Грамадскае аб'яднанне «Таварыства беларускай мовы імя Францішка Скарыны» (ТБМ) разглядае магчымасць стварэння кітайска-беларускага размоўніка, паведаміў старшыня ТБМ Алег Трусаў падчас выступлення 28 мая на VI Міжнародным кангрэсе беларусістаў у Мінску.
«Улічваючы асаблівая адносіны Беларусі і Кітая, было б добра стварыць кітайска-беларускі размоўнік», — растлумачыў Трусаў ініцыятыву арганізацыі.
Ён нагадаў, што за апошнія гады ТБМ выдала англа-беларускі і шведска-беларускі размоўнікі, а зараз працуе над стварэннем французска-беларускага размоўніка і рыхтуецца працаваць над фінска-беларускім.
Трусаў паведаміў удзельнікам кангрэса аб тым, што арганізацыя, якой летась споўнілася 25 гадоў, з'яўляецца заснавальнікам дзвюх беларускамоўных газет — «Наша слова» і «Новы час», двух часопісаў — «Лідскі летапісец» і «Верасень», мадэруе ўласны партал tbm-mova.by на беларускай і англійскай мовах.
ТБМ рэгулярна праводзіць міжнародныя канферэнцыі, у якіх бяруць актыўны ўдзел і члены Міжнароднай асацыяцыі беларусістаў — арганізатара кангрэса беларусістаў.
«Летась пад эгідай ТБМ выйшлі пробныя тэсты шасці ўзроўняў для ацэнкі ведаў па беларускай мове як замежнай. Нас вельмі цешыць той факт, што ў межах кангрэса адбудзецца абмеркаванне гэтай тэмы», — дадаў Трусаў.
VI Міжнародны кангрэс беларусістаў праходзіць 27—29 мая на базе Нацыянальнай акадэміі навук Беларусі. Ён з'яўляецца першым з мерапрыемстваў, прымеркаваных да 500-годдзя беларускага і ўсходнеславянскага кнігадрукавання, якое будуць адзначаць у 2017 годзе.
Асноўная частка працы форуму 28 і 29 мая пройдзе ў тэматычных секцыях, якія прысвечаныя старабеларускай і беларускай мовам, літаратуры, мовазнаўству, моўнай гісторыі з часоў Вялікага Княства Літоўскага і да нашых дзён, нацыянальнай самасвядомасці і ідэнтычнасці, рэлігіі і многаму іншаму. Цэнтральнай падзеяй кангрэса будзе серыя круглых сталоў на тэму «Францыск Скарына і яго час».
Цяпер чытаюць
Шрайбман з калегамі прапанавалі пакрокавы план дээскалацыі адносін Беларусі і ЕС39
Каментары