Супрацоўнікамі ўпраўлення крымінальнага вышуку УУС Мінскага аблвыканкама раскрыта спроба заказнога забойства.
Як паведамілі ва УУС Мінаблвыканкама, завяршальная стадыя комплексу аператыўна-вышуковых мерапрыемстваў прайшла днём 10 сакавіка ў Салігорску. Супрацоўнікі крымінальнага вышуку і АМАП УУС затрымалі 68-гадовую мясцовую жыхарку, падазраваную ў арганізацыі заказнога забойства, а таксама яе 36-гадовага памочніка.
Паводле інфармацыі міліцыі, каля месяца таму жанчына пачала шукаць чалавека, які мог бы ліквідаваць яе пажылога мужа. Пошук выканаўцы праводзіўся з захаваннем канспірацыі, жанчына лічыла, што выканаўцу можна знайсці ў асяроддзі раней судзімых асоб. Непасрэдна за забойства заказчыца гатовая была заплаціць каля 10 тыс. долараў ЗША. Канчатковы разлік мог вар'іравацца ў залежнасці ад «якасці» выканання «паслугі».
Паводле папярэдніх дадзеных, акрамя непрыязных адносін, адным са злачынных матываў стаў матэрыяльны складнік. Муж меў значныя фінансавыя сродкі, доступ жонкі да якіх быў вельмі абмежаваным.
Галоўным следчым упраўленнем Следчага камітэта распачата справа па некалькіх прыкметах складу злачынства, у тым ліку па арт. 139 КК (забойства). Праводзіцца расследаванне.
Каментары