Суддзя Раздольненскага раённага суда Марыя Бядрыцкая асудзіла ўкраінскага актывіста Уладзіміра Балуха да 3 гадоў і 7 месяцаў пазбаўлення волі ў калоніі-пасяленні і штрафу ў 10 тысяч расійскіх рублёў (каля 300 беларускіх), піша Украінская праўда.
Яго абвінавацілі ў незаконным захоўванні боепрыпасаў і выбуховых рэчываў, якія нібыта былі знойдзеныя на гарышчы яго дома.
44-гадовы хлебароб Уладзімір Балух жыве на ўскраіне вёскі Серабранка, што за 18 кіламетраў ад найменшага раённага цэнтра Крыма — пасёлка Раздольнае.
У снежні 2013 года, з пачаткам Майдану, Уладзімір вывесіў на даху сваёй хаты ўкраінскі сцяг. Сцяг Украіны Балух вывесіў і пасля анексіі Крыма Расіяй.
«Гэта далучэнне я не прызнаю. Нават пашпарт расійскі сабе не стаў рабіць. Спрабаваў жыць, як раней: апрацоўваў свае 45 гектараў пшаніцы і аўса і прадаваў», - казаў крымчук. Ён растлумачыў, што сабранага ўраджаю хапае толькі на жыццё.
У красавіку 2015 года да яго ў дом упершыню прыйшлі супрацоўнікі ФСБ. Уладзімір быў у гэты час у сяброў і вырашыў схавацца, толькі праз 11 дзён вярнуўся дадому.
За той час сілавікі былі ў яго маці 4 разы: усё перавярнулі падчас вобшукаў. Сцяг Украіны сарвалі.
Жонка паведаміла Уладзіміру, што яго падазраюць у крадзяжы запчастак да трактара. Паводле версіі следства, аб крадзяжы Балух нібыта сам распавёў у пяльменнай за чаркай выпадковаму чалавеку.
У наступны раз да яго ў дом уварваліся праз паўгода — 14 лістапада. Цяпер яго абвінавацілі ў крадзяжы аўтамабіля ВАЗ, пра што ён нібыта зноў жа распавёў у пяльменнай.
«Пачалі біць… Два разы па галаве стукнулі відавочна не рукой. Я абмяк. Выцягнулі з спальні ў споднім і матросцы. У калідоры засунулі ў галёшы і пацягнулі да машыны. Там паклалі на задняе сядзенне. А я адчуваю, што рукі моцна кайданкамі сціснулі. Папрасіў: «аслабце хоць кайданкі». і яны адпусцілі вось такім чынам: выцягнулі з машыны, кінулі на зямлю, і адзін паставіў мне нагу на галаву, а два іншых паслабілі кайданкі», - распавёў Балух.
Ператрус у яго доме ні аўтамабіля ВАЗ-2106, ні нават слядоў ад яго не выявіў. На фермера распачалі справу за «абразу прадстаўніка ўлады».
А ў снежні ФСБ зладзіла дома ў Балуха новы ператрус, «выявіла» на гарышчы 90 патронаў і трацілавыя шашкі, была распачатая новая справа.
Уладзімір Балух сваю віну не прызнаў. У апошнім слове перад вынясеннем прысуду ён заявіў, што справа супраць яго — гэта палітычная замова.
Цяпер чытаюць
Офіс пра скандал з Ціханоўскім: Брытанская віза была аплачаная, але ён так і не падаўся на здачу адбіткаў пальцаў14
Каментары