Hramadskaje abjadnańnie «Tavarystva biełaruskaj movy imia Franciška Skaryny» (TBM) razhladaje mahčymaść stvareńnia kitajska-biełaruskaha razmoŭnika, paviedamiŭ staršynia TBM Aleh Trusaŭ padčas vystupleńnia 28 maja na VI Mižnarodnym kanhresie biełarusistaŭ u Minsku.
«Uličvajučy asablivaja adnosiny Biełarusi i Kitaja, było b dobra stvaryć kitajska-biełaruski razmoŭnik», — rastłumačyŭ Trusaŭ inicyjatyvu arhanizacyi.
Jon nahadaŭ, što za apošnija hady TBM vydała anhła-biełaruski i šviedska-biełaruski razmoŭniki, a zaraz pracuje nad stvareńniem francuzska-biełaruskaha razmoŭnika i rychtujecca pracavać nad finska-biełaruskim.
Trusaŭ paviedamiŭ udzielnikam kanhresa ab tym, što arhanizacyja, jakoj letaś spoŭniłasia 25 hadoŭ, źjaŭlajecca zasnavalnikam dźviuch biełaruskamoŭnych haziet — «Naša słova» i «Novy čas», dvuch časopisaŭ — «Lidski letapisiec» i «Vierasień», maderuje ŭłasny partał tbm-mova.by na biełaruskaj i anhlijskaj movach.
TBM rehularna pravodzić mižnarodnyja kanfierencyi, u jakich biaruć aktyŭny ŭdzieł i členy Mižnarodnaj asacyjacyi biełarusistaŭ — arhanizatara kanhresa biełarusistaŭ.
«Letaś pad ehidaj TBM vyjšli probnyja testy šaści ŭzroŭniaŭ dla acenki viedaŭ pa biełaruskaj movie jak zamiežnaj. Nas vielmi ciešyć toj fakt, što ŭ miežach kanhresa adbudziecca abmierkavańnie hetaj temy», — dadaŭ Trusaŭ.
VI Mižnarodny kanhres biełarusistaŭ prachodzić 27—29 maja na bazie Nacyjanalnaj akademii navuk Biełarusi. Jon źjaŭlajecca pieršym ź mierapryjemstvaŭ, prymierkavanych da 500-hodździa biełaruskaha i ŭschodniesłavianskaha knihadrukavańnia, jakoje buduć adznačać u 2017 hodzie.
Asnoŭnaja častka pracy forumu 28 i 29 maja projdzie ŭ tematyčnych siekcyjach, jakija pryśviečanyja starabiełaruskaj i biełaruskaj movam, litaratury, movaznaŭstvu, moŭnaj historyi z časoŭ Vialikaha Kniastva Litoŭskaha i da našych dzion, nacyjanalnaj samaśviadomaści i identyčnaści, relihii i mnohamu inšamu. Centralnaj padziejaj kanhresa budzie sieryja kruhłych stałoŭ na temu «Francysk Skaryna i jaho čas».
Kamientary