Лукашэнка: У Мінску будаваць мы не будзем

«Забяспечыць усіх мінчан жыллём у гарадской мяжы ўжо немагчыма <…> Па густаце засялення Мінск у паўтара-тры разы перавысіў такія еўрапейскія сталіцы, як Берлін, Вена, Рым, Прага і Стакгольм», — заявіў Аляксандр Лукашэнка 29 лістапада на нарадзе па развіцці жыллёвага будаўніцтва ў Мінску.

«Дарэчы, мы жыллё ў горадзе будуем не толькі для мінчан, мы па-ранейшаму працягваем метадычна і мэтанакіравана, любымі шляхамі і спосабамі сцягваць з краіны людзей у цэнтр. Наконт гэтага мае рашэнні вядомыя. Прашу іх выконваць», — звярнуўся Лукашэнка да кіраўнікоў сталіцы.

Ён нагадаў, што ў гарадскую мяжу ўключана частка зямель Мінскага раёна. «Але такі падыход мае свае абмежаванні. Нам ні ў якім выпадку нельга выводзіць з абароту сельскагаспадарчыя ўгоддзі», — адзначыў Лукашэнка.

Як паведамляе прэс-служба прэзідэнта, на думку кіраўніка дзяржавы, надалей найбольш перспектыўным кірункам горадабудаўніцтва павінна стаць будаўніцтва жылля, інфраструктуры, аб’ектаў сацыяльнай і прамысловай сферы ў гарадах-спадарожніках: «Рашэнне ў гэтай частцы прынятае, а вынікаў дагэтуль няма».

«Арыентуйце мінчукоў на тое, што ў Мінску мы будаваць не будзем, — заявіў ён. — А то мы створым праблемы не толькі для дзяцей мінчукоў, але і для цяперашніх жыхароў, яны яшчэ дажывуць да таго часу, калі тут немагчыма будзе не тое што прайсці і праехаць, нармальным паветрам дыхаць будзе немагчыма. Таму трэба забыць аб тым, што ў рамках кальцавой дарогі мы разгорнем маштабнае будаўніцтва. Мы не будзем перацягваць усю краіну ў Мінск. Будаваць трэба там, дзе нам трэба! І людзі туды прыдуць».

Як паведаміў на нарадзе старшыня Мінгарвыканкама Мікалай Ладуцька, у Мінску на чарзе маючых патрэбу ў паляпшэнні жыллёвых умоў стаіць 265 тыс. сем’яў і грамадзян. Паводле яго слоў, за 10 гадоў гэтая чарга павялічылася ў два разы, а прычынай з’яўляецца міграцыйны прырост насельніцтва з рэгіёнаў.

«Чаму вы лічыце, што гэтую чаргу мы павінны забяспечыць і забяспечыць неадкладна? — заявіў яму ў адказ Лукашэнка. — Калі ў чалавека няма магчымасці пабудаваць у Мінску, а будзе ў Лагойскім раёне, дзе даюць добры дом і працу, то чалавек няхай думае: чакаць тут у чарзе або паехаць жыць у нармальным доме і выхоўваць дзяцей. Вось галоўны пасыл і канцэптуальная рэч, пра якую я заўсёды кажу! А то вы абяцаеце — мы пабудуем, і людзі сядзяць і чакаюць. Мінчане павінны разумець: будаўніцтва будзе, але ўсіх у сталіцы жыллём не забяспечыць».

«Трэба вызначаць канкрэтныя плямы і зыходзіць з таго, што мы не мільёны квадратных метраў на землях сельгаспрызначэння будзем будаваць, а на гэтых жа землях ёсць лапікі, якія не падлягаюць апрацоўцы. Аддайце людзям, няхай яны асабнякі там пабудуюць. Там і дарогі ёсць, дзе няма — можна падвесці. Але вы гэтым займацца не хочаце. Дык дайце магчымасць людзям. Яны будуць будаваць, і ад гэтага будзе толк», — Лукашэнка.

• 0
• 0
• 0
• 0
• 0
• 0
• 0
• 0