Беларуская сацсетка VSeti.by адродзіцца з беларускім інтэрфейсам
Перазапуск прызначаны на 19:00 10 ліпеня.
Сацыяльная сетка VSeti.by паведаміла аб спыненні працы 30 лістапада 2014 года. Нядаўна на сайце з'явілася паведамленне аб аднаўленні працы.
«Дарагія сябры! Мы прынялі рашэнне зноў запусціць сацыяльную сетку Беларусі, — пішуць на сайце. — Усе вашыя звесткі захаваныя і будуць даступныя. У нас было дастаткова часу, каб падумаць над новым курсам развіцця сайта, вас чакае наперадзе шмат новага і цікавага».
Як распавёў Tut.by дырэктар сацсеткі Аляксандр Мяцеліца, у праекта з’явіліся новыя інвестары: «Да нас прыйшлі людзі, якія думаюць шырока і на перспектыву, якія разумеюць, што грошы сёння ёсць, а заўтра няма».
Пасля перазапуску чакаецца вяртанне каля траціны актыўных карыстальнікаў (па звестках на 2014 год сацсетка мела толькі некалькі тысяч актыўных карыстальнікаў). Рэгістрацыя ў сацсетцы стане закрытай — зарэгістравацца можна будзе толькі па запрашэнні дзейнага карыстальніка, што на думку Мяцеліцы падвысіць якасны склад аўдыторыі.
У сацсеткі з’явіцца інтэрфейс на беларускай мове, а дызайн стане больш строгім. Таксама з’явіцца інтэграцыя з «дзяржаўнымі сервісамі» (не ўдакладняецца, якімі менавіта) ды плацёжнымі сістэмамі.
Напярэдадні закрыцця сацсеткі Мяцеліца зрабіў рэзанансныя выказванні за ўвод расійскіх войскаў у Беларусь у выпадку прыходу апазіцыі да ўлады.
Чытайце таксама: TUT.BY выдаліць усе сляды першай беларускай сацсеткі
Каментары