Канцэрт пачнецца а 21.45 па БТ, а пасьля — глядацкае галасаваньне.
Сёння адбудзецца канцэрт паўфіналістаў тэлевізійнага музычнага праекта «ЕўраФэст» — нацыянальнага адборачнага тура міжнароднага конкурсу песні «Еўрабачанне‑2008». Жывая трансляцыя пачнецца ў 21.45 на Першым тэлеканале. Адзіную беларускамоўную песню сярод 15 удзельнікаў паўфіналу выканае гурт «Палац», які яшчэ нядаўна быў у «чорным спісе».
Учора адбылося лёсаванне, кожны прадстаўнік гурта ці выканаўцы цягнуў канверт з парадкавым нумарам, пад якім ён будзе сёння выступаць.
«Палацу» дастаўся 12 нумар. Лідэр гурта Алег Хаменка сказаў у інтэрв’ю Еўрарадыё, што «па вялікім рахунку, больш задаволены нумарам, чым не».
Нагадаем, канцэрт распачне гурт «The Champions», пад другім нумарам выступіць Алена Валошына, далей — Юлія Гусева, дуэт Ганна Шаркунова і Герман Цітоў, Руслан Аляхно, Аксана Кавалеўская, гурт «PinCode», Віктар Пшанічны, Gunesh, праект «Скандал», гурт «По глазам», гурт «ПАЛАЦ» (12 нумар), гурт «Dali», Катрын. З 15‑м нумарам завяршае канцэрт гурт «Litesound».
Хаменка кажа, што з аднаго боку маюць перавагу тыя, што выступаюць першымі — у іх будзе большая аўдыторыя. Але да канца канцэрт даглядзіць моладзь, якая традыцыйна найбольш актыўна галасуе, лічыць Алег Хаменка.
Сярод удзельнікаў паўфіналу Хаменка адзначае гурты «По глазам» і «Dali».
«Нашая галоўная мэта зараз — з’явіцца на БТ, бо можа быць усё, што заўгодна. Калі пакажуць па БТ, значыць, мы ўжо дазволеныя. Вось гэта самае першае такое хваляванне», — кажа лідэр гурта «Палац».
Адзначым, што фіналісты (2‑3 выканаўцы) будуць вызначаныя па выніках інтэрактыўнага галасавання тэлегледачоў і галасавання журы. Тэлегледачы змогуць аддаць свой голас за ўпадабанага выканаўцу пасля выступлення ўсіх удзельнікаў.
Для гэтага трэба будзе патэлефанаваць на бясплатны нумар 8‑803‑100‑03‑ХХ (замест ХХ трэба набраць парадкавы нумар выканаўцы).
Спявачку Мэрыем Герасіменка на працягу двух гадоў збіваў муж43
Каментары