Kalonka Alesia Bialackaha

kalonka Alesia Bialackaha

Niefarmały

Niezarehistravanaja Asambleja niaŭradavych demakratyčnych arhanizacyjaŭ sabrała za “kruhłym stałom” pravaabaroncaŭ i pradstaŭnikoŭ niaŭradavych arhanizacyjaŭ, jakija paciarpieli ad uładaŭ. Abmiarkoŭvali, jak razam abaraniacca ŭ vypadku nieabhruntavanych represijaŭ z boku dziaržavy, dzialilisia dośviedam.

Redaktar kryčaŭskaj hazety “Volny horad” Siarhiej Niaroŭny raspaviadaŭ, jak jany padpirali dźviery kvatery, dzie mieściłasia redakcyja, doškaj-sarakoŭkaj i žaleznaj batarejaj, kali z vulicy milicyjanty łupili łomikami ŭ dźviery, tłumačačy, što chočuć spraŭdzić numary kamputarnaj techniki — ci nia skradzienaja.

Staršynia homielskich “Hramadzianskich inicyjatyvaŭ” Viktar Karnijenka, u jakoha zaraz praz sud kanfiskujuć kamputarnuju techniku, raskazvaŭ pra toje, jak tłumačyŭ sudździ, što takoje kamputarnaja dyskieta, pakazvaŭ jaje, raspaviadaŭ, jak na joj možna pieranosić infarmacyju. Sudździa niedavierliva chitała hałavoj. Usio pakazvaje na toje, što ŭłada pabahacieje na šeść kamputaraŭ, jakija naležali “Hramadzianskaj inicyjatyvie”. Padličyć by tolki raschody hebistaŭ, padatkovaj inspekcyi, śledčych i sudu na hetuju “apieracyju” — mabyć, možna było b kupić usie dvaccać šeść.

Zadzinočańnie biełaruskich studentaŭ Miniust zakryŭ za toje, što studenty niapravilna praviali źjezd u 95-m, choć sam ža pierarehistravaŭ ich u 99-m. A jašče za toje, što na dźviarach ofisu była nalepka ź litarami ZBS, a nie RHA ZBS. Navat prakuror na sudzie prasiŭ nie zakryvać ich “za małaznačnaściu” — dzie ž tabie, zakryli.

Zamiežniki, kali im pra heta raskazvaješ, nia vierać, śmiajucca: maŭlaŭ, nia moža być, kab dziaržava svaich hramadzianaŭ tak dušyła.

U Voršy, raspaviadaŭ Viktar Andrejeŭ, staršynia niezarehistravanaha Centru Fiłona Kmity, vielizarnyja prablemy z rehistracyjaj. Pavodle zakonu, kab zarehistravacca, arhanizacyja musić mieć jurydyčny adras u niežyllovym fondzie, a pa pradpryjemstvach viertykal dała niehałosny zahad — “nienadziejnym” nie davać. I hetak nia tolki ŭ Voršy, a pa ŭsioj Biełarusi.

A Miniust užo paŭhodu nie rehistruje ŭvohule nijakich arhanizacyjaŭ. Kamisija pa rehistracyi hramadzkich abjadnańniaŭ, jakuju ačolvaŭ byŭ Zamiatalin, ź leta nie pracuje. To i rehistracyi niama…

Udzielniki “kruhłaha stała” pryniali zvarot da Miniustu z zaklikam adnavić rehistracyju, bo niezarehistravanaja dziejnaść jahonymi ž zakonami i zabaronienaja. Hetaksama pastanavili stvaryć rabočuju hrupu ź jurystaŭ, jakija buduć dapamahać hramadzkim arhanizacyjam, što zaznali dziaržaŭny ŭcisk.

Ułada adbivaje ŭ niaŭradavych arhanizacyjaŭ žadańnie rehistravacca. Značnaja ich častka pracuje i tak. Voś “Zubr” niadaŭna adznačyŭ svaju pieršuju hadavinu. Chutka “niefarmałaŭ”, vidać, zrobicca bolš, čym zarehistravanych inicyjatyvaŭ.

Aleś Bialacki