Знаёмыя і родныя пацярпелых у ДТЗ ва Украіне: «Гэта была бясплатная паездка на тры дні»

Сяброўка пацярпелай у аварыі ў Мікалаеўскай вобласці пасажыркі распавяла TUT.BY, што для яе знаёмых гэта была паездка на тры дні — бясплатная. Пра «выгадную прапанову», якая паступіла дочкам, кажа і мама пацярпелых у аварыі сясцёр з Гомеля.

Дзяўчына распавяла, што яе 19-гадовая сяброўка Наталля (імя па этычных меркаваннях зменена) разам з мужам паехала ў Адэсу на тры дні. Іх чатырохмесячнае дзіця засталося з бабуляй.

— Гэта быў тур на тры дні. Дзень туды ехаць, дзень на моры і дзень назад, — кажа суразмоўца. - Наколькі я ведаю, Наташа пасля аварыі сама звязалася з роднымі, патэлефанавала з бальніцы. Яе муж загінуў.

Па словах дзяўчыны, гэтая паездка была бясплатнай.

Трагедыя, нагадаем, адбылася каля 5 гадзін раніцы 20 ліпеня на трасе Кіеў - Адэса каля пасёлка Крывое Возера. Мікрааўтобус Адэса - Гомель урэзаўся ў грузавік, які стаяў з правага боку праезнай часткі з-за няспраўнасці. Па дадзеных паліцыі, у ДТЗ загінула пяцёра чалавек, 12 пасажыраў накіраваныя ў медустанову, тры з іх у цяжкім стане.

Знаёмая Наталлі распавяла, што ў паездку група павінна была выехаць у аўторак. Але тры чалавекі ад яе адмовіліся. Тады Наталля патэлефанавала сяброўцы і прапанавала паехаць з імі.

— Па-мойму, яна казала: «Адпачнеш, і табе 40 даляраў дадуць». Але я адмовілася. Цяпер усплыло: там нешта звязанае з перагонам машын. Але мне Наташа нічога пра машыны не казала.

Магчыма, гаворка ідзе пра ўдзел беларусаў у шэрай схеме: пры перасячэнні ўкраінскай мяжы нерэзідэнтамі Украіны на іх афармляецца часовы ўвоз аўтамабіляў з Еўропы. За гэта, паводле інфармацыі ўкраінскіх СМІ, плацяць ад 20 да 40 даляраў за машыну.

Як была арганізавана паездка канкрэтна гэтай групы дарослых (дзяцей у мікрааўтобусе не было) за мяжу, невядома. Як даведаўся TUT.BY, яна не была аформлена праз турагенцтва: у кіроўцы — прыватнага перавозчыка — былі «свае кліенты», паведамілі нам яго знаёмыя.

У Галіны Леанідаўны ў аварыі пацярпелі дзве дочкі. Старэйшая — 36-гадовая Ганна — у цяжкім стане ў рэанімацыі, малодшая — 35-гадовая Таццяна - у хірургіі. Жанчына распавядае, што дочкі сабраліся на адпачынак спантанна — ледзь не за адзін дзень. Сказалі, што «паступіла выгадная прапанова».

— Кажуць: мама, нам на моры не з'ездзіць, дорага — дык хоць на пару дзён адскочым. Паглядзі, маўляў, дзяцей. Я кажу: вядома, пагляджу. І ў сераду днём з'ехалі, - плача жанчына.

Галіна Леанідаўна ўжо тэлефанавала ў бальніцу: «Старэйшую перавялі ў рэанімацыю ў Мікалаеў, у яе пераломы і нос моцна пашкоджаны. Другая дачка ў больш лёгкім стане. Кажуць, што можна забраць будзе».

У Мікалаеўскую вобласць адвёз яе знаёмы. Як стала вядома, дапамогу ў дастаўцы пацярпелых на радзіму акажуць гомельскія медыкі.

• 0
• 0
• 0
• 0
• 0
• 0
• 0
• 0