Мястэчка Івянец з 18 да 20 ліпеня стане месцам сустрэчы з Папам Бэнэдыктам XVI пры дапамозе тэлемосту з Аўстраліі.
Моладзь з усяго свету кожныя некалькі гадоў збіраецца ў розных краінах і на розных кантынентах, каб яднацца ў малітве разам з Папам.
Сёлета Сусветны дзень моладзі адбудзецца ў Сіднэі (Аўстралія). З Беларусі ў ёй будзе прымаць удзел група моладзі з некалькіх чалавек на чале з Генеральным вікарыем Мінска‑Магілёўскай архідыяцэзіі біскупам Антоніем Дзям’янкам.
Паколькі ў далёкую Аўстралію змагла паехаць абмежаваная колькасць беларускай моладзі, а ахвотных перажыць Сусветную сустрэчу моладзі разам з Папам Бэнэдыктам XVI у сотні разоў больш, было вырашана арганізаваць свой уласны «беларускі Сіднэй». Ім стала мястэчка Івянец (60 км ад Мінска) на тэрыторыі Мінска‑Mагілёўскай архідыяцэзіі.
«Беларускі Сіднэй» з 18 да 20 ліпеня стане сапраўдным месцам малітвы, радасці і сустрэчы з Папам Бэнэдыктам XVI. Маладыя людзі змогуць сустрэцца з ім з дапамогай тэлемаста, які спалучыць Івянец і Сіднэй. Адбудзецца два прамых уключэнні: у суботу 19 ліпеня а 11.00 гадзіне, калі адбудзецца вігілія разам са Святым Айцом, і а 2.00 гадзіне ўначы 20 ліпеня, калі Папа будзе цэлебраваць урачыстую Літургію, прамовіць казанне, а таксама абвесціць дату і месца правядзення наступнага Сусветнага дня моладзі. Спецыяльна для гэтага будзе ўстаноўлены вялікі светадыёдны экран.
Адметнасцю сёлетняга дня моладзі стане канцэрт з удзелам знакамітых хрысціянскіх музычных калектываў з Польшчы («Arka Noego» i «2 Tm 2, 3») і Беларусі («Небасхіл», «Ave», «Ruach» і інш.). Для яго будзе пабудавана вялікая сцэна і забяспечаны прафесійныя гук і святло.
Кожная дыяцэзія (у Беларусі іх 4) падрыхтавала сваю прэзентацыю. Формы прэзентацый розныя: пачынаючы ад музычнай і заканчваючы візуальнай.
Падчас Міждыяцэзіяльнага дня моладзі ў Івянцы адбудуцца таксама адмысловыя катэхезы. Адну з іх прамовіць да беларускай моладзі Мітрапаліт Тадэвуш Кандрусевіч.
Святую Імшу 19‑га ліпеня а 19.00 гадзіне будзе цэлебраваць кардынал Казімір Свёнтэк, а заключную святую Імшу 20‑га ліпеня — арцыбіскуп Тадэвуш Кандрусевіч.
Адной з адметнасцяў духоўнай часткі сустрэчы стануць сведчанні, якія прамовіць моладзь з розных дыяцэзій, аб сваім шляху да Хрыста.
На працягу ўсёй сустрэчы спецыяльная група з некалькіх дзесяткаў чалавек будзе сачыць за парадкам. Моладзь будзе забяспечана начлегамі і ежай. Дарэчы, кухняй будуць займацца ваеннаслужачыя з суседняй вайскоўцы
На выпадак неспрыяльнага надвор’я на пляцы каля касцёла пастаўлены два вялікія шатры (кожны прыкладна на паўтары тысячы чалавек).
Па ўласніку «Софтклуба» Сіротку, які сядзіць у СІЗА КДБ, прыляцела і ад Польшчы — на яго крыптабіржу Bynex наклалі санкцыі2
Каментары