Вулічныя мастакі з розных краін размалююць мінскія сцены паводле матываў гарадскога фальклору ў межах праекта Urban Myths, гаворыцца ў прэс-рэлізе супольнасці Signal, якая выступае ініцыятарам праекта.
Акцыя будзе доўжыцца з чэрвеня па лістапад 2015 года. У ёй возьмуць удзел мастакі з Беларусі, Бразіліі, Іспаніі, Украіны, Польшчы, Расіі і Швецыі.
Паводле слоў аднаго з арганізатараў праекта, куратара Цэнтра сучасных мастацтваў Камілы Янушкевіч, большасць стрыт-арт-фестываляў у свеце носяць «аднабаковы» характар. Як правіла, прыезджыя мастакі рэалізуюць свае праекты, не ўнікаючы глыбока ў мясцовы каларыт, у выніку чаго горад атрымлівае чужародныя арт-аб'екты, якія выдатна глядзяцца на фота, але не ўспрымаюцца жыхарамі.
«Мы ж у сваім праекце прапануем іншую канцэпцыю: для замежных мастакоў арганізуюцца экскурсіі па каларытных месцах горада. Любы ахвотны зможа далучыцца і дапоўніць расповед экскурсавода. Такая прагулка, на наш погляд, дазволіць госцю лепш успрыняць асаблівасці таго месца, куды ён прыехаў. Атрымаўшы веды пра горад, мастак распрацуе канцэпцыю сваёй работы і прапануе яе на публічным абмеркаванні (варкшопе). Мы хочам, каб у гэтых варкшопах удзельнічалі жыхары таго раёна, дзе будзе знаходзіцца аб'ект. І толькі пасля гэтага мастак пачне рэалізацыю задуманага, а ўсе астатнія ўдзельнікі варкшопаў змогуць быць валанцёрамі і дапамагаць майстру», — сказаў каардынатар праекта Алег Ларычаў.
На яго думку, міфы — важная частка гарадской ідэнтычнасці і культурнай кансалідацыі жыхароў. «Многія ведаюць дзеда Казіміра ў Мінску, старога Букашкіна ў Екацярынбургу, аўтобус-прывід у Лондане, а таксама легенды пра жалезнага ваўка ў Вільнюсе, загадкавыя танэлі пад Віслай у Варшаве або сатырычныя паходжанні бравага салдата Швейка ў Празе. Часта гарадскія супольнасці свядома фарміруюць і развіваюць мясцовую міфалогію. Як правіла, такія ініцыятывы садзейнічаюць росту турыстычнай прывабнасці гарадоў», — адзначыў Ларычаў.
Паводле яго слоў, арганізатары вядуць перамовы з тэхнічнымі партнёрамі праекта. Тым не менш, падкрэсліў Ларычаў, прыезд першых трох мастакоў з Іспаніі, Польшчы і Украіны стане магчымым дзякуючы народнаму фінансаванню праз беларускі краўдфандынгавы сэрвіс Talakosht.
На думку арганізатараў, прынцып краўдфандынгу дазволіць ацаніць зацікаўленасць мінчан у такім праекце і адчуць сябе далучанымі да пазітыўных змен у горадзе.
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню16
Каментары