У гаспадарках Віцебшчыны масава затрымліваюць выплаты сезонным работнікам
Пра гэта кажуць работнікі з розных раёнаў.
У аграгаспадарках Віцебшчыны масава затрымліваюць выплаты сезонным работнікам, паведамляе канал «Віцебск, я гуляю».
Абвастрылася праблема з затрымкай выплат людзям, якія працуюць у аграпрадпрыемствах не ў штаце — так званым «дамоўнікам». Праблема цягнецца гадамі, але цяпер, мяркуючы па паведамленнях з розных раёнаў, яна абвастрылася як ніколі — затрымкі ахапілі многія раёны вобласці.
Сігналы прыходзяць з Сенненскага, Браслаўскага, Лепельскага, Полацкага і Глыбоцкага раёнаў. У Сенненскім раёне ў ліку даўжнікоў называюць гаспадаркі «Ульянавічы», «Літусава», «Бяленева», «Студзёнка», а таксама «Саўгас ім. Машэрава». Паведамляюць аб затрымках у аграпрадпрыемствах «Браслаўскі» (аг. Мількі) і «Лепельскае» (аг. Вялікі Поўсвіж) — там, па словах людзей, не выдаюць яшчэ за верасень. У «Клясціцах-Агра» — філіяле полацкай «Сафійкі» — паведамляюць пра нявыплаты за верасень-кастрычнік. Асобна згадваецца і глыбоцкая гаспадарка «Канстанцінаў Двор».
Таксама вядомыя выпадкі затрымак у Шумілінскім і Лёзненскім раёнах — людзі пішуць аб праблеме, якая цягнецца яшчэ са жніўня 2025 года, але без удакладнення канкрэтных гаспадарак.
Каментары