Расія і Беларусь дамовіліся аб зняцці ўзаемных абмежаванняў наконт паставак малочнай прадукцыі, паведаміла журналістам афіцыйны прадстаўнік Рассельгаснагляду Юлія Мелано. Адпаведную «дарожную карту» па працэдуры зняцця абмежаванняў у суботу падпісалі Рассельгаснагляд і дэпартамент ветэрынарнага і харчовага нагляду Беларусі.
«Дарожная карта» падпісана ў рамках дасягнутых раней урадамі дзвюх краін дамоўленасцей і разлічана на 2018 год. У ёй прапісаны мерапрыемствы, якія будуць спрыяць «хутчэйшаму ўрэгуляванню сітуацыі» па зняцці ўзаемных абмежаванняў на пастаўкі прадукцыі.
Так, з 11 чэрвеня Рассельгаснагляд здымае часовыя абмежаванні на пастаўкі прадукцыі чатырох беларускіх прадпрыемстваў — вытворцаў мяса і камбікармоў: ААТ «Віцебская бройлерная птушкафабрыка», ТАА «Вахавяк Плюс», ТАА «Гродзенскі мясакамбінат», ТАА «Белэкатэхніка». З 11 чэрвеня Рассельгаснагляд зможа аднавіць права экспарту малочнай прадукцыі яшчэ для трох беларускіх прадпрыемстваў, калі будуць прадастаўлены дакументы аб правядзенні лабараторнага маніторынгу па групах рызыкі, вызначаным расійскай службай.
Разам з тым прадстаўнік Рассельгаснагляду паказвае, што Беларусь працягвае пастаўляць у Расію прадукцыю з шматлікімі парушэннямі патрабаванняў заканадаўства ЕАЭС.
З 9 чэрвеня ведамства абмяжоўвае пастаўкі прадукцыі ААТ «Віцебскі мясакамбінат» (з-за бактэрый кішачнай палачкі ў ялавічыне) і віцебскага ААТ «Малако» (у пітным малацэ з гэтага прадпрыемства быў выяўлены альбендазол). Для прадукцыі яшчэ шасці прадпрыемстваў уводзіцца рэжым ўзмоцненага лабараторнага кантролю (спіс апублікаваны на сайце ведамства).
Акрамя гэтага Беларусь правядзе расследаванне прычын выяўлення нітратаў у малочнай прадукцыі шасці беларускіх прадпрыемстваў - пра гэта паведамлялася на гэтым тыдні. На час правядзення праверкі на прадукцыю гэтых прадпрыемстваў будзе ўзмоцнены лабараторны кантроль.
Каментары