Naviny
Varšaŭskaja damova-2
Damova ab kalektyŭnaj biaśpiecy moža nabyć status mižnarodnaj arhanizacyi, kštałtu kolišniaj Varšaŭskaj damovy. Dniami ŭ Maskvie miždziaržaŭnaja Rada krain-udzielnic hetaha paktu vyrašyła stvaryć adziny štab arhanizacyi na bazie rasiejskaha hienštabu i pastaŭlać krainam-čalcam zbroju pa ŭnutryrasiejskich cenach. Kažuć, što Pucin hetak puskaje pył u vočy praciŭnikam zbližeńnia z NATO ŭ kantekście rasiejska-nataŭskaj sustrečy ŭ Rejkjaviku. Paśla jaje, moža stacca, Rasieja budzie brać udzieł u prahramach Paŭnočnaatlantyčnaha aljansu.
Zamiežniki padtrymajuć “Pahoniu”
Pradstaŭniki ambasadaŭ Vialikaj Brytanii, ZŠA, Niamieččyny i Polščy pahadzilisia prysutničać na sudzie nad Mikołam Markievičam i Paŭłam Mažejkam. Mahčyma, pryjeduć taksama pradstaŭniki pasolstvaŭ Čechii, Litvy, Łatvii, Ukrainy i Rasiei. Praces nad žurnalistami “Pahoni” musić pačacca 16 traŭnia ŭ sudzie Leninskaha rajonu Horadni.
Noč biełaruskaha ściaha
U noč z 13 na 14 traŭnia maładafrontaŭcy vyviesili na vulicach troch dziasiatkaŭ biełaruskich haradoŭ bieł-čyrvona-biełyja ściahi. Hetkim čynam jany zaviaršyli kampaniju “Biełaruś — u Eŭropu” i adznačyli dzień Łukašenkavaha hierba i ściaha. U Miensku ściahi źjavilisia na skryžavańni pr.Skaryny i vuł. Kazłova, na budynku radyjotechničnaha kaledžu, u žyłych rajonach “Viaśnianka” i “Sierabranka”, na Partyzanskim praspekcie i nasuprać pryjomnika-raźmierkavalnika pa vuł.Umanskaj. U Biarozie bieł-čyrvona-biełyja ściažki vyviesili na kožnym słupie hałoŭnaj vulicy.
B.T.
Naviny haspadarskija
ENERHABLOK na miljon kilavat-hadzinaŭ maje zbudavać Biełaruś na adnoj z rasiejskich AES — Smalenskaj, Kurskaj ci Kalininskaj. Kaštavać enerhablok budzie 900 miljonaŭ dalaraŭ. Prychilniki prajektu va ŭradzie kažuć, što inšaha varyjantu niama, bo da 2005 h. biełaruskija elektrastancyi vypracujuć svaje rezervy na 80%.
BIUDŽET PRAŽYĆCIOVAHA MINIMUMU vyznačyła Ministerstva pracy. Ciapier jon składaje dla pracazdolnych hramadzianaŭ 79803, dla pensijaneraŭ — 62468, dla studentaŭ — 77894, dla dziaciej da 3 hadoŭ — 63755, dla dziaciej ad 3 da 16 hadoŭ — 86224, u siarednim — 74444 rubli ŭ miesiac.
PADATAK NA ZIAMLU da vosieni padvysicca ŭ 4 razy. Pakul za sotku ŭ siarednim treba płacić 127 rubloŭ. U bujnych haradach ziamla daražejšaja: u Viciebsku sotka “kaštuje” 455, u Mahilovie — 510, u Bieraści — 781, u Homieli — 827, u Horadni — 983, u Miensku — 2431 rubiel.
ZAČYNIAĆ MAŁYJA ŠKOŁY ŭ vioskach pačnuć u časie letnich kanikułaŭ. Ministar adukacyi Piatro Bryhadzin kaža, što dziaciej z rasfarmavanych “małakamplektovak” buduć vazić u bujniejšyja vioski.
BOLŠAŚĆ DZICIAČYCH SADKOŬ buduć pracavać nie da 19-j, jak ciapier, a da 17.30. Razam z pracoŭnym dniom u sadkach “skarociać” viačeru. Ministerstva adukacyi tłumačyć heta niedachopam srodkaŭ: baćki apłačvajuć tolki 60% ad sabiekoštu vydatkaŭ na dziaciej u daškolnych ustanovach.
ZNOSIĆ PRYVATNUJU ZABUDOVU ŭzdoŭž vulicaŭ Bahdanoviča i Biady vyrašyli ŭ Mienharvykankamie. Tut za 10 hadoŭ chočuć pastavić elitnyja šmatpaviarchoviki z koštam kvateraŭ 600-700 dalaraŭ za metar i katedžy. Źlikvidujuć taksama haražny kompleks “Tyražnaja”, na miescy jakoha zbudujuć novuju škołu.
NA 16% MIENIEJ LEKAŬ vyrabili biełaruskija pradpryjemstvy za studzień-sakavik u paraŭnańni z adpaviednym peryjadam minułaha hodu. Farmaceŭty kažuć, što ciapier jany nia mohuć kupić dosyć syraviny, bo handal nie viarnuŭ hrošaj jašče za minuły hod.
MILJON I 155 TYSIAČAŬ EŬRA daŭ Eŭraźviaz na demarkacyju biełaruska-litoŭskaj miažy. Biełaruskaje AAT “Mienskvodbud” musić skončyć pracu da 31 žniŭnia. Paśla Eŭraźviaz abiacaje vydatkavać jašče 2,2 młn. eŭra na demarkacyju biełaruska-łatvijskaj miažy.
ADZINY 10-PRACENTNY PADATAK maje ŭvieści ŭrad dla małoha biźniesu. Datyčycca padatak budzie kamercyjnych arhanizacyjaŭ, u jakich nia bolej za 20 pracaŭnikoŭ i hrašovy zvarot da 40 tys. eŭra ŭ kvartał.
600 MŁN. DALARAŬ byli vinavatyja biełaruskija pradpryjemstvy rasiejskim na pačatku viasny. Najbolšyja zapazyčanaści mieli enerhietyki (blizu 280 młn.) i pramysłoŭcy (110 młn). Rasiejskija pradpryjemstvy byli vinavatyja biełaruskim utraja mieniej — kala 200 młn. dalaraŭ.
S.I.
Kamientary