Łukašenka nie ŭratavaŭ Chusejna

Supracoŭnictva režymu Łukašenki z Sadamam Chusejnam daŭno było pradmietam abmierkavańnia. Apublikavany amerykanskim uradam dakład apisvaje supracoŭnictva Bahdadu j Miensku pa zakupcy vajskovaha abstalavańnia j technalohij. Śćviardžajecca, što z parušeńniem sankcyjaŭ AAN biełaruskija pradpryjemstvy mieli mnostva kantraktaŭ pa prodažy Bahdadu abstalavańnia pa rakietnym naviadzieńni i kantroli, procipavietranaj abaronie j technalohijam viadzieńnia elektronnaj vajny, a atrymanyja hrošy raźmiarkoŭvalisia miž biełaruskimi kiraŭnikami.Dakład byŭ padrychtavany specyjalnym daradcam CRU ŭ spravie irackaj zbroi masavaha źniščeńnia. Jon kanstatuje adsutnaść takoj zbroi, ale adnačasova detalova fiksuje vajskovyja kantakty Chusejna. Jak śviedčać zachoplenyja mižnarodnaj kaalicyjaj u Iraku dakumenty, abjom nielehalnaha vajskovaha handlu pamiž Biełaruśsiu dy Irakam byŭ značny.

Biełaruski ŭrad atrymaŭ ad Iraku kala 114 miljonaŭ dalaraŭ u jakaści apłaty. Ci nie adtul išli hałoŭnyja pastupleńni ŭ hetak zvany «prezydencki fond», ź jakoha prapłačvajucca prapahandysckija kampanii i represiŭny aparat? Straty dziaržaŭnaha biudžetu ŭ vyniku mahčymych ciapier mižnarodnych sankcyj suprać Biełarusi mohuć być niesuvymierna bolšymi. I ciapier dla takich sankcyj jość usie padstavy. Bolš za toje, chto pavieryć siońnia, što Łukašenka nie dapamahaje vajskovym prahramam Iranu? Sproby aficyjnych asobaŭ z MZS i vajskova-pramysłovaha kamitetu źniapraŭdzić amerykanskuju infarmacyju vyhladajuć niepierakanaŭča, jak sproba adciahnuć čas.

Ciapierašniaja linija zamiežnaj palityki zychodzić niby z adnoj dumki — usio, što na škodu Zachadu, na karyść Biełarusi. Siabroŭstva z Syryjaj, Sudanam, adkryćcio ambasady Palestyny zamiest dyplamataŭ Izrailu, što źjechali, — lahičny łancuh. Čym bolš adyjoznyja režymy j čym bolej jany krytykujucca zachodnim śvietam — tym bolšaje razumieńnie j padtrymku jany znachodziać u Miensku. Naturalna, taki zamiežnapalityčny śvierb nia moža być bieskaryślivym. Nia moža być i biaśpiečnym. Vyjaŭlenyja fakty biełaruskaje dapamohi Chusejnu, skiravanaje suprać ZŠA, pieravodziać Biełaruś u šerah adkrytych niepryjacielaŭ Vašynhtonu.

Mienskija chitruny nie ŭratavali svajoj dapamohaju Chusejna. Zatoje ciapier biełaruskim kampanijam naahuł nia budzie miesca ŭ Iraku. A Biełaruś u vačach cyvilizavanaha śvietu ciapier tryvała asacyjujecca z šeraham tych samych režymaŭ, jakim nie padajuć ruki ŭ prystojnych kampanijach.

Hary Kumaniecki

Uryŭki z dakładu CRU, u jakich havorycca pra supracu Biełarusi z Chusejnam

Pavodle acenki ŭ spravazdačy, biełaruski prezydent Łukašenka i Sadam mieli asablivyja ŭzajemaadnosiny. Łukašenka pahadziŭsia padtrymać Sadama tamu, što iracki prezydent padtrymaŭ prezydenckija vybary ŭ Biełarusi 2001 h.

Asoby z Ukrainy, Biełarusi j Rasiei, jakija, pavodle Bahdadu, zrabili asabliva važki ŭniosak u spravu biaśpieki Iraku, pa zahadzie Sadama atrymlivali dolu ad prodažu nafty. Siarod biełaruskich atrymalnikaŭ u spravazdačy fihurujuć Viktar Šaŭcoŭ, dyrektar «Infabanku»; Jury Šabroŭ, dyrektar «BiełFarmu»; Alaksandar Rabataj, aficer adnoj ź biełaruskich specsłužbaŭ.

Voś što śćviardžajecca ŭ dakładzie:

Prezydent Biełarusi Alaksandar Łukašenka paśladoŭna padtrymlivaŭ palityčnuju pazycyju i patreby abarony Iraku. U vieraśni 2002 hodu Łukašenka sustreŭsia z pradstaŭnikami ministerstva finansaŭ i Kamisii pa vajskovaj pramysłovaści, kab abmierkavać vajskovaje supracoŭnictva. Na hetaj sustrečy Łukašenka vykazaŭ žadańnie padtrymać Irak i pasłać ekspertaŭ pa procipavietranaj abaronie, kab pamahčy Iraku supraćstajać ZŠA.

Klučavyja asoby ź Biełarusi, źviazanyja ź niezakonnym handlem ź Irakam:

Uładzimier Zamiatalin,·Leanid Kozik,·Mikałaj Ivanienka – namieśniki staršyni prezydenckaj administracyi i staršyni ź biełaruskaha boku ŭ iracka-biełaruskim kamitecie pa ekanamičnym supracoŭnictvie. Vital Charłap – biełaruski ministar pramysłovaści. Prafesar Kandrynko (?) – dyrektar adździełu kamunikacyj kancernu «Ahat». Jon vioŭ pieramovy ź dziaržaŭnaj kampanijaj «Sałach Ad-Dzin» i zaklučyŭ šmat kantraktaŭ pa vytvorčaści kamunikacyjnaha abstalavańnia. Prafesar Kłaško – navukoviec, jaki ŭznačalvaŭ adździeł telemetryčnych system dla rakietaŭ «ziamla-ziamla» i zaklučyŭ šmat kantraktaŭ z Kamisijaj pa vajskovaj pramysłovaści.

Hienierał Piotar Rahažeŭski – namieśnik ministra abarony pa ŭzbrajeńniach.

Materyjały, abstalavańnie i pasłuhi, pastaŭlenyja ź Biełarusi

Zachoplenyja dakumenty śviedčać, što ŭ śniežni 2002 h. pradpryjemstva «Bałmorałs» zaklučyła kantrakt 148/2002 z «Ał-Kindzi Dženerał Kompani» pa dastaŭcy elektronnych kampanentaŭ (dla systemy radarnaj blakiroŭki) vartaściu $70,367. Hety košt uklučaŭ dastaŭku praz Syryju… u Bahdad.

«Biełmetałenerha» byŭ zamiašany ŭ pastaŭki karpusoŭ i matoraŭ dla tankaŭ T-72 i madernizacyju rakiet procipavietranaj abarony SA-2 i radarnych system.

Alaksandar Dziehciaroŭ – jašče adzin z najbujniejšych udzielnikaŭ niezakonnaha handlu. Dziehciaroŭ – rasiejski specyjalist pa rakietnych systemach navodzieńnia i kantrolu. Šaŭcoŭ pradstaviŭ Dziehciarova irackaj Kamisii pa vajskovaj pramysłovaści. Dziehciaroŭ vałodaŭ biełaruskimi kampanijami «Systemtek» i «ElektrykHazKom» , jakija mieli kantrakty ź Irakam praź «Infabank» na pastaŭku systemaŭ radarnaha kantrolu plus i navodki dla rakiet SA-2. Abstalavańnie dastavili praz Syryju i apłacili praź jaje banki.

Dziehciaroŭ rehularna naviedvaŭ Bahdad. Pavodle vysokapastaŭlenych i siarednich čynoŭ z Kamisii pa vajskovaj pramysłovaści, jakija mieli niepasredny dostup da infarmacyi, Dziehciaroŭ byvaŭ u Iraku kožnyja dva tydni. «ElektrykHazKom» padpisaŭ kantrakt ź irackaj dziaržaŭnaj kampanijaj «Al-Karamach» na vytvorčaść i testyroŭki systemaŭ naviadzieńnia i kantrolu dla takich rakiet typu «ziamla-ziamla», jak «Al-Samud». Handal taksama ŭklučaŭ prodaž hiraskopaŭ i akselerometraŭ... «ElektrykHazKom» mieŭ kantrakty i ź dziaržaŭnaj kampanijaj «Al-Batani» na pastaŭku technalohii pa vytvorčaści dla irackaha doślednaha prajektu pa spadarožnikach.

Najvažniejšym ekspartam ź Biełarusi ŭ Irak byli radarnyja technalohii j systemy procipavietranaj abarony. Zachoplenyja dakumenty j pakazańni irackaha aficera siaredniaha ranhu z dostupam da infarmacyi paćviardžajuć isnavańnie sumiesnaha biełaruska-irackaha prajektu (listapad 2000 h. — sakavik 2003 h.) pa ŭdaskanaleńni P-18 (Mod Spoon Rest), radara rańniaha papiaredžańnia. Radar vykarystali ŭ Centry procipavietranaj abarony Al-Habanjach.

«Systemtek» zabiaśpiečvaŭ dapamohu ŭ vyprabavańniach i pramysłovych zapuskach. Doktar Raskoŭka (?) byŭ starejšaj aficyjnaj asobaj u «Systemtek», jon naviedvaŭ Irak kožnyja 3—4 miesiacy ciaham apošnich troch hod. Irakcy chacieli nabyć systemu procipavietranaj abarony S-300. Kantrakt byŭ padpisany i treninh raspačaty, ale prablemy materyjalna-techničnaha zabieśpiačeńnia, kab dastavić systemu, nie pryciahvajučy ŭvahi mižnarodnaj supolnaści, akazalisia niepieraadolnymi.

Pavodle inšych pakazańniaŭ, Biełaruś rabiła šmat pastavak niezakonnych tavaraŭ u Irak. U ich liku abstalavańnie dla tankaŭ T-72 i T-55; «Vołha», «Piačora» (SA-3) dy inšyja rakietnyja procipavietranyja systemy; viertaloty Mi-17, zapčastki dla MiH-23, -25 i -29 dy dla reaktyŭnych samalotaŭ Su-25; systemy łazernaha naviadzieńnia; vałakonnaja optyka; infračyrvonyja elementy; hłušyłki GPS... Navat pierad samaj vajnoj niezakonny handal Biełarusi i Iraku nie spyniaŭsia, jak pakazvajuć pierachoplenyja dakumenty. Biełaruś pastaviła PN-5 i PN-7 prybory načnoha bačańnia dla Iraku praz padstaŭnuju kampaniju «Al-Bašair». Za try miesiacy da vajennaha kanfliktu prezydent Łukašenka prainstruktavaŭ biełaruskaje Ministerstva abarony dazvolić Iraku nabyć luboje vajskovaje abstalavańnie.

Apłata ź Iraku ŭ Biełaruś

Hałoŭnaja krynica dachodu dla finansavańnia niezakonnaha handlu ź Irakam vyjaviłasia ŭ iracka-syryjskim handlovym pratakole. Jak śviedčać zachoplenyja dakumenty… biełaruski ŭrad atrymaŭ ad Iraka kala 114 młn dalaraŭ u jakaści apłaty.

Pavodle pakazańniaŭ zatrymanaha, krytyčnym finansavym elementam u hetym niezakonnym handlovym pracesie adyhryvaŭ «Infabank». Biełaruś patrabavała apłatu 75% ad vartaści kantraktaŭ u ćviordaj valucie pierad tym, jak tavar dastaŭleny. Irak nie pahadžaŭsia. Tamu «Infabank» pahadziŭsia pakryvać 75% pieradapłaty za hanarar pamieram 15% ad koštu kožnaha kantraktu. Adzin z byłych kiraŭnikoŭ Kamisii pa vajskovaj pramysłovaści Iraku ličyć, što pierad pačatkam vajny «Infabank» mieŭ kala 7 młn irackich hrošaj na svaich rachunkach.

Adzin z kiraŭnikoŭ Kamisii pa vajskovaj pramysłovaści paviedamiŭ pra toje, jak pavietranaja linija pamiž Bahdadam i Mienskam była adkrytaja letam 2000 h.… na jakoj pracavali čatyry «Boinhi-747», jakija pieravozili… tavary, ekspertaŭ i aficyjnych asobaŭ niepasredna ŭ Bahdad pad prykryćciom humanitarnych misijaŭ.

• 0
• 0
• 0
• 0
• 0
• 0
• 0
• 0