Беларусь пакуль не называе тэрміны ўваходжання ў сілу пагаднення аб малым прыгранічным руху з Польшчай. Аб гэтым заявіў намеснік міністра замежных спраў Беларусі Аляксандр Гур'янаў пасля IX пасяджэння Беларуска-польскай міжурадавай каардынацыйнай камісіі па справах трансгранічнага супрацоўніцтва ў Мінску 15 ліпеня.
Паводле слоў Гур'янава, цяпер назіраецца пэўнае паляпшэнне двухбаковых адносінаў паміж Беларуссю і Польшчай. Акрамя таго, дадаў ён, пытанне аб уводзе пагаднення ў дзеянне «ставяць рэгіёны». «Але мы хочам быць гатовымі да гэтага працэсу. Пакуль тэрміны ўводу не абмяркоўваем», — заявіў намеснік міністра.
Сітуацыя ўскладняецца тым, патлумачыў Гур'янаў, што ў малы прыгранічны рух паміж Польшчай і Беларуссю будзе ўцягнута каля паўтара мільёна чалавек. «З Польшчай рух у нас завязаны на вялікі тавара- і пасажырапаток. Запуск малога прыгранічнага руху не павінен стварыць калапс», — падкрэсліў намеснік міністра.
Акрамя таго, адзначыў ён, перад уваходжаннем пагаднення ў сілу неабходна аптымізаваць інфраструктуру сумесных прыгранічных пунктаў пропуску, каб яны спраўляліся з узросшым патокам людзей і грузаў.
У сувязі з гэтым, паведаміў Гур'янаў, на сённяшнім пасяджэнні бакі абмяркоўвалі тры новыя пагадненні. У прыватнасці, удакладніў ён, размова ішла аб абноўленым дагаворы аб рэжыме сумеснай мяжы, дагаворы аб узаемадзеянні бакоў на выпадак надзвычайных сітуацый і дагаворы аб сумеснай эксплуатацыі аўта- і чыгуначных мастоў на мяжы.
Пры гэтым беларускі чыноўнік адзначыў, што сродкі на падтрыманне старых і будаўніцтва новых мастоў будуць выдзяляцца як з бюджэтаў Беларусі і Польшчы, так і па лініі тэхнічнай дапамогі Еўрасаюза.
У сваю чаргу першы намеснік міністра ўнутраных спраў Пётр Стаханьчык адзначыў, што пасяджэнне ў Мінску прайшло «ў вельмі дружалюбнай атмасферы». «Мы гаварылі аб канкрэтных пунктах пропуску і канкрэтных рэчах, якія там трэба пабудаваць, каб павялічыць тавараабарот, перавозку пасажыраў і грузаў», — сказаў ён.
Паводле слоў Стаханьчыка, польскі бок прадставіў беларускім партнёрам інфармацыю аб тым, як дзейнічае пагадненне аб малым прыгранічным руху паміж Польшчай і Расіяй, а таксама Польшчай і Украінай. «Беларускі бок расказаў, што зроблена па дагаворы паміж Беларуссю і Польшчай», — дадаў ён.
Нагадаем, пагадненні аб малым прыгранічным руху насельніцтва з Латвіяй, Літвой і Польшчай Беларусь падпісала яшчэ ў 2010 годзе. Пакуль дзейнічае толькі беларуска-латвійскае пагадненне, якое набыло моц 1 лютага 2012 года. Польшча і Літва ўсё яшчэ чакаюць ад беларускага боку паведамленняў аб завяршэнні ўсіх неабходных працэдур. Польшча ратыфікавала дакумент у тым жа 2010 годзе, Літва — у 2011 годзе.
Між тым у падпісанні пагаднення аб малым прыгранічным руху з Польшчай зацікаўлены жыхары заходніх рэгіёнаў Беларусі. Летась у Гродне і Брэсце прайшлі пікеты з патрабаваннем да беларускіх уладаў актывізаваць працу па падпісанні пагаднення. Мясцовыя жыхары таксама сабралі тысячы подпісаў пад адпаведнымі петыцыямі ў адрас прэзідэнта і парламента, у якіх падкрэслівалася: дагавор аб малым прыгранічным руху з Польшчай «закранае інтарэсы больш чым мільёна беларускіх грамадзян».
Каментары