Што адбывалася на выбарчых участках ФОТЫ і ВІДЭА
Выбарчы ўчастак №40, 34
Выбарчыя ўчасткі знаходзяцца на Трактарным заводзе у ДК «Трактар». На ўваходзе нас сустрэла выязная камісія, якая несла скрыню.
На ўваходзе нас сустрэў аркестр:
На ўваходзе грае аркестр, знутры знаходзіцца буфет, піва ўсяго па 9 тысяч за 0,5 л.
Бабуля Галіна чакае выступу ансамблю. «Я не прыйшла галасаваць, а хачу паслухаць беларускі ансамбль».
На выбарчым участку №40 раздаюць шакаладкі «Алёнка». Калі мы падышлі да членаў выбарчай камісіі, яны схавалі іх.
— У вас што, некая акцыя з шакаладкамі?
— Ніякіх акцый, мы даём іх толькі дзецям, таму што гэта нашая будучыня.
Сярод назіральнікаў прысутнічае Вольга Мікалайчык. Адзін з членаў камісіі сказаў ёй, што шакаладкі набываў ён сам за свае грошы. На пытанне, адкуль у яго такія грошы, бо шакаладак было больш за тысячу, яна адказу не атрымала.
Участак №19
Самы вялікі па колькасці выбаршчыкаў участак. Справа ў тым, што прагаласаваўшым давалі жэтоны, якія даюць магчымасць атрымаць «сацыяльня-электаральны» пакунак.
Пасля такіх падарункаў некаторых цягне ў скокі:
Людзі мітусяцца туды-сюды, гандаль ідзе поўным ходам, да піва прадаюць нават рыбку.
Як толькі мы пачалі здымаць нецвярозага мужчыну, які танчыў, да нас падышоў малады міліцыянт і папрасіў нідзе не размяшчаць відэа. Мы яму культурна адмовілі, і ён тут жа папрасіў дакументы, каб перапісаць дадзеныя. Да нас падышоў другі міліцыянт і сказаў: «Слухай, калі гэта СМІ, адпусці іх і ўсё. О, а вы з «Нашай Нівы», я калісьці пісаў вам. У вас штат змяніўся, я вас раней не бачыў».
Зноў пераблытаўшы НН з сельскагаспадарчай газетай «Беларуская ніва», міліцыянт перапісаў дадзеныя і сышоў.
Участак №19
Тут вялікі аншлаг у буфеце, нізкія цэны, ветлівыя прадавачкі прапанавалі нам не набываць ваду, а ўзяць бясплатна, нягледзячы на тое, што мы і не галасавалі.
Пакуль бегалі, вырашылі набыць мінералкі, дык прадавачкі цэлую бутэльку бясплатна далі! Як аказалася, выбаршчыкам таксама даюць бясплатна мінералку і піражок.
Здзвіла маленькая колькасць людзей, якая менавіта галасуе. Склалася ўражанне, што ўсе прыйшлі ў буфет.
Участкі №47 і №48
Самая гарачая вечарына адбывалася на прыступках ДК МАЗ. Там і бойкі, і свята, шашлыкі і гарэлка.
Знутры чамусьці ўсё наадварот: усё прыгожа, з іголачкі адзетая выбарчая камісія. З намі імкнуліся размаўляць па-беларуску. Вялікі ўчастак — бачна, што аб'ядналі шмат вуліц, таму і камісія вялікая.
Два ўчасткі знаходзяцца насупраць адзін аднаго. Мы зарэгістравалася на участку 48 і сталі фатаграфаваць абодва ўчасткі. Тут да нас падышла старшыня камісіі ўчастка №47 і папрасіла зарэгістравацца яшчэ і ў іх. «Не смейцеся», — заявіла старшыня.
Участак №23
Душэўны ўчастак. Старшыня камісіі размаўляла на чыстай беларускай мове, была вельмі ветлівая. Праўда, людзей неяк няшмат. Нават сталоўка пустая.
Вучні каледжа выставілі на паказ свае працы: праекты ўласных і шматпавярховых дамоў.
— Ці прадаяце свае праекты ўласных дамоў чыноўнікам?
— Ну, бывае.
— А за каго галасавалі?
— Гэта вельмі прыватнае пытанне.
Участак №22
Самы грубы ўчастак. «Зараз нас будуць здымаць» — такімі словамі па-беларуску за нашымі спінамі сустрэў адзін з членаў камісіі. Старшыня камісіі разглядаў нашыя дакументы хвілін 10. Але калі ён узяў лупу і пачаў разглядаць нашыя дакументы яшчэ пільней, то гэта выклікала толькі вялікую ўсмешку.
Людзей было няшмат, разы ў тры больш было алкаголю на паліцах. Вырашылі паразмаўляць з прадавачкамі.
— Мы ўчора да ночы тут усё расстаўлялі.
— Вам хоць заплоцяць за гэта?
— Ну, будзем спадзявацца.
Сапраўды, экспазіцыя бананаў, з якіх звешваўся вінаград, проста ўражвала.
Сусветная зорка Джэйсан Дэрула заехаў у Беларусь. Прэм’ер Турчын вадзіў яго па Доме ўрада8
Каментары