Рабочым найбуйнейшага вытворцы электронікі ў Беларусі зрэжуць заробак.
Пра гэта гаворыцца ў загадзе дырэктара ПУП «Завод электроннай і бытавой тэхнікі «Гарызонт» [заснавальнікам з'яўляецца Кіруючая кампанія холдынга «Гарызонт» — НН ]Аляксандра Арлова, тэкст якога даслалі ў рэдакцыю сайта charter97.org.
Цягам трох месяцаў — з пачатку студзеня і да канца сакавіка 2014 года — пятніцы будуць выходнымі, а зарплата рабочым прадпрыемства будзе выплачвацца з улікам фактычна адпрацаванага часу.
«Загадваю ўстанавіць на ўнітарным прадпрыемстве «ЗЭБТ Гарызонт» для ўсіх работнікаў структурных падраздзяленняў, за выключэннем тых, якія гарантуюць жыццядзейнасць і бяспеку прадпрыемства, няпоўны працоўны тыдзень з дадатковым выходным днём пятніца з 8 студзеня 2014 года па 31 сакавіка 2014 года.
Начальніку аддзела кадраў Кароўкінай Е.Б. да 1 снежня 2013 года заключыць з работнікамі прадпрыемства пагадненні аб устанаўленні рэжыму няпоўнага працоўнага тыдня. Адначасова растлумачыць работнікам наступствы адмовы ад працы ў прапанаваным рэжыме.
Для работнікаў, якім будзе ўстаноўлены рэжым працы з няпоўным працоўным тыднем, аплату ажыццяўляць за фактычна адпрацаваны час з пачасовай-прэміяльнай аплатай працы, і за фактычна выкананую працу са здзельна-прэміяльнай аплатай працы», - гаворыцца ў загадзе.
Пра тое, якімі наступствамі можа павярнуцца адмова ад працы ў «прапанаваным рэжыме», аб растлумачэнні якіх гаворыцца ў дакуменце, невядома.
«Загад, па якому работнікаў пераводзяць на скарочаны тыдзень, - незаконны. Супярэчыць артыкулу 32 Працоўнага кодэкса РБ. Гэта пацвердзіць любы юрыст», піша чытач сайта charter97.org.
З падобнымі праблемамі завод сутыкаўся ў першай палове гэтага года.
Рабочыя паведамлялі пра тое, што з прадпрыемства звольненыя больш за сто чалавек, а працуе яно з перабоямі. У пачатку сакавіка ў некаторых цэхах быў ўведзены чатырохдзённы працоўны тыдзень. У прыватнасці, гэта закранула цэх па зборцы тэлевізараў. Пятніца была абвешчаная выходным днём, а чатыры працоўныя дні перанеслі на восень.
Цяпер чытаюць
Вось як выглядае з космасу асвятленне Мінска ў параўнанні з суседнімі сталіцамі ФОТАФАКТ9
Каментары