2 červienia Ministerstva suviazi i infarmacyi admoviła UP «Marat» («BDH») i TAA «Vydaviecki dom «Inteks-pres», što zajmajucca raspaŭsiudam niezaležnych vydańniaŭ, u pravie pravodzić padpisku na svaje vydańni i ich dastaŭku z pryčyny adsutnaści «techničnaj bazy, jakaja b dazvalała ažyćciaŭlać dastaŭku na terytoryi h.Baranavičy, Pinsk, Lachavičy, Hancavičy, Niaśviž drukavanych vydańniaŭ u dzień ich vychadu». List z admovaj padpisała namieśnik ministra N.Haŭryłava. Pradstaŭniki «Maratu» i «Inteks-presu» majuć namier abskardžvać rašeńnie ŭ sudzie.
3 červienia UŽREP Leninskaha rajonu Horadni źviarnułasia ŭ Haspadarčy sud z pazovam, u jakim patrabuje vysielić z zajmanych pamiaškańniaŭ haradzkuju arhanizacyju TBM i hramadzkuju arhanizacyju «Baćkaŭščyna». Za što? Bo zhadanyja arhanizacyi dazvolili raźmiaścić u arandavanym pamiaškańni ofis niezaležnaj hazety «Dień».
9 červienia ŭ Białyničach padčas sustrečy ź miascovymi žycharami zatrymali kiraŭnikoŭ mahiloŭskaj «Piaciorki+» Ryhora Kostusieva (BNF), Uładzimiera Šancava (AHP), Halinu Lisicynu (Partyja pracy) i Anatola Zaŭjałava (PKB).
9 červienia kala 15-j na rynku «Dynama» zatrymali aktyvistaŭ «Zubra» Siarhieja Rykava i Ramana Kazakieviča, jakija razdavali pradprymalnikam biuleteń «Kamersant» z zaklikam dałučycca da strajku 17 červienia.
10 červienia ŭ Navahradku supracoŭniki milicyi zatrymali dvuch aktyvistaŭ ruchu «Zubr». Milicyjanty kanfiskavali ŭ ich fotaaparat i adpuścili.
10 červienia ŭ Miensku kala 4-j ranicy zatrymali Alaksandra Apraniča ŭ toj momant, kali toj rabiŭ hrafici «Svabodu Maryniču!». Na jaho skłali pratakoł jak za «Drobnaje chulihanstva», sud́dzia Rahozina dała jamu štraf u pamiery bazavaj vieličyni.
10 i 11 červienia milicyjanty zatrymlivali viciebskaha apazycyjanera Barysa Chamajdu, pakul Alaksandar Łukašenka braŭ udzieł u seminary dla kiraŭničych rabotnikaŭ u Viciebsku. Pratakołu nie składali, pradstaŭniki pravaparadku rastłumačyli zatrymańnie tym, što sp.Chamajda «nia rady pryjezdu prezydenta». Ahułam B.Chamajda pravioŭ u pastarunku kala vaśmi hadzinaŭ.
11 červienia sudździa Žłobinskaha rajonnaha sudu Zoja Łasoŭskaja adchiliła pazoŭ aktyvista AHP, deputata rajsavietu Marata Afanaśjeva da administracyi Metalurhičnaha zavodu, kiraŭnictva jakoha ŭ sakaviku vyniesła jamu jak načalniku biuro adrazu try pakarańni, u ich liku i skaračeńnie jahonaj pasady. M.Afanaśjeŭ ličyć dziejańni administracyi zavodu palityčna matyvavanymi.
11 červienia ŭ handlovym centry «Maksymus», što ŭ mienskaj Malinaŭcy, zatrymali troch niepaŭnaletnich aktyvistaŭ «Zubra» za raspaŭsiud biuleteniu «Kamersant». 14 červienia da adnaho ź ich — Siarhieja Harełava — zavitali damoŭ supracoŭniki KDB i paprasili jaho raskazać pierad videakameraj pra abstaviny zatrymańnia 11 červienia i pra ruch «Zubr».
15 červienia aktyvistaŭ «Zubra» Alaksieja Šydłoŭskaha i Alesia Atročankava zatrymali na Kamaroŭcy. Jany razdavali ŭlotki ź infarmacyjaj pra haładoŭku deputataŭ i pra palitviaźniaŭ. Alaksieja Laŭkoviča i Źmitra Ščepava zatrymali la metro «Kastryčnickaja», Paŭła Juchnieviča — la metro «Puškinskaja».
15 červienia ŭ prakuratury Miensku adbyŭsia novy dopyt kiraŭnika AHP Anatola Labiedźki. Palityka vinavaciać u paklopie na prezydenta: u interviju RTR jon krytykavaŭ Łukašenku za ŭtojvańnie hrošaj ad prodažu zbroi.
15 červienia sud Zavodzkaha rajonu Miensku pryniaŭ rašeńnie ab kanfiskacyi majomaści ŭ aktyvista AHP Alesia Karnijenki, pakolki toj nia zdolny vypłacić štraf u pamiery 1 młn. 650 tys. rub., nakładzieny na jaho za arhanizacyju 7 listapada letaś akcyi hramadzkaha hałasavańnia ŭ spravie treciaha prezydenckaha terminu A.Łukašenki.
Siarhiej Budkin
Ciapier čytajuć
Babaryka: Kali b my pieramahli — vajny va Ukrainie nie było b33
Babaryka: Kali b my pieramahli — vajny va Ukrainie nie było b
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary