31 lipienia Ŭładzimier Pucin uznaharodziŭ mitrapalita Fiłareta ordenam «Za zasłuhi pierad Ajčynaj» IV stupieni. Mitrapalit padziakavaŭ prezydentu Rasiei «za vysokuju ŭvahu» i vymaviŭ zahadkavuju frazu: «Słužu Ajčynie i sajuznaj dziaržavie Rasiei i Biełarusi!» — «Ja chaču vam vykazać ščyruju ŭdziačnaść za vašaje słužeńnie i Bohu», — dadaŭ Pucin. Vyhladała heta dosyć kamična. Na hetym epizodzie saroŭskich uračystaściaŭ spynili ŭvahu rasiejskija telekanały. Pavodle źviestak «NN», rasiejskija ŭłady razhladajuć mitrapalita Mienskaha i Słuckaha jak mahčymaha nastupnika patryjarcha Alaksija. Kožnaje abvastreńnie chvarobaŭ Jahonaha Śviaciejšastva vyklikaje novuju chvalu čutak pra baraćbu za carkoŭnuju ŭładu.
Mitrapalit Fiłaret (Kirył Vachramiejeŭ) naradziŭsia 21 sakavika 1935 h. u Maskvie. Vachramiejevy — znakamity kupiecki rod ź Jarasłaŭla, dvaranie z 1913 h. Fiłaret atrymaŭ vyšejšuju duchoŭnuju aśvietu ŭ Maskvie. Vosiem hadoŭ jon uznačalvaŭ Adździeł zamiežnych carkoŭnych znosinaŭ (faktyčna ministerstva zamiežnych spravaŭ carkvy) i patryjaršy ekzarchat Zachodniaj Eŭropy. Ź Biełarusiaj los źviazaŭ jaho ŭ 1978 h., kali Fiłaret byŭ pryznačany mitrapalitam Mienskim i Biełaruskim. U 1989 h. byŭ stvorany Biełaruski ekzarchat RPC, a Fiłaret staŭ patryjaršym ekzarcham usiaje Biełarusi. Čałaviek daloki ad biełaruskich nacyjanalnych ideałaŭ i tradycyj, jon pradvyznačyŭ rusifikavany stan biełaruskaje carkvy ŭ nastupnym dziesiacihodździ. Biełaruskaja carkva nie nabyła samastojnaści, ale paźbiehła raskołaŭ. Łukašenkava administracyja zrabiła staŭku na pravasłaŭnuju carkvu, ale koštam prynižeńnia jaje duchoŭnaha aŭtarytetu. «Nastavili stolki cerkvaŭ, što ŭžo specyjalistaŭ na ich nie staje», — hetaja fraza biełaruskaha lidera dahetul smylić biełaruskim japiskapam.
Poŭny varyjant artykułu čytajcie ŭ hazece "NN".
Ciapier čytajuć
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary