Служба бяспекі Украіны сцвярджае, што мае доказы выкарыстання расійскімі сродкамі масавай інфармацыі тэхналогій інфармацыйна - псіхалагічнага ўздзеяння на гледачоў.
Такую заяву на брыфінгу ў аўторак зрабіла начальнік прэс-службы СБУ Марына Астапенка.
Паводле яе слоў, СБУ два месяцы вывучала відэаматэрыялы, якія транслююць расійскія тэлеканалы, і выявіла ў іх забароненыя міжнародным заканадаўствам тэхналогіі псіхалагічнага ўздзеяння на аўдыторыю, у тым ліку так званы «25-ы кадр».
«Яны адносяцца да небяспечных метадаў інфармацыйна-псіхалагічнага ўздзеяння», — падкрэсліла Астапенка.
На брыфінгу быў прадэманстраваны фільм па выпуску навін на тэлеканале «Расія-24».
На працягу ўсяго выпуску пра падзеі ў Адэсе 2 мая ў куце экрана з'яўляюцца малапрыкметныя надпісы: «падпаліў правы сектар», «людзей забівалі бандэраўцы», «Нацгвардыя забойцы».
Таксама ў СБУ падкрэслілі, што расейскія тэлеканалы выкарыстоўваюць і іншыя метады ўздзеяння на гледачоў.
У прыватнасці, яны распаўсюджваюць напаўпраўду, спасылаюцца на нейкія «інфармаваныя крыніцы», дэманструюць дэталізаваныя сцэны забойстваў і гвалту і спрабуюць эмацыйна ўздзейнічаць на гледача.
Псіхолаг СБУ Аксана Сербіненка сцвярджае, што так званая тэхналогія «25-га кадра» з'яўляецца дастаткова старой і не дужа эфектыўнай.
«Ёсць навейшыя спосабы ўплываць на аўдыторыю. Расійскія СМІ выкарыстоўваюць «25-ы кадр», мабыць, як даўні і надзейны метад», - падкрэсліла яна.
У сваю чаргу ў СБУ паабяцалі, што будуць рэагаваць на такія дзеянні расійскіх медыя «у прававым полі».
Як вядома, расійскіх журналістаў ужо неаднаразова абвінавачвалі ў распаўсюдзе прапаганды Крамля. Нядаўна разам з баевікамі былі затрыманыя журналісты LifeNews Алег Сідзякін і Марат Сайчанка, якія, як лічаць у Кіеве, аказвалі інфармацыйнае садзейнічанне тэрарызму.
Цяпер чытаюць
Чаму ў беларускай турме так моцна худзеюць? Тлумачым11
Каментары