołt-Łejk-Syty, na siomy etap Kubku śvietu! Dumajecie, kaho-niebudź ź ich heny kubačak sapraŭdy cikavić? Čorta łysaha! Našyja ŭžo da alimpijady rychtujucca – treba ž razhledziecca tam, što dzie zrezać možna, dzie lišni nabojčyk prychavać... Kab tolki dziadźka Sem za kaŭnier nie złaviŭ, a to nie razumiejuć jany našych žartaŭ...

Bohuś Bijatlanionak