17 футбалістаў і трэнер праходзяць па справе аб дамоўных матчах у Беларусі
Следчы камітэт Беларусі працягвае расследаванне крымінальнай справы аб правядзенні дамоўных матчаў у чэмпіянаце Беларусі па футболе.
Як паведамляецца на сайце камітэта, у якасці падазраваных і абвінавачаных па крымінальнай справе праходзяць 18 чалавек: два былыя футбалісты, адзін з якіх займаўся трэнерскай працай, 14 футбалістаў клубаў «Іслач», «Ашмяны» і «Прамень», былы трэнер ФК «Іслач» і грамадзянін Украіны.
Тэрмін папярэдняга расследавання падоўжаны да снежня 2016 года.
Як адзначаецца ў паведамленні, некаторыя футбалісты самастойна з'явіліся з павіннай. Яны могуць прэтэндаваць на спыненне крымінальнага пераследу ў дачыненні да іх на падставе арт. 30 Крымінальна-працэсуальнага кодэкса Беларусі.
Нагадаем, у ліпені праваахоўнікі паведамілі пра выяўленне дамоўных матчаў у першай лізе. Пад падазрэнне трапілі паядынкі «Баранавічы» — «Ашмяны» (1:0, 5 чэрвеня) і «Ашмяны» — «Прамень» (3:3, 2 ліпеня).
У жніўні з'явілася інфармацыя аб тым, што супрацоўнікі галоўнага ўпраўлення па барацьбе з арганізаванай злачыннасцю і карупцыяй МУС выявілі факт арганізацыі дамоўнага матчу ў вышэйшай лізе паміж камандамі «Іслач» — «Дынама-Брэст», які прайшоў 30 красавіка 2016 года.
У загінулай у Сляпянцы дзяўчыне апазналі Яну Кастранкову2
Каментары