Цуду ня здарылася: сёньня Савет Рэспублікі ўхваліў закон аб СМІ, які Беларуская асацыяцыя журналістаў вызначыла ёмістым эпітэтам — ганебны. Камэнтуе ў сваім блогу Аляксандар Класкоўскі.
Цуду ня здарылася: 28 чэрвеня Савет Рэспублікі ўхваліў закон аб СМІ, які Беларуская асацыяцыя журналістаў вызначыла ёмістым эпітэтам — ганебны.
А калі без экспрэсіі, то юрысты БАЖу зрабілі на 17 аркушах грунтоўны аналіз усіх нюансаў гэтага тыповага твору забароннага мысленьня. Падобны аналіз быў таксама апэратыўна зроблены і офісам прадстаўніка ў пытаньнях свабоды мэдыяў АБСЭ.
Высновы, калі без залішняга палітэсу, зводзяцца да таго, што закон цемрашальскі. Перад другім чытаннем у Палаце прадстаўнікоў дакумэнт быў касмэтычна падкарэктаваны, але галоўныя пасткі (у тым ліку — для інтэрнэту, заснавальнікаў СМІ, журналістаў, што працуюць на замежжа) засталіся.
Тэарэтычна існуе імавернасьць, што закон тармазьне кіраўнік дзяржавы. На кіроўную вярхоўку Беларусі абрынуўся шквал зваротаў міжнародных інстытуцыяў з заклікам накіраваць дакумэнт на перапрацоўку, зрабіць ягоную грунтоўную экспэртызу паводле цывілізаваных стандартаў. Але, мусіць, ня дзеля таго ў тутэйшым заканадаўчым органе прымалі гэты драконаўскі акт у рэжыме абваранай кошкі, каб зараз спыняцца.
Адно што чыноўнікі так і не дапялі толкам, як зацугляць інтэрнэт (маўляў, хто параіць, дзякуй скажам!). Таму і пакідаюць сабе рэзэрву часу ды заслупоўваюць магчымасьць "рэглямэнтаваць" сеціва падзаконнымі актамі. Зараз будуць маракаваць, як ямчэй ухапіць за гарляк віртуальную вольніцу.
Закон набывае моц цераз паўгоду пасьля падпісаньня прэзыдэнтам. Чыноўнікі усяляк запэўнівалі: няпраўда, што мы сьпяшаемся прыняць яго пад сёлетнія парлямэнцкія выбары! І тут ім можна паверыць. Увосень і так ніякіх забурэньняў не прадбачыцца. Бяры вышэй! Найхутчэй што маецца на мэце канчатковая "зачыстка" мэдыйнай прасторы (і найперш ўэбу) пад наступную прэзыдэнцкую кампанію.
Так што заклікі прагрэсіўнай усясьветнай супольнасьці бадай што будуць як гарох аб сьценку. Цікава, якія гэта сыгналы зь Менску аб гатовасьці да лібэралізацыі убачылі ў Варшаве? Вось адмова ад карнага закону была б сапраўды сыгналам Эўропе. Але ж тут той выпадак, калі імідж — нішто, прага ўлады — усё.
ЗЫ. Для цікаўных — красамоўныя выказваньні сьпікера ніжняй палаты датычна рэгуляваньня інтэрнэту. No comment.
Цяпер чытаюць
У Суле адзначылі Купалле. Гасцей было столькі, што на дарогах утварыліся заторы9
Каментары