Грузія ніколі не прызнае «выбары» і «рэферэндум», якія праходзяць сёння, 9 красавіка, у Паўднёвай Асеціі
Правядзенне сепаратыстамі Паўднёвай Асеціі «прэзідэнцкіх выбараў» і «рэферэндуму» аб змене назвы рэгіёну не будзе мець прававых наступстваў, заявіў МЗС Грузіі. Тбілісі абвінаваціў Расею ў падрыхтоўцы да анэксіі Паўднёвай Асеціі, паведамляе «Нямецкая хваля».
Міністэрства замежных спраў Грузіі назвала нелегітымнымі «прэзідэнцкія выбары» і «рэферэндум», якія праходзяць у нядзелю, 9 красавіка, у самаабвешчанай «рэспубліцы» Паўднёвая Асеція.
«МЗС Грузіі асуджае так званыя прэзідэнцкія выбары і рэферэндум, што праходзяць 9 красавіка на тэрыторыі акупаванага Цхінвальскага рэгіёну. Паводле міжнароднага права, любыя так званыя выбары ці рэфэрэндум на акупаваных тэрыторыях Грузіі з'яўляюцца незаконнымі і не будуць мець якіх-небудзь прававых наступстваў», - падкрэсліваецца ў заяве грузінскага замежнапалітычнага ведамства.
У дакуменце ўказваецца, што тыя мерапрыемствы з'яўляюцца «правакацыйнымі і груба парушаюць тэрытарыяльную цэласнасць і суверэнітэт Грузіі». Грузінскі МЗС таксама выказаў меркаванне, што «спроба змяніць назву найстарэйшага рэгіёну Грузіі і даць яму назву, падобную да назвы аднаго з суб'ектаў РФ - «Рэспубліка Паўднёвая Асеція - Дзяржава Аланія», скіравана на падрыхтоўку асновы для незаконнай анексіі рэгіёну».
Замежнапалітычнае ведамства ў Тбілісі абвінаваціла Расею ў тарпедаванні намаганняў па мірным ўрэгуляванні грузіна-асяцінскага канфлікту і заклікала Маскву паважаць нормы міжнароднага права і вывесці свае войскі з тэрыторыі Грузіі.
Раней у Дзярждэпартаменце ЗША асудзілі «выбары» і «рэферэндум» у мяцежных грузінскіх рэгіёнах Паўднёвая Асеція і Абхазія. Вашынгтон пацвердзіў сваю прыхільнасць тэрытарыяльнай цэласнасці Грузіі.
Незалежнасць Паўднёвай Асеціі пасля вайны 2008 года прызналі, апроч Расіі, толькі Венесуэла, Нікарагуа ды дзве астраўныя дзяржавы — Науру і Вануату.
Палякі купляюць дамы ў Беларусі — цікавяцца, ці хопіць на жыццё еўрапейскай пенсіі, і радуюцца смешным выдаткам9
Каментары