29 снежня суд Цэнтральнага раёна Гомеля абвясціў прысуд у дачыненні да 23-гадовага жыхара абласнога цэнтра, які абвінавачваецца ў шэрагу злачынстваў, у тым ліку крадзяжы, згвалтаванні і гвалтоўных дзеяннях сэксуальнага характару.
Як паведамілі БелаПАН у судзе Цэнтральнага раёна, па сукупнасці злачынстваў малады гамяльчанін пакараны 10 гадамі пазбаўлення волі.
Згвалтаванне і гвалтоўныя дзеянні сэксуальнага характару былі ўчынены ў маі 2016 года, пацярпелая — мясцовая 45-гадовая жыхарка, з якой абвінавачваны пазнаёміўся ў дзень учынення злачынства.
У гарадской пракуратуры дадалі, што гэта сёмая судзімасць у абвінавачванага. Ён са школьнай лавы часта трапляў у поле зроку праваахоўных органаў, вучыўся ў спецыяльным класе і адбываў пакаранне за маёмасныя злачынствы ў калоніі для непаўналетніх.
У «паслужным спісе» абвінавачванага — крадзяжы, рабаванні, згвалтаванні. Пасля чарговага адбыцця пакарання жыхар Гомеля выйшаў на волю 25 сакавіка 2016 года, а ўжо ў маі ўчыніў чарговае цяжкае злачынства.
Прысуд не набыў законную моц, можа быць абскарджаны і апратэставаны.
Каментары