Raman Jakaŭleŭski. Intaresy kapitału

 Intaresy kapitału

Niadaŭnija vizyty ŭ Miensk prezydenta Rasiejskaha Cajuzu Pramysłoŭcaŭ i Pradprymalnikaŭ Arkadzia Volskaha i staršyni Federacyi Niezaležnych Prafsajuzaŭ Rasiei Ŭładzimiera Šmakava byli acenienyja pa-roznamu.

Miarkujučy pa pabłažlivych charaktarystykach, jakija dazvalaŭ sabie Volski ŭ adras biełaruskich uładaŭ, jon asabista hatovy da roznych varyjantaŭ raźvićcia sytuacyi ŭ Biełarusi. Pa słovach Volskaha, rana ci pozna i ŭ Biełarusi źjaviacca svaje aliharchi (jon nazyvaŭ ich mahnatami). U jakaści prykładu jon padaŭ Kitaj, dzie, pavodle aficyjnych źviestak, užo ciapier — 27 aliharchaŭ. I heta pry kiraŭničaj roli Kamunistyčnaj partyi. Viadoma, takija nastroi maskoŭskaha hościa ŭzradavać aficyjny Miensk nie mahli. Łukašenka razumieje, što kali lepšyja biełaruskija pramysłovyja abjekty apynucca ŭ rukach žorstkich aliharchaŭ, dyk jahonamu samaŭładździu pryjdzie kaniec. Miarkujučy pa mnohich prykmietach, niepakoj z nahody raznastajnych suviaziaŭ rasiejskaha kapitału z patencyjnymi kandydatami ŭ prezydenty Biełarusi ŭ Łukašenki zastajecca.

Niečakanaja dla mnohich palityčnaja aktyŭnaść, jakuju staŭ vykazvać eks-kiraŭnik prezydenckaj administracyi Leanid Sinicyn, azadačyła namenklaturu. Svojeasablivym noŭ-haŭ Sinicyna stała nahadvańnie im pra artykuł Kanstytucyi, jaki praduhledžvaje pieradaču ŭłady kiraŭniku ŭradu na čas praviadzieńnia pieradvybarčaj kampanii, kali kiraŭnik dziaržavy rehistrujecca ŭ jakaści kandydata. Adkinutaja referendumam Kanstytucyja 1994 hodu takoj normy nia mieła. Darečy, anijakich abmiežavańniaŭ adnosna premjer-ministra biełaruskija zakony nie praduhledžvajuć. Majecca na ŭvazie patrabavańnie naradzicca i 10 apošnich hod žyć u Biełarusi. Tak što na hipatetyčny pierachodny peryjad, da abrańnia novaha prezidenta, całkam lehitymnym kiraŭnikom krainy moža być i premjer-ministar.

U biełaruskim vektary rasiejskaj palityki zaŭvažna stała prajaŭlacca ŭvaha da prafsajuznaha ruchu, u pryvatnaści, da Federacyi Prafsajuzaŭ Biełarusi. Prajavaj adkrytaj salidarnaści z FPB staŭ vizyt u Miensk staršyni FNPR U.Šmakava.

U svaim apošnim pasłańni svajmu parlamentu, začytanym A.Łukašenkam u nižniaj pałacie 10 krasavika, praktyčna nia ŭzhadvałasia Rasieja. Hety fakt byŭ adznačany mnohimi naziralnikami. Jak i słovy ab idealahičnych dyversijach nia tolki z boku zachodnich, ale j niekatorych rasiejskich ŚMI. Vidavočna, što robiacca sproby nahniatańnia atmasfery asadžanaj krepaści. Tak praściej kiravać i kantralavać svaich vasałaŭ. Ale pry hetym jak by nie zaŭvažajucca realii. A jany zaklučajucca ŭ tym, što pucinskaje kiraŭnictva abviaściła palityku pryjarytetu svaich nacyjanalnych intaresaŭ adnosna ŭsich biez vyklučeńnia krainaŭ śvietu. A siońnia hetyja nacyjanalnyja intaresy supadajuć ź intaresami bujnoha rasiejskaha kapitału. Ź jahonaj dapamohaj Kreml damahajecca zavajovy ekanamičnych vaharoŭ svajho ŭpłyvu. Biełaruski vektar palityki napaŭniajecca mienavita takim źmiestam. Na dumku ekspertaŭ, usie papulisckija zaklinańni A.Łukašenki ab tym, što jon nie dapuścić žadanaj dla rasiejcaŭ pryvatyzacyi, biesperspektyŭnyja. Jak i stvoranaja im systema ŭłady.

Raman Jakaŭleŭski