Вярхоўны суд Беларусі апраўдаў раней асуджаных за буйны хабар генеральнага дырэктара ААТ «Беллегпрампраект» і дырэктара УКБ адміністрацыі Ленінскага раёна Мінска.
«Разгледзеўшы справу і абмеркаваўшы касацыйную і прыватную скаргі, судовая калегія Вярхоўнага суда вызначыла: прыгавор судовай калегіі Мінскага гарадскога суда ад 1 красавіка 2014 года ў дачыненні да Сямёна Мікалаевіча Іокшы і Уладзіміра Міхайлавіча Чыгрына адмяніць і вытворчасць па справе спыніць за недаказанасцю іх удзелу ва ўчыненні злачынства. Меру стрымання — змяшчэнне пад варту — адмяніць і з-пад варты іх вызваліць», — абвясціў 28 жніўня старшыня пасяджэння калегіі суддзя Вярхоўнага суда Уладзімір Давыдаў.
54-гадовы Іокша і 70-гадовы Чыгрын з мая 2006 года былі фігурантамі справы аб хабары ў паўмільёна долараў. Яны былі затрыманыя ў маі 2006 года: на той момант гендырэктар ААТ «Беллегпрампраект» Сямён Іокша і дырэктар КУП «УКБ адміністрацыі Ленінскага раёна Мінска» Уладзімір Чыгрын, а таксама намеснік дырэктара па будаўніцтве ААТ «Беллегпрампраект» Мікалай Талкач. Апошні памёр у СІЗА ад захворвання на рак.
Паводле версіі следства, якое праводзіла Генеральная пракуратура, Іокша абвінавачваўся ў тым, што пераконваў прадстаўнікоў расійскай інвестыцыйнай кампаніі «Арлоўскія металы» ў неабходнасці перадачы хабару ў 500 тысяч долараў «службовым асобам выканаўчых органаў улады за выйгрыш тэндара, які праводзіцца сярод будаўнічых кампаній, па праектаванні і будаўніцтве жылых дамоў у Мінску». Расіяне тэндар выйгралі, і грошы ад іх Іокша атрымаў каля кафэ «Грунвальд», дзе і быў затрыманы. Чыгрын абвінавачваўся «ў замаху на атрыманне хабару за аказанне расійскім інвестарам дапамогі ў выйгрышы тэндара на забудову жылога комплексу і ва злоўжыванні ў сувязі з гэтым службовымі паўнамоцтвамі».
У 2007 годзе прыгаворам суда Фрунзенскага раёна Мінска Іокша быў асуджаны да 11 гадоў пазбаўлення волі з канфіскацыяй маёмасці, Чыгрын — да 10 гадоў пазбаўлення волі з канфіскацыяй маёмасці. У красавіку 2008 года на сайце Генпракуратуры з'явілася паведамленне, што прыгавор набыў моц.
Прыгавор Фрунзенскага райсуда быў адменены судом вышэйшай інстанцыі ў 2011 годзе. Адвакат Сямёна Іокшы Людміла Палачкіна звярнула ўвагу, што толькі праз пяць гадоў Мінгарсуд заўважыў: аператыўна-вышуковыя мерапрыемствы праводзілі без санкцыі пракуратуры незаконна. На гэтай падставе Іокша і Чыгрын былі апраўданы і вызвалены з месцаў пазбаўлення волі. 1 красавіка гэтага года Мінгарсуд вынес у дачыненні да Іокшы і Чыгрына другі абвінаваўчы прыгавор — 10 і 9 гадоў пазбаўлення волі адпаведна. Пасля трохгадовага знаходжання на волі яны зноў адправіліся ў СІЗА.
Апошняя пастанова вышэйшай судовай інстанцыі (ад 28 жніўня 2014 года) на сённяшні дзень поўнасцю рэабілітуе Іокшу і Чыгрына. Як стала вядома, кампанія «Арлоўскія металы» сапраўды існуе, але яна не збіралася выступаць у Беларусі інвестарам і прадстаўнікоў у Мінску не мела. Пад іх выглядам, хутчэй за ўсё, дзейнічалі рэальныя супрацоўнікі міліцыі, якіх забяспечылі легендай бізнесменаў і сапраўднымі беларускімі пашпартамі з чужымі данымі. Такім чынам, усе дакументы па нібыта выйграным тэндары на будаўніцтва жылых дамоў былі фальшывымі.
Цяпер чытаюць
81‑гадовую маці аўтарытэта Скітова з «Бабулінай крынкі» кінулі ў СІЗА КДБ, каб ён нарэшце загаварыў3
Каментары