Stała viadoma pra 45 rasijskich hienierałaŭ, jakija lačylisia ŭ špitalach z pačatku vajny, u tym liku ŭ Biełarusi
Zamach na rasijskaha hienierał-lejtenanta Ihara Kiryłava ŭ śniežni 2024 hodu, u vyniku jakoha jon zahinuŭ, chutčej za ŭsio, byŭ nie pieršym. Pra heta dazvalaje mierkavać baza pacyjentaŭ vajskovych špitalaŭ Hałoŭnaha vajskova-miedycynskaha ŭpraŭleńnia (HVMU) Minabarony RF, piša «Svaboda».
U bazie, vyvučanaj Rasijskaj słužbaj «Radyjo Svaboda» źmieščanyja źviestki pra 166 tysiač pacyjentaŭ, jakija prajšli praz vajskovyja špitali ŭ Rasii, anieksavanym Krymie i na terytoryi Biełarusi sa studzienia 2022-ha pa siaredzinu červienia 2024 hodu. Zapisy ab vyšejšych aficerach rasiejskaha vojska byli pieradadzienyja vajskovym medykam Andrejem Žylajevym, jaki dezertavaŭ u Francyju.
U bazie znachodziacca źviestki pra 45 hienerałaŭ, jakija lačylisia ŭ vajskovych špitalach. Ź ich 34 hienerał-majory, 10 hienerał-lejtenantaŭ i adzin hienerał-pałkoŭnik, a taksama pra piać admirałaŭ, uklučajučy čatyroch kontradmirałaŭ i byłoha kamandujučaha Čarnamorskaha flotu RF Mikałaja Sakałova.
Nia mienš za 12 vypadkaŭ — paranienyja
Bolšaść zapisaŭ datyčacca dyjahnazaŭ, chutčej za ŭsio nie źviazanych z udziełam aficeraŭ u bajavych dziejańniach — ad fimozu da epileptyčnaha prypadku. Pieravažnaja častka chvarob, ź jakimi hienerały i admirały źviartalisia ŭ vajskovyja lačebnyja ŭstanovy, typovyja dla ŭzrostavych rasiejcaŭ — heta hipertanija i inšyja zachvorvańni sardečna-sasudzistaj systemy.
Adnak u 12 vypadkach staršyja aficery sapraŭdy byli paranienyja padčas bajavych dziejańniaŭ ci ichnaje lačeńnie było vidavočna źviazanaje z udziełam u ich. Analizujučy hetyja zapisy, my vyjavili, što ŭ niekatorych vypadkach hienerały abyšlisia mienšymi traŭmami, pra što paviedamlałasia ŭ ŚMI, a ŭ inšych vypadkach pra ich ranieńni było vyrašana pramaŭčać.
Ihar Kiryłaŭ: «Na jaho pačałosia palavańnie»
Adzin z samych cikavych zapisaŭ u bazie HVMU tyčycca hienerała-lejtenanta Ihara Kiryłava, kiraŭnika vojskaŭ radyjacyjnaj, chimičnaj i bijalahičnaj abarony, jaki zahinuŭ u vyniku vybuchu kala padjezda svajho doma 17 śniežnia 2024 hodu.
Pavodle zapisu ŭ bazie, za 8 miesiacaŭ da hetaha, 3 sakavika, Kiryłaŭ byŭ źmieščany ŭ špital imia Burdenki z «ahniastrelnym ranieńniem vierchniaj zony pravaha ściahna». Hienerał pravioŭ u špitali bolš za miesiac, da 11 krasavika, što pakazvaje na surjozny charaktar ranieńnia (ciažkaść jahonaj traŭmy ŭ bazie nie paznačanaja), i paśla hetaha byŭ nakiravany na dadatkovuju reabilitacyju ŭ špital imia Višnieŭskaha.
Kiryłaŭ byŭ adnym z najbolš medyjna aktyŭnych rasiejskich vyšejšych aficeraŭ. Praktyčna štomiesiac jon pravodziŭ bryfinhi, na jakich raskazvaŭ pra nibyta isnavańnie na terytoryi Ŭkrainy sakretnyja chimičnyja i bijalahičnyja labaratoryi i padrychtoŭku ŭkrainskaj pravakacyi z vykarystańniem «brudnaj bomby».
Tak, 19 lutaha 2024 hodu hienerał pravioŭ bryfinh, na jakim zajaviŭ pra nibyta prymienieny suprać rasiejskaha vojska bajavy atrutny haz CS, i paśla hetaha nadoŭha źnik sa ŚMI: nastupny bryfinh Kiryłava prajšoŭ tolki 28 traŭnia.
Na praciahu ŭsiaho hodu, až da svajoj śmierci, kiraŭnik vojskaŭ RCHBZ źjaŭlaŭsia ŭ publičnaj prastory jak minimum štomiesiac za vyklučeńniem pramiežku pamiž 19 lutaha i 28 traŭnia, jaki pryblizna supadaje z časam jaho lačeńnia.
Miarkujučy pa adkrytych dadzienych, za čas vajny Kiryłaŭ nivodnaha razu nia byŭ na linii frontu; akramia taho, źmiaščeńnie adrazu ŭ špital Burdenki ŭskosna pakazvaje na toje, što ahniastrelnaje ranieńnie jon atrymaŭ u Maskvie ci pobač ź joj.
«Radyjo Svaboda» nie zmahło ŭstanavić, ci byŭ hienerał paranieny ŭ bytavoj sytuacyi (naprykład, na palavańni) ci jahonaje ranieńnie stała vynikam niaŭdałaha zamachu, pra jaki było vyrašana nie paviedamlać publična.
Ahniastrelnaja zbroja nieadnarazova vykarystoŭvałasia pry zamachach na ludziej, adkaznych za viadzieńnie vajennych dziejańniaŭ va Ŭkrainie. Za try miesiacy da špitalizacyi Kiryłava, u śniežni 2023 hodu, u Padmaskoŭi byŭ zastreleny były prarasiejski deputat Viarchoŭnaj rady Illa Kiva. Za niekalki dzion da vybuchu, u jakim zahinuŭ hienerał Kiryłaŭ, u Maskvie byŭ zastreleny adzin z raspracoŭnikaŭ rasiejskich kryłatych rakiet Michaił Šacki.
Paśla śmierci Kiryłava hubernatar Kastramskoj vobłaści Siarhiej Sitnikaŭ, jaki asabista viedaŭ hienerała, napisaŭ u svaim telehram-kanale: «Niekatory čas tamu jon mnie skazaŭ, što jaho ŭžo papiaredzili, što palavańnie na jaho pačałosia».
«Minabarony RF na zapyt nie adkazała»
Baza HVMU źmiaščaje źviestki pra ranieńni inšych hienerałaŭ, jakija nie fihuravali ŭ adkrytych krynicach.
- Hienerał-lejtenant Dźmitryj Hłušankoŭ, kamandujučy 68-m armiejskim korpusam, u žniŭni 2022 hodu atrymaŭ spałučanuju traŭmu hałavy i hrudziej, jakaja zapatrabavała dvuchtydniovaha lačeńnia i nastupnaj reabilitacyi ŭ sanatoryi. U listapadzie 2022 hoda Hłušankoŭ «viarnuŭsia z zony SVA» i zaniaŭsia padrychtoŭkaj navabrancaŭ na Ŭśpienaŭskim palihonie. Uviesnu 2024 hodu jon zhadvaŭsia jak časovy vykanaŭcy abaviazkaŭ kamandujučaha Centralnaj vajskovaj akruhi.
- Hienerał-major Piotar Bałharaŭ, na momant pačatku ŭvarvańnia namieśnik kamandujučaha 36-j armii, atrymaŭ ahniastrelna-askiepkavaje ranieńnie ŭ samym pačatku 2023 hodu, publična pra jaho nie paviedamlałasia. U listapadzie 2023 hodu jaho pavysili ŭ zvańni da hienerał-lejtenanta.
- Hienerał-major Alaksandar Radzivonaŭ pierad pačatkam poŭnamaštabnaha ŭvarvańnia byŭ načalnikam vojskaŭ RCHBZ Centralnaj vajskovaj akruhi, da hetaha jon pradstaŭlaŭ toj ža rod vojskaŭ u rasiejskaj hrupoŭcy ŭ Syryi. Z bazy HVMU vynikaje, što ŭ traŭni 2022 hodu Radzivonaŭ atrymaŭ ranieńnie tvaru. Infarmacyi ab hetym u adkrytych krynicach niama.
- Hienerał-major Mikałaj Martyniuk u 2019 hodzie kamandavaŭ rasiejskaj vajskovaj bazaj u armianskim Hiumry, a da hetaha ŭznačalvaŭ vajskovy harnizon u Vałhahradzie. Za niekalki dzion da pačatku poŭnamaštabnaha ŭvarvańnia va Ŭkrainu jamu było prysvojena zvańnie hienerała-majora, a ŭžo ŭ vieraśni 2022 hodu Martyniuk atrymaŭ surjoznaje askiepkavaje ranieńnie ściahna. Hienerał papraviŭ zdaroŭje i 9 traŭnia 2024 hoda kamandavaŭ paradam u Vałhahradzie.
- Taksama ŭ bazie jość infarmacyja ab lačeńni posttraŭmatyčnaj chvaroby abiedźviuch nižnich kancavin hienerał-majora Valeryja Škilniuka ŭ listapadzie 2022 hodu. Heta ŭskosna paćviardžaje źviestki ab ranieńniach Škilniuka, datavanyja pieršaj pałovaj 2022-ha, chacia zapisaŭ pra ich u bazie HVMU niama.
Lačyŭsia ŭ vajskovym špitali ŭ Mazyry
U pieršyja dni poŭnamaštabnaha ŭvarvańnia pad Čarnobylem byŭ ciažka paranieny hienerał-major Siarhiej Nyrkoŭ, na toj momant namieśnik kamandujučaha i načalnik štaba 35-j ahulnavajskovaj armii.
2 sakavika 2022 hodu ab ranieńni Nyrkova ŭ žyvot paviedamiŭ biełaruski telehram-kanał «Biełyja chałaty». Pavodle bazy HVMU, hienerał byŭ praaperavany ŭ špitali ŭ Biełarusi. Pra toje, što Nyrkova lačyli ŭ špitali ŭ Mazyry, taksama raskazvaŭ CNN biełaruski medyk, jaki ŭciok u Eŭropu z medycynskimi dakumentami ź lakarni.
Zhodna z bazaj HVMU, Siarhiej Nyrkoŭ atrymaŭ ranieńnie ŭ žyvot siaredniaj ciažkaści. 2 sakavika jon byŭ evakuavany ŭ Maskvu z dyjahnazam «ahniastrelnaje ranieńnie z paškodžańniem sielazionkavaha vuzła abadočnaj kiški, raźlity perytanit». Nyrkoŭ byŭ vypisany praź miesiac, jon adnaviŭsia na vajskovaj słužbie i z časam zaniaŭ pasadu kamandujučaha 35-j armii, u jakoj słužyŭ načalnikam štaba.
Radyjo Svaboda nakiravała zapyt u Ministerstva abarony RF z prośbaj prakamentavać abstaviny ranieńniaŭ vyšejšych aficeraŭ na vajnie va Ŭkrainie. Na momant publikacyi hetaha materyjału adkaz nie atrymany.
Padrabiazny analiz bazy možna pračytać tut.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie24
Kamientary