Тры гады абмежавання волі атрымаў веласіпедыст, які насмерць збіў пенсіянера ў Дрыбінскім раёне
Тры гады абмежавання волі атрымаў веласіпедыст, які насмерць збіў пенсіянера ў Дрыбінскім раёне. ДТЗ адбылося ў ліпені мінулага года ў вёсцы Кароўчына. 34-гадовы магілёвец ехаў на веласіпедзе па вуліцы Цэнтральнай, хуткасць руху развіў да значэння каля 38 км/г.
— Маючы рэальную магчымасць выявіць 78-гадовага пешахода, які знаходзіўся на праезнай частцы, своечасова мер да зніжэння хуткасці руху, аж да прыпынення, не прыняў і здзейсніў на яго наезд. Хоць адлегласць, з якой веласіпедыст мог выявіць пешахода, дазваляла яму прадухіліць дарожна-транспартнае здарэнне, — адзначыла афіцыйны прадстаўнік УСК па Магілёўскай вобласці Аксана Салянюк.
У выніку пенсіянер атрымаў адкрытую чэрапна-мазгавую траўму, пераломы костак зводу і асновы чэрапа і іншыя траўмы галавы, ад якіх памёр у бальніцы.
— Веласіпедыст ў дадзенай дарожнай сітуацыі груба парушыў падпункт 87.2 пункта 87 Правіл дарожнага руху Рэспублікі Беларусь, які абвяшчае: «Пры ўзнікненні перашкоды або небяспекі для руху, якія кіроўца ў стане выявіць, ён абавязаны неадкладна прыняць меры да зніжэння хуткасці руху, аж да спынення транспартнага сродка», — акцэнтавала Аксана Салянюк.
Магілёўцу было прад'яўленае абвінавачванне ў здзяйсненні злачынства, прадугледжанага ч. 2 арт. 321 КК Рэспублікі Беларусь. (Парушэнне правілаў, якія забяспечваюць бяспечную працу транспарту, што пацягнула па неасцярожнасці смерць чалавека). Суд Дрыбінскага раёна вынес абвінаваўчы прысуд — тры гады абмежавання волі з накіраваннем у выпраўленчую ўстанову адкрытага тыпу. Прысуд уступіў у законную сілу.
Цяпер чытаюць
Бацька са Слуцка папрасіў дзяржаву забраць яго дзяцей дзеля аднаўлення маральных сіл1
Каментары