Галоўным следчым упраўленнем Следчага камітэта завершана расследаванне крымінальнай справы ў дачыненні да членаў арганізаванай групы, што выкралі ў грамадзян Рэспублікі Беларусь буйныя сумы грошай на падставе ўдзелу ў здзелках па куплі алмазаў з Афрыкі, паведамляецца ў інфармацыі СК.
Расследаванне крымінальнай справы ажыццяўлялася ў цесным узаемадзеянні з Галоўным упраўленнем па барацьбе з арганізаванай злачыннасцю і карупцыяй Міністэрства ўнутраных спраў.
Устаноўлена, што план падману пацярпелых і крадзяжу іх грошай распрацаваў 51-гадовы жыхар Гродзенскай вобласці. Акрамя яго ў склад арганізаванай групы ўваходзілі яшчэ двое мужчын, 1976 і 1977 гадоў нараджэння.
План быў у тым, што для патэнцыйных пакупнікоў, якія жадаюць набыць каштоўныя камяні, ствараўся вобраз людзей, здольных аказаць дапамогу ў набыцці алмазаў у краінах Афрыкі.
Для гэтага ілжэгандляры распаўсюджвалі непраўдзівыя звесткі аб наяўнасці сувязяў з асобамі, якія займаюцца здабычай і продажам алмазаў на афрыканскім кантыненце.
Для тых, хто сумняваўся, ашуканцы арганізоўвалі паездкі ў Намібію і Уганду, каб прадэманстраваць прапанаваныя каштоўныя камяні.
Пасля атрымання грошай члены арганізаванай групы, каб адвесці ад сябе падазрэнні і стварыць бачнасць выканання са свайго боку ўсіх дамоўных абавязацельстваў, абвінавачвалі пакупнікоў у парушэнні дамоўленасцей, дасягнутых паміж бакамі. А ў адным выпадку нават арганізавалі фальшывае затрыманне аднаго з пацярпелых праваахоўнымі органамі Рэспублікі Уганда і спрабавалі атрымаць ад жонкі апошняга грошы за яго вызваленне з «турмы».
Гэтая схема выкарыстоўвалася ашуканцамі з 2011 па 2014 год.
Па крымінальнай справе выяўлена 11 пацярпелых. Агульная сума нанесенай шкоды ў эквіваленце складае больш за 700 тысяч даляраў ЗША.
Усім удзельнікам арганізаванай групы прад'яўленае абвінавачванне па ч. 4 арт. 209 (махлярства, здзейсненае ў асабліва буйным памеры) Крымінальнага кодэкса Рэспублікі Беларусь. Мера стрымання ў дачыненні да іх не змянялася - яны змешчаны пад варту.
Крымінальная справа перададзена пракурору для накіравання ў суд.
Цяпер чытаюць
«Кіберпартызанаў» крытыкуюць за ўзлом сайта Нацбібліятэкі — бо цяпер не працуе каталог. Тыя адказалі8
Каментары