Бунт бацькоў у гомельскай школе. Дырэктар звольнілася, а дзеці перамаглі ў конкурсе, на які яна іх не пускала
У школе №67, у якой частка выкладчыкаў і бацькоў ўзбунтаваліся супраць дырэктара, вялікія перамены. Ранейшы кіраўнік навучальнай установы Ганна Мельнікава напісала заяву па ўласным жаданні, а дзеці з'ездзілі на конкурс, на які яна іх не адпускала.
Канфлікт у СШ №67 Гомеля здарыўся яшчэ ў пачатку лістапада. Некаторыя настаўнікі і бацькі, незадаволеныя дзеяннямі нядаўна прызначанага дырэктара школы Ганны Мельнікавай, склалі калектыўны «Ліст недаверу» і адправілі ў вышэйшыя інстанцыі, а таксама размясцілі ў інтэрнэце петыцыю, у якой патрабавалі адстаўкі дырэктара.
У школе, дзе паспяхова развівалі ўжо шмат гадоў эстэтычны напрамак (у навучальнай установе пяць узорных і адзін народны музычны калектыў), на думку бацькоў, літаральна за два месяцы пагоршыліся ўмовы для рэпетыцый, штучна скарачаліся гадзіны выкладання прадметаў эстэтычнай cкіраванасці, дзяцей пазбаўлялі канцэртаў.
У лістападзе на школьным сходзе з удзелам прадстаўнікоў адміністрацыі Цэнтральнага раёна Гомеля і аддзела адукацыі бацькам паабяцалі, што ўзніклі непаразуменні і праблемы ў хуткім часе вырашацца.
Аднак сітуацыя не змянілася. Свайго апагею канфлікт дасягнуў у снежні, калі дырэктар выдала загад аб адмене паездкі на прэстыжны міжнародны конкурс у Польшчу з абгрунтаваннем «няма сродкаў». Бацькі зноў пачалі абурацца. У сітуацыю ўмяшаліся гарадскія ўлады і ўпраўленне адукацыі — дзецям дазволілі паехаць на конкурс.
Перад самым новым годам дырэктар напісала заяву паводле ўласнага жадання і пайшла са школы.
— 22 снежня Ганна Васільеўна сабрала ў актавай зале калектыў і паведаміла пра сваё звальненне. З трэцяга студзеня ў нас новы дырэктар — Аляксей Чарнышоў, да гэтага кіраваў школай №26, — распавялі ў школе.
Дарэчы, у пачатку студзеня юныя артысты вярнуліся з Польшчы з конкурсу, на які іх не пускала дырэктар, і прывезлі адтуль гран-пры.
-
У Беразіне прачнуліся пчолы. Дзяўчынка, якая іх пабачыла, скарыла тыкток
-
«Беларусы і ў Дубаі беларусы». Як суайчыннікі арганізавалі дапамогу тым, хто не можа вярнуцца дамоў праз закрытае неба
-
«Пад канец адпачынку даведаліся, што тут няма сховішчаў». Беларусы, што знаходзяцца ў ААЭ, расказалі, як ім там цяпер
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі12
Каментары