Прадстаўнікі выканаўчай улады Магілёва і Чжэнчжоу — сталіцы кітайскай правінцыі Хэнань — падпісалі 12 чэрвеня пагадненне аб устанаўленні пародненых адносінаў.
Цырымонія падпісання праходзіла ў будынку магілёўскай ратушы. З беларускага боку пагадненне падпісаў старшыня Магілёўскага гарвыканкама Уладзімір Цумараў, з кітайскага — кіраўнік дэлегацыі, намеснік мэра народнага ўрада Чжэнчжоу Лью Донг.
Звяртаючыся да прысутных, кіраўнік кітайскай дэлегацыі выказала надзею, што пагадненне дасць магчымасць больш цеснага і шырокага супрацоўніцтва паміж двума гарадамі.
У сваю чаргу Уладзімір Цумараў нагадаў, што нагодай для ўстанаўлення супрацоўніцтва з кітайскімі калегамі стала падпісанне ў 2004 годзе пагаднення аб устанаўленні дружалюбных адносінаў паміж Магілёўскай вобласцю і правінцыяй Хэнань. Пратакол аб супрацоўніцтве паміж Магілёўскім гарвыканкамам і народным урадам горада Чжэнчжоу быў падпісаны 7 лістапада 2007 года.
«На працягу апошніх пяці гадоў афіцыйная дэлегацыя Магілёва неаднаразова выязджала ў Чжэнчжоу на розныя міжнародныя інвестыцыйныя форумы. Але менавіта цесныя адносіны ў сферы культуры і адукацыі зблізілі нашы гарады», — падкрэсліў магілёўскі мэр. Ён нагадаў, што ў 2012 годзе ў міжнародным пленэры па жывапісу ў Магілёве ўзялі ўдзел кітайскія пейзажысты, у ратушы прайшла фотавыстава ў гонар 20-годдзя ўстанаўлення дыпламатычных адносінаў паміж КНР і Беларуссю. У сваю чаргу ў Кітаі гастраляваў сімфанічны аркестр Магілёўскай гарадской капэлы.
«У межах эканамічнага супрацоўніцтва неабходна зазначыць, што за 2013 год знешнегандлёвы абарот Магілёва з КНР склаў $48 млн долараў, што на 20,6% больш да ўзроўню 2012 года», — сказаў Цумараў.
Паводле яго слоў, сальда знешняга гандлю Магілёва з Кітаем склалася адмоўным у памеры $47 млн. Асноўным экспарцёрам магілёўскай прадукцыі ў Кітай выступае ААТ «Магілёўхімвалакно».
Падпісанае пагадненне заключана на пяць гадоў. Калі ніводны з бакоў не выкажа жаданне яго скасаваць, то яно будзе працягвацца аўтаматычна.
Пасля падпісання пагаднення аб устанаўленні пародненых адносінаў было адзначана, што зараз у Магілёва 16 гарадоў-пабрацімаў і 23 гарады-партнёры.
Цяпер чытаюць
Пракурор просіць для экс-памочніка Лукашэнкі Ігара Брыло 12 гадоў зняволення4
Каментары