Хто такі Арцём Чайка, які ўдзельнічаў у адкрыцці мотасезона разам з Віктарам Лукашэнкам
У Мінску 29 красавіка прайшло адкрыццё байкерскага сезона H.O.G. Spring Challenge 2018. Да Кургана Славы прыехалі сын Аляксандра Лукашэнкі Віктар з сям'ёй, міністр унутраных спраў Ігар Шуневіч і начальнік ДАІ Дзмітрый Карзюк.
Усяго сабралася каля 6000 чалавек, у тым ліку госці з Расіі і Еўрасаюза.
Сярод ганаровых гасцей быў Арцём Чайка. Гэта сын генпракурора Расіі і чалавек неадназначнай рэпутацыі. Яму было прысвечанае спецыяльнае расследаванне расійскага антыкарупцыйнага блогера Аляксея Навальнага.
Расследаванне выявіла ў Чайкі дарагую нерухомасць у краінах Заходняй Еўропы. Акрамя таго, ён кантралюе шматлікія прадпрыемствы ў Расіі — часта яны аказваліся ў яго руках у выніку непразрыстых аперацый.
Віктар Лукашэнка з жонкай не першы год бяруць удзел у мотапрабегах. Здаецца, матацыкл — такое ж «палітычнае» хобі для сына, як у Аляксандра Лукашэнкі — хакей.
Мотапрабегі Віктар выкарыстоўвае ў тым ліку для выбудовы кантактаў з Расіяй. Акрамя таго, беларускія мотапрабегі сталі свайго роду заменнікам для актыўнасці чыста расійскіх мотаклубаў у Беларусі. У прыватнасці, раней на Беларусь былі спрабавалі распаўсюдзіць сваю актыўнасць «Начныя воўкі», актывісты якіх адыгралі пэўную ролю ў захопе Крыма і Данбаса.
Цяпер чытаюць
Адзенне дзяўчыны, знойдзенае ў Сляпянцы, падобнае да вопраткі Яны Кастранковай — дачкі дырэктара буйнога агракомплексу2
Каментары