Указам прэзідэнта вызначаны парадак засялення грамадзян у пабудаваныя жылыя дамы
Аляксандр Лукашэнка падпісаў указ № 400, які вызначае парадак засялення грамадзян у пабудаваныя жылыя дамы, забяспечвае загрузку і павышае эфектыўнасць працы арганізацый буйнапанэльнага домабудавання, паведаміла прэс-служба прэзідэнта.
Дакумент уносіць дапаўненні ва ўказ № 26 «Аб мерах па ўдасканаленні будаўнічай дзейнасці» ад 14 студзеня 2014 года. Вызначаюцца ўмовы, пры адначасовым выкананні якіх грамадзянін лічыцца заселеным у жылое памяшканне: атрыманне ключоў ад кватэры; забеспячэнне доступу і магчымасці карыстання ёю па прызначэнні; адсутнасць заўваг па якасці выкананых работ.
Уводзяцца нарматыўныя прадпісанні для замоўнікаў, забудоўшчыкаў па забеспячэнні ўмоў для засялення грамадзян у месячны тэрмін з дня зацвярджэння акта прыёмкі шматкватэрнага жылога дома ў эксплуатацыю.
Прадугледжаныя таксама змены ва ўказ № 263 «Аб долевым будаўніцтве аб'ектаў у Рэспубліцы Беларусь» ад 6 чэрвеня 2013 года. У прыватнасці тэрміны перадачы дольшчыку канчатковага разліку кошту аб'екта долевага будаўніцтва і дакументаў для дзяржрэгістрацыі права ўласнасці на пабудаваны аб'ект скарачаюцца з аднаго каляндарнага месяца да дваццаці пяці каляндарных дзён і да двух дзён адпаведна.
Апрача таго, прадугледжваецца, што дольшчыку, які поўнасцю выплаціў цану аб'екта, аб'ект будзе перадавацца незалежна ад наяўнасці іншых дольшчыкаў, якія маюць запазычанасць перад забудоўшчыкам.
Дапаўненні ўносяцца і ва ўказ № 667 «Аб канфіскацыі і прадастаўленні зямельных участкаў» ад 27 снежня 2007 года. Дапаўненні тычацца выдзялення арганізацыям буйнапанэльнага домабудавання ўчасткаў для будаўніцтва шматкватэрных жылых дамоў у Мінску і абласных цэнтрах без правядзення аўкцыёнаў.
Указ № 400 набудзе моц праз тры месяцы пасля яго афіцыйнага апублікавання.
Загінуў беларускі добраахвотнік Васіль «Дзір» Рапіцкі11
Каментары