Aktyvista «Zubra» Alaksandra Z. zatrymali ŭ Miensku 21 červienia za raspaŭsiud ulotak. 22 červienia ŭ Miensku zatrymali «zubroŭcaŭ» Michaiła K. i Ludmiłu M. Padčas raspaŭsiudu hazety «Supraciŭ» 23 červienia zatrymali aktyvistaŭ «Zubra» Darju Małdavanavu, Michaiła Aŭdziejeva, Jaŭhiena Afnahiela. 23 červienia Mienski haspadarčy sud admianiŭ finansavyja sankcyi, nakładzienyja na Biełaruski Chielsynski kamitet nibyta za niaŭpłatu padatkaŭ sa srodkaŭ pa prahramie TACIS. U analahičnym sudovym pracesie słonimskaha HA «Vola da raźvićcia», jaki pačaŭsia 22 červienia, sudździa Aleh Kadač adchiliŭ chadajnictva ab ułučeńni ŭ materyjały spravy dakumentaŭ, jakija śviedčać na karyść arhanizacyi. Ź inicyjatyvy Ministerstva justycyi Sajuz palakaŭ Biełarusi 23 červienia pazbaviŭ Tadevuša Havina pasady hanarovaha staršyni. U Navapołacku 24 červienia padčas raspaŭsiudu ŭlotak suprać treciaha prezydenckaha terminu zatrymali aktyvistaŭ kaalicyi «5+» Źmitra Sałaŭjova, Alaksieja Trubkina (BNF) i Inu Barysievič. Žonku i dziaciej Valerja Levanieŭskaha vyklikali 24 červienia ŭ Leninskuju prakuraturu Horadni dla dačy pakazańniaŭ — usie jany admovilisia davać pakazańni suprać blizkaha čałavieka. «Zubroŭcaŭ» Barysa M. i Nastu C. zatrymali ŭ Miensku 24 červienia: jany rasklejvali plakaty ź lahatypam ruchu. Sudovaje pasiedžańnie na pazoŭ žurnalista Valerja Ščukina da staršyni Połackaha harvykankamu, pryznačanaje na 24 červienia, adkładziena na niapeŭny termin: čynoŭnik u hazetnych publikacyjach abvinavaciŭ Ščukina ŭ niamužnaści. Ministerstva justycyi padało ŭ Viarchoŭny sud 24 červienia pazoŭ na likvidacyju Biełaruskaj partyi pracy, što ŭvachodzić u Narodnuju kaalicyju «5+»: arhanizacyi zakidajuć «parušeńnie zakanadaŭstva padčas raźmiaščeńnia kiraŭničych orhanaŭ i arhanizacyjnych strukturaŭ u rehijonach». Aktyvisty «Zubra» Maksim S., Luboŭ M. i Alaksiej K. byli zatrymanyja 25 červienia ŭ Miensku padčas raspaŭsiudu hazety arhanizacyi. 25 červienia Svabodny prafsajuz Biełaruski padrychtavaŭ skarhu ŭ sud na dziejańni Navapołackaha harvykankamu: miascovaja «vertykal» užo hod admaŭlaje ŭ pierarehistracyi strukturam SPB — Navapołacka-Połackaj rehijanalnaj arhanizacyi, a taksama prafsajuznym supołkam Navapołackaj CEC i AAT «Naftan». Śledčyja KDB 25 červienia praciahnuli termin utrymańnia Michaiła Maryniča pad vartaj jašče na 2 miesiacy. Aktyvistaŭ AHP Vadzima Ijodela, Jaŭhiena Łukšu, Vitala Filipoviča zatrymali 26 červienia ŭ Horadni padčas praviadzieńnia apytańnia ludziej nakont treciaha prezydenckaha terminu. 27 červienia 16-hadovaha aktyvista «Zubra» Źmitra Kučynskaha zatrymali ŭ parku Horkaha ŭ Miensku padčas raspaŭsiudu hazety «Zubr»: u pastarunku kapitan milicyi Ivan Žebit, sa słovaŭ chłopca, źbiŭ jaho za patrabavańnie skłaści pratakoł asabistaha nadhladu. Junak padaŭ skarhu ŭ prakuraturu. 28 červienia patrabavańnie vyzvalić zajmanyja pamiaškańni atrymali viciebskija haradzkija partyjnyja arhanizacyi AHP, ŁDPB, BSDH i BSDP (NH), a taksama HA «Samakiravańnie dy hramadztva». 29 červienia Leninski rajonny sud Horadni adchiliŭ skarhu hałoŭnaha redaktara hazety «Dień» Mikoły Markieviča: žurnalist abskardžvaŭ rašeńnie administracyjnaj kamisii, jakaja pakarała jaho za raspaŭsiud drukavanych vydańniaŭ biez vychodnych źviestak, chacia ŭ hazecie ŭsie źviestki byli. Sud Małaryckaha rajonu 29 červienia abviaściŭ papiaredžańnie deputatu rajsavietu siabru BNF Uładzimieru Maleju za sustreču z vybarcami: sud vyznačyŭ jaje jak niesankcyjavany mitynh. Sprava razhladałasia ŭ adsutnaść adkazčyka. 28 červienia ŭ Miensku pry raspaŭsiudzie hazety «Zubr» zatrymali aktyvistaŭ arhanizacyi Paŭła Juchnieviča, Kaciarynu Śmirnovu, Luboŭ Kučynskuju i Ramana Kazakieviča: na ŭsich skłali pratakoły pavodle art.172 KaAP. Deputatam hrupy «Respublika» Valerju Frałovu i Siarhieju Skrabcu 29 červienia admovili ŭ pamiaškańni dla sustrečy z vybarcami Babrujsku. 30 červienia ŭstupiŭ u zakonnuju siłu prysud Aksanie Novikavaj: ciažarnaja žančyna asudžanaja na 2,5 hady abmiežavańnia voli. U kvateru kaardynatara «Zubra» Ja.Afnahiela 30 červienia biaz orderu na pieratrus uvarvalisia milicyjanty j nieviadomyja ŭ cyvilnym: padčas pieratrusu znajšli ŭlotki «Svabodu Maryniču» i zabrali «zubroŭca» ŭ pastarunak. U Barysavie 30 červienia zatrymanyja «zubroŭcy» Siarhiej Kuniec i Andrej Byrkoŭ, jakija raspaŭsiudžvali hazetu arhanizacyi. 1 lipienia ŭ Miensku padčas raspaŭsiudu ŭlotak byli zatrymanyja aktyvisty «Zubra» Ł.Kučynskaja, Siarhiej Piejpałovič, Alaksiej Šydłoŭski, P.Juchnievič i Andrej Baraškaŭ. 1 lipienia ŭ Maładečnie nia vyjšaŭ numar hazety «Niediela v Mołodiečno»: miascovaja drukarnia admaŭlajecca drukavać vydańnie paśla publikacyi vialikaha (na ŭsiu pałasu) partretu Stanisłava Bahdankieviča, jaki pryjaždžaŭ u horad na seminar dla pradprymalnikaŭ i kiraŭnikoŭ dziaržpradpryjemstvaŭ. 30 červienia KDB pačaŭ razbor pavodle lista sustaršyni prafsajuzu REPAM Hienadzia Fiadyniča: staršynia Naziralnaj rady AAT «Rytm» (Homiel) Ju.Valuk prymušaŭ rabotnikaŭ pradpryjemstva vyjści z REPAMu, pahražajučy pieraśledam z boku KDB. 1 lipienia na staličnym rynku «Rakaŭski kirmaš» achova zatrymała staršyniu HA pradprymalnikaŭ «Perspektyva» Anatola Šumčanku: załamaŭšy ruki, jaho zaciahnuli ŭ sutareńni, dzie pratrymali hadzinu. Unačy z 1 na 2 lipienia ŭ padjeździe svajho domu byŭ źbity V.Frałoŭ i jahony šafior: nieviadomyja ŭ maskach zabrali ŭ jaho partfel z dakumentami. U Miorach 2 lipienia za raspaŭsiud ulotak z partretami źnikłych palitykaŭ zatrymali siabra AHP Viktara Šulhu: u jaho adabrali ŭlotki j śpis miorskich siabroŭ AHP. U Bychavie 2 lipienia padčas razdačy ŭlotak zatrymali aktyvistaŭ «5+» Uładzimiera Šancava (AHP) i Anatola Zaŭjałava (PKB). 2 lipienia padčas raspaŭsiudu hazety «Zubr» zatrymali aktyvistaŭ arhanizacyi: u Baranavičach — Alenu Špironak i Juliju Aŭhuścinovič, u Miensku — Darju Małdavanavu, Kaciarynu S. i Ł.Kučynskuju. Padčas praviadzieńnia apytańnia nakont treciaha prezydenckaha terminu ŭ Navapołacku 3 lipienia zatrymali pradstaŭnikoŭ «5+» Alesia Karnijenku (AHP) i Alaksieja Łukaševiča. 5 lipienia Partyi BNF, AHP, BSDH atrymali papiaredžańnie ad Miniustu za zaklik uziać udzieł u «Łancuhu nieabyjakavych čytačoŭ» 10 červienia ŭ padtrymku «Narodnaj voli». 6 lipienia ŭ Niaśvižy byŭ zatrymany na try hadziny aktyvist kaalicyi «Maładaja Biełaruś» Mikoła Arciuchoŭ. 6 lipienia milicejski patrul zatrymaŭ namieśnika staršyni Partyi BNF Alaksieja Janukieviča, sakratara Ŭpravy Partyi BNF Andreja Sarotnika i siabra Sojmu Siarhieja Sałaša, jakija razdavali ŭlotki Narodnaj kaalicyi «5+» pracoŭnym MAZu, jakija viartalisia z druhoj źmieny.
AŠ
Kamientary