Biełaruś praz 100 hadoŭ

Biełaruś praz 100 hadoŭ

Technakratyčnaja (anty)ŭtopija

a pačatku XXII st. dzieviać dziasiatych žycharoŭ Biełarusi buduć žyć u haradach. Stalicaj zastaniecca Miensk, jaki budzie azdobleny chmaračosami j razraściecca da pamieraŭ siońniašniaha Mienskaha rajonu. Vioski pabujniejuć, nabuduć vyhlad sučasnych rajcentraŭ. Paŭsiudna lahuć dobryja darohi.

Na siońniašni pohlad, biełarusy praz 100 hadoŭ buduć zamožnymi ludźmi. Charčavańnie zrobicca bolš tannym i raznastajnym. Vyrašycca j prablema žytła — dziakujučy technalohijam tannaha budaŭnictva. Choć pra niejkuju sacyjalnuju roŭnaść havorka nie idzie. Palaryzacyja hramadztva staniecca jašče vyraźniejšaja, čym siońnia, adnak nie pa palityčnych abo materyjalnych kryterach. Pieravahu buduć mieć zdolnyja, tvorčyja ludzi. Bahaćcie nabudzie intelektualny ekvivalent. Dyj najaŭnyja hrošy amal całkam źmieniacca na virtualnyja — jakija-niebudź «umoŭnyja adzinki».

Biełaruś zastaniecca ŭ siońniašnich miežach, ale niezaležnaści nie zachavaje. Ekanamična jana źviaža svoj los z Kitajem, jaki pašyryć upłyŭ na Zachad. Paŭstanuć šmatlikija kitajska-biełaruskija firmy, u biełaruskich haradach źjaviacca kitajskija kvartały.

U Biełarusi ŭstalujecca technakratyčnaja ŭłada, dosyć aŭtarytarnaja — prynamsi, biez usienarodnych referendumaŭ. Adnak uździejničać na masy jana budzie chutčej praz chitryki, čym praz prymus. Śmiarotnaje pakarańnie zastaniecca dla zabojcaŭ. A apantanym dysydentam-intelihientam ułady, mabyć, prapanujuć uziać ziamielnyja nadzieły i budavać tam ułasnyja ŭtopii.

Movaj dla ahulnaha karystańnia budzie biełaruskaja. Jaje słoŭny zapas istotna pavialičycca za košt polskich, anhielskich, kitajskich słovaŭ. Na rasiejskamoŭnych praz 100 hadoŭ u Biełarusi buduć hladzieć tak, jak siońnia hladziać na biełaruskamoŭnych.

U relihijnaj sfery zapanujuć novyja kulty. Abjektami ŭšanavańnia stanucca enerhija dy infarmacyja. Adnak etyčnyja normy zastanucca chryścijanska-humanistyčnymi. Cerkvy ž, najchutčej, abjadnajucca ci buduć suisnavać cicha-mirna: aby choć jakija vierniki prychodzili. Bo volny čas staniecca deficytam: pracavać ludziam daviadziecca bolej, čym ciapier — zbolšaha, u sfery pasłuh. Praŭda, i čałaviečaje žyćcio padoŭžycca. U XXI st. medyki i navukoŭcy vynajduć srodki suprać ŚNIDu, puchlinaŭ, radyjacyjnaha zabrudžańnia. Tak što našyja naščadki buduć zdaraviejšymi za nas. A voś ci bolš ščaślivymi — nieviadoma. Zastanucca i zajzdraść, i chcivaść.

Źmienšycca absiah žyvoj pryrody: lasy pavysiakajuć, źniknuć šmat jakija reki i aziory. Adno što zastanucca zapaviedniki: pa dva-try na vobłaść. Adnak, niahledziačy na dobryja darohi, jeździć tudy haradzkija žychary buduć niačasta, bo i doma kłopataŭ chopić. Dyj zabavaŭ taksama. Industryja zabavaŭ budzie adnoj z najbujniejšych. Teatry zastanucca, ale, pa sutnaści, nabliziacca da siońniašniaha cyrku. Vobrazy z historyi Biełarusi znojduć adlustravańnie ŭ industryi vidoviščaŭ, ale naš čas — naŭrad ci. Jon budzie padavacca zanadta mituślivym dy markotnym. Pra Łukašenku, BNF, kamunistaŭ buduć viedać chiba dzivaki-specyjalisty. Ludzi 2101 h. skirujuć svaje vysiłki najpierš u budučyniu, a nie na zachavańnie pamiaci pra minułaje.

Lupus Est

Novy prajekt “Našaje Nivy”

2101 hod. Jakoj budzie Biełaruś praz 100 hadoŭ? Jakoj budzie dziaržava i jaki dziaržaŭny ład? Jakimi buduć harady? Jaki horad budzie stalicaj Biełarusi? Jakimi miežy krainy? Što biełarusy buduć jeści? Jakimi buduć biełaruskija hrošy? Jakim transpart? Jakimi srodki masavaj infarmacyi? Jakaja litaratura budzie čytacca? Ci zastanucca teatry? Jakija imiony buduć samymi papularnymi? Jakimi stanuć lasy i reki? Ci možna budzie kupacca ŭ zabrudžanych siońnia aziorach? Jakija źviary źniknuć, jakija novyja raśliny zaviaducca? Što budzie z čarnobylskaj zonaj? U jakich cerkvach buduć malicca ludzi? Što jany viedaćmuć pra 2001 hod? Što budzie z nami?

Pačynajučy z 25 sakavika štotydnia — mary i fantazii pra budučyniu Viečnaj Biełarusi, ese, prahnozy i futuralahičnyja artykuły ŭ novaj rubrycy “NN” — “Biełaruś praz 100 hadoŭ”. Z hetaha vyjdzie cełaja kniha! Čakajem Vašych dopisaŭ. Budziem zahadvać.