На другі фестываль мастацтваў беларусаў свету, які пройдзе ў Мінску 12—14 верасня ў рамках Дня горада, чакаецца прыезд прыблізна 250 удзельнікаў з 18 краін свету.
Удзельнікамі фестывалю стануць беларусы з Аргенціны, Арменіі, Бельгіі, Германіі, Італіі, Іспаніі, Казахстана, Кыргызстана, Малдовы, Мексікі, Латвіі, Літвы, Польшчы, Расіі, Украіны, Францыі, Швейцарыі і Эстоніі.
Як адзначыла 11 верасня на прэс-канферэнцыі ў Мінску начальнік упраўлення ўстаноў культуры і народнай творчасці Міністэрства культуры Наталля Задзяркоўская, асноўныя мэты фестывалю — прэзентацыя дасягненняў суайчыннікаў замежжа і дэманстрацыя сацыяльна-культурнага патэнцыялу Беларусі.
Удзельнікі фестывалю 12 верасня дадуць канцэрты ў невялікіх гарадах і аграгарадках Мінскай вобласці. На наступны дзень з іх творчасцю змогуць пазнаёміцца мінчане: канцэрт — падарунак беларусаў замежжа Мінску з нагоды Дня горада адбудзецца на адкрытай пляцоўцы каля Палаца спорту. 14 верасня ў Белдзяржфілармоніі будзе дадзены гала-канцэрт калектываў мастацкай самадзейнасці беларусаў замежжа.
Паводле меркавання арганізатараў, «сапраўднымі адкрыццямі» для беларускіх гледачоў стануць выступленні творчага вакальнага гурту іспанцаў, які спявае на беларускай мове і захоўвае традыцыі беларускай народнай творчасці. Арганізатары таксама рэкамендуюць звярнуць увагу на малады французскі гурт «Славянская душа» з Ліёна, у рэпертуары якога беларускія, украінскія і рускія песні.
Для гасцей і ўдзельнікаў фестывалю запланавана экскурсійная праграма — ім пакажуць знакавыя месцы Мінска. Як паведаміла Задзяркоўская, беларусы замежжа наведаюць новы музей Вялікай Айчыннай вайны, Дзяржаўны літаратурна-мемарыяльны музей Якуба Коласа, дзе запланавана сустрэча з беларускімі пісьменнікамі і паэтамі, а таксама Беларускі дзяржаўны гістарычны музей, дзе адбудзецца адкрыццё фотавыставы «Мы — беларусы», прысвечанай дзейнасці беларускіх аб'яднанняў за мяжой.
У рамках фестывалю пройдзе пятае пасяджэнне Кансультатыўнага савета па справах беларусаў замежжа пры Міністэрстве культуры, паведаміў на прэс-канферэнцыі ганаровы консул Беларусі ў Цюмені, старшыня абласной грамадскай арганізацыі «Саюз-інтэграцыя брацкіх народаў» Уладзімір Шугля.
-
Прыцкераўская прэмія 2026 года дасталася чылійцу, які стварае міражы. Яго эстэтыка крохкасці перамагла манументальны пафас
-
Мінская мастачка кажа, што 10 гадоў таму ў яе забрала карціны куратарка выставы — і дагэтуль не вярнула. А сама эмігравала
-
Ультыматум Пуціну з лазні і абмеркаванне бургераў. Новыя пародыі на Лукашэнку рвуць інстаграм
Цяпер чытаюць
Лукашэнка: Абмяркоўваем з ЗША вызваленне палітвязняў9
Каментары