Навукоўцы: хімікаты ў нарошчаных валасах могуць павышаць рызыку раку грудзей
Згодна з вынікамі найбуйнейшага даследавання ў гэтай галіне, накладныя і нарошчаныя валасы, якія носяць мільёны жанчын па ўсім свеце, утрымліваюць хімічныя рэчывы, звязаныя з рызыкай развіцця раку грудзей, гарманальнымі парушэннямі і шкодай для рэпрадуктыўнага здароўя, піша ВВС.
Навукоўцы выявілі амаль 50 небяспечных хімічных рэчываў практычна ва ўсіх даследаваных узорах розных вырабаў з сінтэтычных і натуральных валасоў, уключаючы парыкі, валасы для пляцення касічак, накладныя і прышыўныя пасмы, а таксама накладкі на заколках.
Гэтыя вынікі, апублікаваныя ў часопісе Амерыканскага хімічнага таварыства, выклікалі заклікі да больш строгага кантролю над гэтай шматмільярднай галіной і павышэння інфармацыйнай празрыстасці для спажыўцоў.
«Мы давяраем кампаніям, ад якіх ніхто нават не патрабуе выключаць небяспечныя хімікаты са сваёй прадукцыі», — кажа доктар Элісія Франклін, вядучая аўтарка даследавання і навуковая супрацоўніца амерыканскага інстытута «Silent Spring», дзе вывучаюць уплыў навакольнага асяроддзя на рызыку ўзнікнення раку грудзей.
Паводле слоў навукоўцаў, нарошчаныя валасы асабліва небяспечныя тым, што іх носяць доўга, і яны пастаянна датыкаюцца са скурай.
Небяспечныя хімікаты
Вывучыўшы 43 узоры, даследчыкі выявілі ў іх 170 розных хімічных рэчываў. Для аналізу яны выкарыстоўвалі метад, які дазваляе выяўляць шырокі спектр рэчываў, а не канцэнтравацца на нейкім адным.
48 з іх уключаны ў асноўныя міжнародныя спісы небяспечных хімікатаў, у тым ліку ў спісы, складзеныя ААН і Еўрапейскім хімічным агенцтвам.
«Там было ўсё: ад вогнеахоўных рэчываў да пестыцыдаў, а таксама такія рэчывы, як фталаты, якія з'яўляюцца эндакрыннымі разбуральнікамі і, як вядома, звязаны з парушэннем рэпрадуктыўнай сістэмы», — кажа Франклін.
У 36 узорах валасоў для нарошчвання — як сінтэтычных, так і натуральных — было выяўлена 17 хімічных рэчываў, звязаных з ракам грудзей, і амаль 10% узораў утрымлівалі небяспечныя волаваўтрымлівальныя злучэнні, якія звычайна выкарыстоўваюцца пры вытворчасці цяжкаўспламяняльнага пластыку.
Навукоўцы кажуць, што былі здзіўлены, калі выявілі волаваўтрымлівальныя злучэнні, якія звычайна не сустракаюцца ў таварах шырокага спажывання. Гэтыя рэчывы могуць выклікаць раздражненне скуры. Яны вядомыя як эндакрынныя разбуральнікі і ўмешваюцца ў працу гармонаў, якія рэгулююць многія працэсы ў арганізме, уключаючы тыя, што адказваюць за яго развіццё і рэпрадуктыўную здольнасць.
Даследчыкі сцвярджаюць, што гэтыя хімічныя рэчывы правакуюць біялагічныя змены, падобныя да тых, якія выклікаюць вядомыя канцэрагены малочнай залозы, і з часам могуць павысіць рызыку развіцця раку грудзей.
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць4040
Каментары