Супрацоўнікі міліцыі шукаюць пацярпелых ад дзеянняў дырэктара ТАА «Супрэмасі» (Мінск), якая пад маркай пастаўкі машын з Расіі завалодала грашыма каля сотні беларускіх грамадзян. Пра гэта паведаміла прэс-афіцэр Ленінскага РУУС сталіцы Таццяна Кавалёва.
З 2014 года дырэктар ТАА «Супрэмасі» ў інтэрнэце размяшчала аб'явы пра пастаўку аўтамабіляў з Расіі ў Беларусь. Пры гэтым паміж фірмай і кліентамі заключаліся дамовы, паводле якіх машыны павінны былі быць пастаўленыя на працягу 15-30 рабочых дзён. Сродкі перадаваліся дырэктару ТАА наяўнымі або залічваліся на рахунак, аднак у прызначаны час аўто на розных падставах пастаўленыя не былі, а грошы грамадзянам не вярталіся альбо вярталіся часткова.
З 2015 года ТАА «Супрэмасі» пачало супрацоўнічаць з расійскай кампаніяй «Салідэ», размешчанай у горадзе Вялікія Лукі Пскоўскай вобласці. Заснавальнікам дадзенай фірмы з'яўляўся грамадзянін Рэспублікі Беларусь, жыхар Мінска. У гэтым выпадку паміж ТАА «Супрэмасі» і замоўцамі таксама заключаліся дамовы на пастаўку аўтамабіляў, аднак грошы пералічваліся на рахунак кампаніі «Салідэ». Першапачаткова машыны сапраўды пастаўляліся ў адрас замоўцаў, аднак пасля пастаўкі былі прыпыненыя. Дырэктарам ТАА «Супрэмасі» з розных прычынаў тэрміны пастаўкі павялічваліся, складаліся дадатковыя дагаворы, пры гэтым грошы, якія паступалі наяўнымі ў касу прадпрыемства, не фіксаваліся.
На гэты час выяўлена каля 30 пацярпелых ад дзейнасці фірмаў. У дачыненні да дырэктара ТАА «Супрэмасі» Ленінскім (г. Мінска) РАСК распачатая крымінальная справа па факце махлярства.
У Ленінскім РУУС просяць пацярпелых звяртацца асабіста або па тэлефонах (029) 356-02-20, (029) 169-46-19, (017) 368-63-49, (29) 658-78-17 альбо 102.
Каментары