«У Беларусі ніколі не было і ня будзе ў найноўшай гісторыі нейкіх нацыяналістычных памкненьняў. Прэзыдэнт на гэты конт выказваўся шмат разоў», — заявіў журналістам міністар замежных справаў Уладзімер Макей, пад старшынствам якога 1 ліпеня пры МЗС адбылося першае пасяджэньне Кансультатыўнай рады па справах беларусаў замежжа.
Макей адзначыў, што ў краіне жывуць прадстаўнікі больш як ста нацыянальнасьцяў.
«Нават адзін лаосец, паводле перапісу насельніцтва, жыве. І мы не хочам, каб нейкая нацыя дамінавала над прадстаўнікамі астатніх нацый і народнасцяў, якія жывуць у Беларусі. Такога не было і ніколі ня будзе. Гэта не палітыка беларускага кіраўніцтва, не палітыка прэзыдэнта Беларусі. Таму тут нацыяналізму ня будзе ніколі», — цытуе БелаПАН міністра.
Паводле Макея, нацыяналізм «сьпее толькі ў розумах дурных людзей, якія, напэўна, спрабуюць за мяжой ці дзесьці яшчэ дасягнуць, магчыма, сваіх нейкіх палітычных мэтаў»:
«Мы арыентаваныя на тое і зацікаўленыя ў тым, каб у Беларусі быў міжнацыянальны і міжканфэсійны мір, згода і спакой. І мы ня хочам, каб у Беларусі адбываліся падзеі, якія адбываюцца ў некаторых іншых краінах. За прыкладамі далёка хадзіць ня трэба».
Макей параіў супакоіцца ўсім, хто «нешта выдумляе пра рост нацыяналізму ў Беларусі».
У пасяджэньні Кансультатыўнай рады па справах беларусаў замежжа 1 ліпеня ўзялі ўдзел 32 дэлегаты з 18 краін, а вынікам працы стане стварэньне дарожнай карты, якая ляжа ў аснову падрыхтоўкі праграмы «Беларусы замежжа» на 2016—2020 гады.
Камэнтуючы выказваньні Ўладзімера Макея, старшыня ТБМ Алег Трусаў адзначыў:
«Я з ім згодны, нацыяналістычных памкненьняў у Беларусі ня будзе. У нас памкненьні толькі патрыятычныя. Трэба быць патрыётам, а не невядома кім. Патрыятызм — гэта асноўнае, што трэба гадаваць у Беларусі. І кожны грамадзянін павінен быць патрыётам. І ўсе гэтыя камунячыя выслоўі тыпу «нацыяналіст» — гэта нядобрая спадчына Савецкага саюзу. Мы не павінны шырока гэты савецкі тэрмін ужываць. А ўжываць нармальны тэрмін: «патрыя», «патрыятыст», «патрыёт». Спачатку «нацдэм» быў, потым «нацыяналіст» — гэта ўсё словы жахлівай таталітарнай савецкай спадчыны. Таму трэба ўжываць слова «патрыёт» і кожны грамадзянін, незалежна ад нацыянальнасьці, павінен быць патрыётам сваёй краіны».
Алег Трусаў мяркуе, што Макей адказвае «рускаму міру», калі раіць супакоіцца ўсім, хто «нешта выдумляе пра рост нацыяналізму ў Беларусі»:
«І я тут згодзен з ім. У нас ідзе рост патрыятызму. А ніякага нацыяналізму ў савецкім разуменьні няма. Але калі «рускі мір» на танках прыедзе, то будзе як ва Украіне. Тут ужо пачнецца невядома што. Ну, пакуль на танках не прыехалі, то, канечне, няма. А як прыедуць, то будзе. Якія зараз варожыя адносіны да ўсяго рускага ва Украіне! Ну, што рабіць, калі забралі Крым і забіваюць на Данбасе кожны дзень? Так што ў дадзеным выпадку я за патрыятызм і супраць гэтых савецкіх тэрмінаў».
Таксама Алег Трусаў адзначыў, што Макей, у адрозьненьне ад іншых, ведае шмат замежных моваў і цудоўна гаворыць па-беларуску: «Каб такія ўсе былі, то, канечне, патрыятызму ў краіне было б намнога болей. А калі чалавек бяз рускага мата ня можа трох словаў звязаць, то які з яго патрыёт?»
Цяпер чытаюць
Загінуў беларускі добраахвотнік Васіль «Дзір» Рапіцкі11
Каментары