Test hodu. Pralnyja paraški

Jakija pralnyja paraški nabyvać? Ci praparcyjna zaležyć cana paraškoŭ ad jakaści? Ci vieryć reklamie? Kipiacić — nie kipiacić? Čytačy «NN» atrymajuć najbolš poŭny, zasnavany na praktyčnym vyprabavańni adkaz. Dumka naładzić paraŭnalny test pralnych paraškoŭ naviedała mianie paśla nabyćcia prystojnaj pralnaj mašyny. Pieršyja tydni prałka kruciła dzień i noč: pa-pieršaje, majem małoje dziciatka, pa-druhoje, haspadyńcy majoj na radaściach zachaciełasia pieramyć usie rečy ŭ domie, ažno da miakkich cacak i koŭdraŭ.

Paśla vežkańnia z małahabarytnaj «Maraj» mała jakaja žančynka nie zazichcić ad ščaścia, pabačyŭšy, jak spraŭna piare, pałošča dy sušyć jaki-niebudź mocny j razumny «šved» abo «niemiec» (a dla patryjotaŭ va ŭsim — miančuk atlantaŭskaha ciełaskładu).

Paraški ja kuplaŭ kardonnymi pačkami: cana ŭ pieravodzie na rubli za hram pamiž małym pačkam i ekanom-torbaj roźnicca, ale chaciełasia pasprabavać jak maha bolš usiaho, kab mieć ułasnaje ŭjaŭleńnie. Štości raili pradavački, pra štości dobra adhukałasia ciešča, štości vabiła canoju, a dzieści j reklama spracavała.

Siem aŭtamataŭ

Pieršymi ŭ moj čorny śpis trapili supertannyja rasiejskija «Raduha» j «Sorti». Jany nie admyvali navat śladoŭ ad kašak i kakašak ź dziciačych rečaŭ. Z hetaj pryčyny «Zifa», «Piemos», «Dieni» dy proćma inšych rasiejskich narodnych marak pa 800—900 rub. za paŭkili ŭ moj test nie patrapili. A patrapiła voś što (u alfabetnym paradku):

1. «Ariel», «Procter & Gamble», AK «Novamaskoŭskbytchim», Rasieja;

2. «Bingo», «Hayat chemical industry Inc. Co.», Turcyja;

3. «Bija», UP «Barchim», Biełaruś;

4. «Dosia», «Reckitt Benckiser (Poland) S.A.», Polšča;

5. «E», «PZ Cussons Polska S.A.», Polšča;

6. «Persil», TAA «Chienkiel Užhorod», Ukraina;

7. «Tide», «Procter & Gamble», AK «Novamaskoŭskbytchim», Rasieja.

«Ariel» i «Tide» pradavački nazyvali samymi chadavymi. U piaciorku chadavych, ź ich słovaŭ, trapili taksama «Dosia», «E» i «Bingo». Pieršyja čatyry marki istotna dastali telehledačoŭ z błakitnych ekranaŭ — voś ich i kuplajuć. A «Bingo», reklamy jakoha ja nie sustrakaŭ, vabić canoju.

Dziela spraviadlivaści j lubovi da radzimy daviałosia ŭklučyć u test baranavicki «Bija-aŭtamat» (usie testavanyja paraški pryznačanyja dla aŭtamatyčnych pralnych mašyn; jany adroźnivajucca ad paraškoŭ dla ručnoha prańnia abmiežavanym pienaŭtvareńniem i na 10—15% daražejšyja). Nu, i na kateharyčnaje śćvierdžańnie siabruka, jaki kaža, što ŭžo piać hadoŭ kuplaje tolki «Persil», nabyŭ ja j pačak «Persylu».

Kab chto dapamoh hrašyma, možna było b razmachnucca j vyprabavać jašče sioje-toje: «Omo», «Ixi», «Bonux», «Vizir», «Lanza», ale firmy, jakija vyrablajuć hetyja paraški, pradstaŭlenyja ŭ našym teście.

Voźmiem kalkulatar i vyznačym, što z testavanaha kolki kaštuje na vahu. Zakupy (akramia «Bija») rabilisia ŭ handlovym centry «Impuls», što la Kamaroŭki ŭ Miensku (u kramach zvyčajna pracentaŭ na 10 daražej), ceny na 23 listapada. Biudžetny rejtynh — u tablicy sprava.

Kali z canoju na vahu razabracca lohka z dapamohaju kalkulatara, dyk z normaj pradukcyjnaści ciažej i biaz vahaŭ nie abyścisia: adny vytvorcy paznačajuć pradukcyjnaść u mililitrach, druhija — u hramach. Paśla doŭhich pieramieraŭ ja pryjšoŭ da vysnovy, što pradukcyjnaść usich paraškoŭ roŭnaja 100 h na 4—5 kh siaredniabrudnaj bializny (poŭnaja zahruzka prałki). A nadpisy na pačkach — sproby zabłytać spažyŭca, kab jon bolej sypaŭ i, adpaviedna, čaściej kuplaŭ. Zvyčajnaja haspadynia nia budzie šukać aptekarskich vahaŭ, pierš čym pačać prać, tamu dla testu ja vyrašyŭ kiravacca abjomnym admieram i adsypaŭ, skarystaŭšy mierku dla dziciačaha charčavańnia, roŭna pa 50 mł ad kožnaha z paraškoŭ.

Sam praces

Ja dastaŭ z šafy svaju staruju, kaliści biełuju, syntetyčnuju futbołku i, kaŭtajučy ślozy, parezaŭ. Žonka tym časam rezała śniežnuju bavaŭnianuju praścinu. Siem kavałačkaŭ bavaŭnianaj tkaniny pamieram 10 na 13 sm byli paparna sšytyja ź siamiu takoha ž pamieru kavałačkami tkaniny z poliakryłavych nitak (PAN) i padpisanyja numarami, kab nie pabłytać.

Samy cikavy i miescami apetytny praces — uzornaje zabrudžvańnie. Było ŭziata adzinaccać vidaŭ zabrudžvalnikaŭ: buračny sok, kava (raspuščalnaja), śviny tłušč (smažyli skvarki), harbata, alej, parečkavaje vino, sojevy soŭs, šarykavaja asadka, čakalada, vadastojki markier i krem dla abutku. Paśladoŭna, pasami ŭpopierak anučak, raŭnamierna paŭz naturalnuju i štučnuju tkaninu, zabrudžvalniki byli naniesienyja, akramia asadki j flamastera, tonkim pendźlikam.

Prahrama prańnia była abranaja prostaja: zahruzka — 1/4, praciahłaść — 60 chv., temperatura — 60oS, pałaskańnie, adciskańnie.

Što i jak aceńvałasia

1. Efektyŭnaść myćcia aceńvałasia pa čatyrochbalnaj škale: 1 bał — amal nie admyłasia, 2 bały — admyłasia słabavata, 3 bały — admyłasia zdavalniajuča, 4 bały — admyłasia całkam.

2. Adbielvańnie. Pa dvuchbalnaj systemie acieńvałasia stupień biełaści papranych z roznymi paraškami anučak: 1 — dobra biełaje, 2 — vydatna biełaje.

3. Pachkaść. Pa trochbalnaj škale była vyznačanaja intensiŭnaść pachu roznych paraškoŭ. Kamuści padabajecca, kab papranyja rečy pachli mocna, chtości pakutuje na alerhiju, tamu niachaj čytačy sami vyznačajuć, što lepš: 1 bał — nievyrazny pach, 2 — pachnie ładna, 3 — pachnie mocna. Parfumernyja kampazycyi roznyja vytvorcy vykarystoŭvajuć duža padobnyja: usio ŭ cytrusavych, jabłyčnych i śviežatraŭnych matyvach. Chiba što ŭ «Aryelu» pach «madniejšy» j paznavalny.

Vyniki testu źviedzienyja ŭ rejtynh jakaści (tabł. unizie).

Takim čynam

Samyja darahija paraški nia vartyja svajoj cany. Bo, pavodle zdolnaści admyvać, miescami sastupajuć niedarahim. A varyjant «siaredziny», kali pakupnik biare nia samaje darahoje, ale j nia samaje tannaje, racyjny adno ŭ vypadku z tureckim «Bingo».

Braty-palaki vyrablajuć niešta-niejkaje; ažno niajomka za NATO z hetaj nahody. Zrešty, hvałtam kuplać «Dosiu» i «E» nichto nie prymušaje; tavar raźličany na tych, chto, abirajučy koštavuju siaredzinu, ekanomić nieradykalna. «Dosia», da taho ž, davoli mocna pachnie, a na «E» napisana: 10% biaspłatna. Chłuśnia, a pryjemna.

Supertanny ajčynny parašok «Bija» daŭ rady tłušču i aleju lepš za ŭsich astatnich (vidać, raspracavany byŭ z ulikam tradycyjnaha racyjonu biełarusaŭ), a chvalony «Tide Fairy effect» pa hetym parametry vyhladaje najhorš.

Darečy, biełarusy akazalisia sprytnymi jašče ŭ adnym aspekcie: bačyŭ u kramach biełaruski parašok «Vindo» z dyzajnam upakoŭki, całkam stylizavanym pad turecki «Bingo». A zamiest «Calgon» tyja, chto vieryć u cud vyratavańnia nahravalnych elementaŭ, moža sypać u prałku ŭtraja tańniejšy haradzienski «Algon» (biez akularaŭ pačak «Kałhonu» ad pačku «Ałhonu» nie adroźniš).

Pavialičyć

Małaviadomy ŭ nas «Bingo», udvaja tańniejšy za «Ariel», lepiej za słavutaha kankurenta admyvaje tłušč, a sastupaje jamu ŭ vymyvańni tolki tych zabrudžvalnikaŭ, źniščyć jakija biez kipiačeńnia ci admysłovych chimičnych srodkaŭ usio adno niama jak — šarykavaj asadki, markiera i abutkovaha kremu.

Turki, padzialiŭšy z rasiejcami pieršaje miesca ŭ rejtynhu jakaści, ź nievierahodnym adryvam vyjhrajuć u biudžetnym rejtynhu, a značyć, stanoviacca liderami našaha testu.

Pradukcyja tureckaha kancernu «Hayat» (akramia «Bingo», heta tavary pad markami «Test», «Molfix», «Molped»), pavodle dadzienych ź Internetu, zajmaje 8,5% rasiejskaha rynku myjnych i hihijeničnych srodkaŭ. Na žal, statystyčnych źviestak pa inšych krainach znajści nie ŭdałosia, ale «Hayat» maje zbyt i ŭ krainach Uschodniaj Eŭropy, i ŭ Niamieččynie. Tak što ich małaviadomaść u nas možna patłumačyć ekanomijaj na reklamie.

Test paćviardžaje: pa-pieršaje, nia vier reklamie, pakul sam nie pierakanaješsia ŭ jakaści praduktu; pa-druhoje, nia ŭsio darahoje — jakasnaje; i, pa-treciaje, siarod raznastajnaje rynkavaje prapanovy zaŭsiody znojdziecca nieprykmietnaja «ciomnaja kabyłka», pastaviŭšy na jakuju, atrymaješ vyjhryš u siamiejnym biudžecie.

Trochkilahramovy pačak «Bingo» za 8500 rub. — moj vybar i maja staŭka da nastupnaha vyprabavańnia.

Sustreniemsia praz hod!

Vadzim Karcaŭ

• 0
• 0
• 0
• 0
• 0
• 0
• 0
• 0