Urad, što prymie himn
Premjer Navicki pa ŭsich prykmietach vyhladaŭ novym Čyhirom. Tamu nichto ad jaho ničoha asablivaha nie čakaŭ, a abiacańniam budučaha “achviarnaha kazła” nia vieryŭ. Ad uradu ŭ prezydenckaj RB nie zaležyć sapraŭdy ničoha. Zatoje Navicki ŭsprymaŭsia jak taki sabie retranślatar dumak i nastrojaŭ Administracyi prezydenta, jakija z tych ci inšych pryčynaŭ nie vypadaje abviaščać adkryta. I tamu dabradušny premjer abudžaŭ peŭnyja spadziavańni apazycyi, źniavieranaj va ŭłasnaj zdatnaści siłaj źmianić palityku ŭ krainie.
Čym adznačylisia pieršyja sto dzion uradu? Rost inflacyi ŭdvaja i vyklikanaje hetym ažyŭleńnie vytvorčaści pry kancy depresiŭnaha hodu. Masavyja aryšty karumpavanych menedžeraŭ. Vyzvaleńnie zakupačnych cenaŭ na sielhaspradukcyju. Pryniaćcie planaŭ biełarusizacyi pracy rajonnych adździełaŭ adukacyi. Praciah cichaha sabatažu sajuznaha biudžetu. Bolš demakratyčnyja, čym u minułyja hady, śpisy naminantaŭ na atrymańnie dziaržaŭnych premijaŭ. I chto budzie hladzieć, što bolšaść hetych rašeńniaŭ nie pryniatyja ŭradavaj kamandaj, a spuščanyja zahadami Łatypava?
U apošnija miesiacy ŭłady pačali zvažać na krytyku z boku hramadztva. Vice-premjer Kabiakoŭ napałochaŭ usich pieravodam płaciažoŭ, bolšych za 200 dalaraŭ, na bieznajaŭny raźlik, ale z-za ahniu krytyki rašeńnie adkłali. Paviali kalcavuju ŭ Kurapaty, ale musili de-fakta pastavić budaŭnictva pad hramadzki kantrol. “Hołas dušy” začynili, ale ŭžo niama sumnievaŭ, što adčyniać nanoŭ, varta jašče trochi ciskanuć. Adčuvajučy takija pavievy, handlovaja buržuazija paviała ataku na Ministerstva handlu, jakoje pryniało rašeńnie ab faktyčnaj manapalizacyi prodažu cyharetaŭ. Kapitalisty raźličvajuć, što ŭrad sastupić navat u sfery, u jakoj dziaržava farmalna maje prava na manapoliju.
Lakmusavaj papierkaj tendencyj dalejšaha supracoŭnictva ŭradu z hramadztvam stanie pryniaćcie himnu RB. Słova Ivana Karendy ŭ vybary słovaŭ himnu budzie važyć bolš za pazycyju ŭradu, ale farmalna rašeńnie prymajecca ŭsio ž kamisijaj pry Ministerstvie kultury. A značyć, kali abtrasiecca tytuniovy i inšy pył, urad Navickaha zastaniecca ŭ pamiaci jak urad, pry jakim byŭ pryniaty himn RB.
Barys Tumar
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary